MARA NOVEL : DÔTHÂ NATA NGÔKI (Bo-2-na)

Bo II-na

Khihrâ tlâhpi chô liata my noh vaw chhipa chata noh hrota a tao tyhpa pyly hawhta a ry lâta Khihhrâ khihpi cha za khai pathao ha heih ta; chasipaw ziza chakua châ kholopa ta a ypâ liahsa tawhta nopi avaw lie awpa ziza avaw thai haipa cha Khihhrâ khihsawzy châta cha noh thiehpa nata noh phapa, cha-ypi daihti avaw pahiehpapuapa a châpa vâta mydi tawhta thathyu kawpa ta pyury hnei lei thei vei ei. Hmypi mydi noh vaw chhipa cha, Khihhrâ khihsawzy châta noh thiehpa a châna hawhta, nôhmei hârapazy nata sipasapazy châta chhao noh thiehpa, hnabeiseihna a chakaihpa ta avaw chhipa tah leitheipa châ tlai hra aw vei.

My hropa hawhta Awhchari liata awhzy papuapa ta, vao nodipa sâh ngâpazy liahsa a khâsia khai tawhta Nôdei chata sâh daih awpa a chhuahpa ta patohpatiah hai heih ta. O chhôh lâta chakoh kiah liata liahsa tyuhmo paryhpa ta ama paw, Mawkhu cha thaihrih uahpa ta atyuh thlâh ha hra ta.

“Deidei, Dôthâ laiphô chôpa cha dia ma avaw di rai vei. Khataih râh ma a tlô sualuah haw vâ tly i?” tahpa ta ama nô sâh daih ngâpa cha kei tah ta.

Ama nô Nôdei chata, “A!! pahno khao hra na. Atahmâ cha kaw satlia pathao ha ta, laiphô a chô pathaopa he a paphasa kaw hapana a châ ei aw. O a di leipa ta ma râh lâ a palâhpâ ha heih ma. Eima sawchapaw Dôthâ bao cha hnaihta a satlia tawhta chhao hârapa a châna he â pahno tu sisaw ha heih ta, khih chhôh lia viasazy a pakyh ta, lyurai hria hmeiseih awpa a y hlâ via, cha-yna daihti pakhôsa awpa hlâta cha râh lâta khihsa ta, râh a khie awpa khiahma â tlyh via ha heih?” tahpa ta a kaw heih hlei leipa ta sâh cha daih pazao lymâ ta.

Puhpa Mawkhu-zy nôvah he sawlei nawh-leipa ama châ hapa bao hnaihta, a hawti nota a nô nata paw ta ama thisai hapa, Dôthâ he saw hawhta mohôhpa ta, kyhtotie liata a pachhiepaphatuh chaipa châ ei ta; hârapa a châna hmahta â pahno tu ha la, tahpa ta kyhtotie liata ama papyupahly kaw hrapa a châ.

Puhpa Mawkhu he râh â khiena liata â piepasi tlamaw hapa vâta â khaihly khao leipa, a phei chachâh lâ chabiahpâpa châ ta. Lyurai chahrâhpa hmahta a hria thei khao leipa a châpa hnaihta, Dôthâ he amâ ngiapâ chaipa a châ.

Dôthâ he Puhpa Mawkhu nawhtapa, Hniedô sawchapaw hnei chhôhpa châ ta; A nô nata paw heta Dôthâ he kô 10 rachhôh a châ nota amâ vaw pahâsai hapa a châ. Cha tawhna rakha chata Puhpa Mawkhu nah nôvah heta mohôhpa ta, saw lei nawh leipa ama châpa vâta ama sawchapaw hmeiseihpa hawhta mohôhpa ta, ama vaw deichhy lymâ hrapa a châ.

Châhrasala, Dôthâ heta hârapa a châna nata a nô nata paw hmeiseihpa ama châ leina he pahno ngâthlâh ha ta; nohkha noh liata ano liata kâchhiena nata akarina hnei leithei tyh leipa ta; nopi daihti âvaw lie na ta chhochhi cha a nô nata paw vâ pachaih tyh ta, O nata lyu liata pahrâ awpa hlâta râhhmâhpa lâ daihti a hmâh hluh via ha tyhpa a châ.

