Kerela liata zawpi ta heih-lyuleipa ama tusao

Kerela liata hmo a tlôpa rarô y kawpa liata tribal chyhsa pakha cha nie awpa a paru, tahpa ta baipa châpa ta, zawpi apôhpakhypa ta athata ku pathlapa ta, ama kupathlana he tao khao leipa ta a hrona a pahlei hapa a châ.

Kô 27- ta uhtheipa Madhu, tribal chyhsazy pahrâna khih viapa Attapadi, Palakkad, Kerela liatapa he nie awpa a paru tahpa ta baipa a châpa vâta zawpi apôhpakhypa ta patupa ta, khawhri ta chahrypa ta ku ama pathla hapa a châ.

Chyhsa thokha ta ama reina dâhta cha he Madhu he palôhrupa lâchhâhta rairuna a hneipa, heihlyuleipa, anodeita râhhmâhpa liata a y laih thlâh hapa châ ta. Lôkhaoh liata pahrâpa ta, a yna lôkhaoh tawhna heta zawpi heta paraipapuapa ta ama thie hapa a châ, ama ta.

Madhu ku tawhna heta polythene, sahphâ a chyhta a khôpa, âhiah paohpadipa chyhta, châhnamei sâkha sâno, mobile charger rao hapa nata torchlight chhie kaw bâpa ama hmô. He a hmo a vaopa zydua he tlaw 200 rachhôh mâpa a châpa hawhta reipatipa a châ.

He a ku liata hmo ama hmôpazy vâna heta zawpizy heta Madhu he hmoparuthaipa a châ, tahpa ta baipa ta ama tu hapa a châ.

Zawpi heta Madhu he a chysiazy pahluhpa ei ta, nohthlazy a lakhei ei ta, video ta zy la ei ta. A nohthlahpa liata â lâna dâhta cha he satlia ngiachhie a chhi kawpa heta a chô liata hmo a tlô haipa cha pahnothaipa chhao lyu leipa ta, â heihâ chakhyh thlâh ha.

Zawpi ta ku ama pathla khai tawhna heta Madhu he Police ku liata hlâpa châ ta. A duasu he pha lei via lymâpa ta, thohna ama O ngaikhei tawhta a thi hapa a châ.

He hawhta Madhu thina chôchâh liana heta tribal chyhsazy ama palôhtlâh lei kaw ta, maophaohtuhpazy cha tlua papua ta, patu cheingei awpa amâ hnaw. Kerala Chief Minister Pinarayi Vijayan chata he hmo a tlôpa he chyhsapa hrozie awpa chhao châ vei, a rarô y tu haw, tahpa ta Police-zy cha thlaita peihriatuhpazy tlua papua awpa ta a pahnosapâ ha hra ei.

- Indiatimes