FIFA World Cup 2018 : France 1 - 0 Belgium

Semi Finals hmiatuapa liata France ta Samuel Umtiti goal hmâpa ta Belgium cha 1-0 ta pahniepa ta, France Football thâtih liata a ei thôhna awpa ta Final amâ ngia ha heih. Krestovsky Stadium liata France fans zy pyury pha ta, Belgium fans zy ama cha!

Akhaihna mo pha kawpa liata Belgium coach Roberto Martinez ta formation thiehpa vaw puakhei heihpa ta, centre backs pathôh sohpa ta, specialist full-back tlyma wing-back tlyma soh vei.

He a formation he Belgium châta a pha kaw khiah maw tah thei awpa ta a kaw pie pha pathao kaw ei ta, a tlô via awpa chhao ama lyu kaw. Belgium coach Maerinez heta formation panano hoh kaw ta; Group stage lia chhao khata 4-2-3-1 tawhta 3-4-3 lâ a panano tawhta 3-5-2, lâ a panano lymâ heih.

1st Half amâ khaih tawhta minute 6-na liata Eden Hazard ta tlyliah chavei lâ tawhta a zâ râkheipa ta, kao chaby chhôh lâ za chapie pangia ta, French diahsua (defender) zy pua amã tymâ. Vâhneichhih kawpa ta amâ boh chho ha.

Chelsea star he Kevin de Bruyne nahta daihti a thaona viana lâta amá râna a ri ei ta, French diahsua zy pua ama pabua khai ha.

Minute 19-na châ ta, Hazard ta France kao chaby lâta a za chapiepa cha Raphael Varane ta avaw pakhâ ha heih.

Minute 2 hropa khô via heih ta, Real Madrid defender Varane heta Kevin de Bruyne chapiepa a pakhâ heih hra.

Belgium ta Corner hmô ei ta, corner tawhta ball a vypa, Jan Vertoghen ta a za chapiepa, French kaovaihtuhpa Hugo Lloris ta avaw pakhâpa kha la, atahmâ World Cup liata a pha chaipa hrytapa a chã cheingei aw.

Minute 34 sie ta, France Player zy dusawta ta avaw taopathi lymâ ei ta, Belgium hnôhtlâh ama pahlaw haw.

Antoine Griezmann ta de Bruyne tawhta ball lapa ta, chachâh lâta a ypa Mbappe kei pie ta. Mbappe heta Belgium kao chaby chhóh chavei lâta a ypa Olivier Giroud kei pie heih ta. Daihti ryhpaohpa, goal khô theina daihti ryhpaohpa a pahy awpa alyu kaw. Châhrasala, Chelsea striker Giroud ta yzie hnei leipa lâta papua ta, a zyh zyhta deita a chapie thei.

Minute 5 khô heih ta, Mbappe ta Benjamin Pavard cha ball a chadaipangiapa (Through ball) pha kawpa za pie heih ta. Pavard ball chapiepa pha kawpa cha Belgium goalkeeper Thibaut Courtois ta a pheichachâh lâta avaw pakhâ ha heih.

2nd half minute 51-na châ ta, France ta hmia a sahna goal ama khô haw. Olivier Giroud ta â hnia pâ thlâh hapa tawhta a chapiepa cha Vincent Kompany ta vaw pakhâpa ta, corner ama hmô haw.

Griezmann ta corner avaw chapiepa pha kawpa cha, Samuel Umtiti ta ano vaihtuhpa tawhta atliehpapuapa ta, ano hlâta dohseih via syulyupa Marouane Fellaini a zaw pakhôpa ta, French hmia a sahna za khô ta, French fans zy pyury a pha tlai na.

Belgium coach Martinez ta midfielder Mousa Dembele vyuhpa ta winger Dries Mertens hmâh heihpa ta, formation a za chahria-chahria heih.

Minute 5 hropa khô heih ta, Mertens ta Fellaini châta ball pha chaimâhpa a piepa cha Fellaini heta pangia daihmâ ha ta. Inchi chyhta deita a ngia vei!

France heta tôh muarua leipa ta a pa-ipacha via lymã ei ta, Belgium ta tlao ama za chadie via tyh. De Bruyne cha midfield liata a pabu via lymâ ta, daihti ryhpaohpa deikua a hnei chyh via lymã ha.

Minute 81-na châ ta, Axel Witsel kao chaby khôtho lâ tawhta a za chapiepa cha, France kaovaihtuhpa Lloris ta avaw pakhâ heih.

Belgium heta daihti ryhpaohpa hnei ei ta, châhrasala, amã vâdua ma France he ama pahnie ngâsâ vei ma, pahno'pa châ vei!.

Daihti chhâ ta, France ta 1 - 0 ta Belgium pahniepa ta, Final amâ ngia haw.

Final liata amâ su awpa he atazã pasiapa châ aw ta. England nata Croatia akhaihna liata a tlô viapa maih târi 15 Khihpa khita ama hmiachhy aw