Dôthâ he nôpaw likah liata laiseihpa a châ taraw leipa ta a pawpaw Mawkhu nah nôvah ta ama deichhy pahnie kawpa vâta nata ama saw ta hawhta mohôhpa ta chhorei abyuhna liata chhorei ei, pachu abyuhna liata pachu ei, ama tahpa vâta satlia siapa, veiseihpa nata kyhtotie liata a viasanah ta amâ tlu leipa, ama palôhrupa ta ama mopasâh kawpa; anodeikua, hârapa a châna ama pahno thlâh hapa vâta amâ iekhy kawpa nata aru lâta ama tei paru kawpa a châ.

“Deidei, thophao tlô ti châ haw, khazia rimâ ma eima Dôthâ cha âvaw di to vei?” tahpa ta Puhpa Mawkhu cha  athaihrih uah ngâpa pasopanôpâpa ta ama nô laikah liata thopahreih pasopanô ngâpa cha kaw awsao ta.  A thaihrih a pasopanô khai tawhna cha chakoh ngaipa ta a kei tyuh ta.

Cha nona chata Dôthâ chhao cha kahmi vaw tlypâ ha hra ta. Pihnô Nôdei chata avaw hmô patawnah ta, “Pâpâ, nâ vaw di ha mâ. Na paw ta a cha pado ngâkaw la khâ” thlai vaw tah ta.

“Ei nâ, Atamy la pieva ei chôpa la ei za vaihpâ ha; hih vachari sâno avaw ao ta” tahpa ta a sahria cha za cha-ia ta, Pihnô Nôdei chata thlai vaw mohpa ta, “A lai kaw dia; na paw kha za pahmô tua. Ano kha kumaih leipa bao cha hnaihta, vachari cha rei lei, mamo dâhdei hmahta pa-ao mâh leipa châ ta khaw..kei he kheita ma zua eina pa-ao tly?”tahpa ta saisona chôta Dôthâ cha O chhôh lâ za pazipâ ha hra ta.

Puhpa Mawkhu cha chakoh kiah liata liahsa atyuhpa ta sachawhpa he vaw rao ngâkaw ta. Dôthâ avaw hmô patawnah chata, “Pâpâ, khataih râh cha ma na tlô haw?tahpa ta na pihnô nahta eima vaw reih ngâkawpa tlai. Laiphô chôpazy cha pati niepâ h’awpa hnaihkawh ma châ vâ. Ama cha mohnao mâh tâ” tahpa sai vaw sopâ ta.

Dôthâ chata a reikah leipa ta pachôh liata barah cha kei lapa ta, a sahria liata vachari cha thaohpa ta barah liana chata za pachhi ta.

Vachari a hmô patawnah ta, “Aw, he dia laiphô chôna tawhta vachari nâ vaw dikhei thlâh haw. A lai dâh châ. A thawh kaw hih” tahpa ta vachari cha za paliepatheipâ lymâ ta.

Dôthâ chata, “Ei pâ, atamy la pieva ei chôpa la ei za vaihpâ ha. Sietlô daihti ta ei kaw tlô hmâ aw, tah ta taraw na ta eima pachih za chapiapâ ha na ta mâh my” tah ta.

Pihnô Nôdei chata, “Am’paw, nâ vachari kha tichhâ lâ kei buakhei la, Pâpâ he pati vaw nie tua sala pha khiah maw. A no chhao a di kaw bâ thlyu aw” tahpa ta pati nie vaw taopa ta. Puhpa Mawkhu chhao chata vachari cha tichhâ ngaikheipa ta, buakheipâ lymâ haw hra ta.   

Puhpa Mawkhu nata Pihnô Nôdei-na nôvah he uhthei lâchhâh ama châ hapa vâta Dôthâ he amâ pahniehna chaipa nata ama thlalôhna chaipa châ ta. Ama khihsatôhtuna â chhua-ua hra vei sala nôvah adyhryh kawpa nata aly thei kawpa ama châpa hleikhôta, Dôthâ he ama dao thai kaw hra.

Dôthâ pati a nie ngâ nona chata Puhpa Mawkhu chata vachari hmi a phia khai chiehpa cha chakoh lâ vaw chalopa ta, Dôthâ kheina chata, “Pâpâ, atahmâla he satlia hmeiseihpa, nohkha noh liata chhôhkha pawhrâhpa duasu liata a kaw duah thei awpa zy châ ha bâ ei chi ta; hmo nama taona kyhtotie liata viasazy nata khihtlâh amopâpa nama châ awpa â ngiah ta. O lâ tlyma, râh lâ tlyma viasazy amopâ chaipa nata veiseih chaipa châ a chhuah awpa a châ” tah ta.

Pihnô Nôdei chata, “Pâpâ, zâhnia cha tho eima phaohna liata Ngôki nahta a nô za sie hra ei ta, na thâtih sai na hiahrih ta; thozy na haw khei ta. Nâmo pano he hawti no tawhta khâ âvaw pazipa châ ei chi ta” tahpa ta Dôthâ cha vaw moh ta.

Dôthâ chata, “Ei nâ, Ngôki cha phoso zuah, nôpaw a pie theipa O chhôh tawhta laiseihpa, syngôh zuah hawh tlupo châ ta; kei dawh-ei satlia lia hmahta hâra thorapa na heta a phuh va na. Hawti no tawhta avaw pakyh tyhpa châ pi ta; atahmâla chyhsa mozy hmah ei ka tlamaw aw, tahpa he ei chi tyhpa vâta âhniahni awpa chhao he hmahta ei kâ a za chhie ha bâ” tah ta.

“Pâpâ, nâ bao heih hra he, na hârana he pahno tu saw ha heih chi tap ha vei la y. Keimo y pi ta, hâra thorapa a tah khao la chi. Na paw nata keima eima mo eima padei chhôh heta la hâra a tah khao kha y. Heihzy hawhta sôhthih eima hnei taraw leipa ta nâma pakha ta he la eima cha vao pahnie aw. Hâra thora a tah khao rai la chi” tahpa ta Pihnô Nôdei chata a pati niena pasopanôpâna chôta Dôthâ cha palie ta.

Puhpa Mawkhu chata ama nô biereipa cha thlai vaw pazaopa ta, “Na nô reipa cha â do mâh my Pâpâ. Na nô nata paw hawhta miah hmô hra vei la, hâra thorapa hawhta nâ pachâ pathlei aw, tahpa chipa ta eima theina zydua ta cha chakuchavei pi ta; eima khihsatôhtuna he he hawhta tlâ châ hrasala, eima pano ta eima mo eima padei chhôhta la hâra a tah khao kha y. Na nô nata paw eima y hlâh hih” vaw tah hra ta. 

Pihnô Nôdei chata, “Zâhnia tho eima phaona liata Ngôki ta na thâtih sai reih ta; sia a cha tahna zie zy nata hawti no tawhta â khy chaipa na châna zie zy athata na chho ta. Anohao la eima khih laihsa lia ei mothai kaw. Phosopa zuah hmah châ hrasala, a reisi ta, a nôchâ a ngia ta, nôpaw hneina apalaikheina palôh rai phaoh vei. Phoso zuah hropa rai lyu vei. Eima myuhnô châta ei uahva kaw” a kaw tah ngâ nona chata Dôthâ chata, “Ei nâ hra he, Ngôki iah ta a cha zai hapa a châ hih. Kheita rimâ ma phoso zuah cha keimo machhiepa thota hârapa o chhôh lia beihphiah chhophiah tao sala na tah rai” thlai vaw tah ta. Ngôki thâtih chata ama O chhôh cha palôhpahawh lymâ ha heih ta.

Dôthâ heta he hawhpa reikah he papua tyh hrasala, a palôh chhôhmaru chaipa liata deikua Ngôki cha mohropa châta pasaih leipa ta; ama likah liata khizaw pachâ ta hleidy dao thai lei awpa saikao a thuh kawpa y hrasala; a saduthliena ta deikua hleidy daopa ta, saikaopa cha pazao tyh ta, phie thei rimâ awpa châ khao vei.

Khizaw he a châhta cha, Dôthâ châta aly n’awpa a hluh kaw nota, a pathipalôh liata a châna siapa pahnosatuhpa hmahzôh a ypa chata taola chanei heih tyh ta; cha hmo chata saduthliena khizaw liata peirâh a paduapa cha a phie lilaw ha heih tyh. Cha hmahzôh cha, ano khota pahlei thei leipa ta; a veiseihna nata riahphana ta pahlei thei leipa ta, khizaw mokhaoh tawhta cha a duasu cha, duasu chhie chaipa hry liata hmahta tlaichhai a chhih lei pachaih heihpa a za châpa a châ.

Dôthâ he satlia pôhraoh phapâ thlâh hapa, Khihhrâ satlia hropazy hawhta vyh tu leipa, ngyuhpâ thlâh hapa nata chaolie a hua kawpa châ ta; veiseihna kyh liata chhao ama khih satlia hry liata cha â hnai vei. Lyurâh lâta a piedala kawpa nata tiama kawpa châ ta. Sa luh phaoh thei ta; a riahpha kaw hra. Ano he pawtho a kiah thai kawpa a châpa vâta laihsa zy ta thohaw awpa a y khiahta la Dôthâ he thlai ama aw ha tyhpa a châ.

Khihrâ khih satliazy heta Dôthâ he kyh hluhpi liata amâ kho leipa thota, amâ iekhy pachaih heihna chhâ chaipa cha, ama khih satliazy ta ama mothai kawpa, phoso zuah, chhithaipa nata pihthaipa, Ngôki nahta a tlaichhai kawpa châ ei ta; Dôthâ heta hârapa nata machhiepa a châna â pahno kawpa ta â hniahni ngâh taraw leipa ta, phoso zuah, Ngôki heta tlao â pahnia via tyh ta, ama likah liata suruapa kawh kawpa a ypa cha pahnolei â pachâ ha tyh.

Ngôki he phoso zuah liana hmahta pih thaipa nata chhithai patluapa ta ama reipa, a pôraoh chhao Mara laihsa liata la vâtlâh chô lâ tah thei awpa he châ ta. Ngyuh kawpa ta reih awpa chi a châ taraw leipa ta, a vo he saihpâ ta. Chanô zaoh kawpa ta rei awpa a châ taraw leipa ta, â ngiana rakha ta a sabia bie ta. A sâ pha kawpa, a patlâh pha kawpa ta a tobipa ta daodo kawpa ta a deichhypa a mopadei vâna chata satlia hluhpi palôh mochao ha ta; a hnapasu a ngia kawpa ry liata a hmao saih padihpa, chiahchi paw saihpa hawh tlaita a châpa cha, a pa tu leipa ta, a chha tu hra vei. A hmiphana zydua tobi via heih awpa ta a nôchâ hrozie taihta âvaw ngiapâ heihpa chata Khihhrâ satlia zydua palôh pahnie ta, Ngôki hmiakô liata cha sapi-sahrâh hmiakô liata dua beih leipazy chhao, ti hawhta ama nai zualuah ha heih tyh.

Dôthâ nata Ngoki he ama hawti via no tawhta khâ a pakaoh ta, khâ apakyh tyhpa châ ei ta; thyudyupa ama kaw châ tawhta chhao ama duasu âlyu lei kaw hrasala, â pathlie thei rimâh vei ei. Kyhtotie liata ‘Vachhu nôvah’ hawhta khâ a pazi tyhpa châ ei ta; châhrasala, nohlychhiki a kao khopa ta, apazi tyh hra ei sala, ama likah liata palôh-pathaihna nata a viasana phapa dei leipa ta cha su to hlei vei.

Cha hawhta Noh nata daihti vaw pakhô ei ta; ama kô nata khihzy vaw hluh laih ta, Dôthâ nata Ngoki chhao cha thyudyuna noh khôsaipa ta satlia nata laihsa tah thei awpa ta kô nata khih, hmi nata sâ liata liahsa amâ sua ha hra. Cha daihti liana tlai chata na ama pano likah liata hmo a nyupa, kyhpachâna hry liata tlyuh chaipa ama vaw tah tyhpa, ‘A viasa-phana tawhta Kyhpachâna’ cha âmo pano cha rei lei, ama heihzy châta chhaota hmôchhei thai rihmâ lei awpa ta papawhsapa ta a vaw y hapa cha a châ. Kha hlâ tawhta palôhpathaih kawpa ta, satlia nata laihsa likah liata azaona, ‘Kyhpachâna mokhaoh nata pachâna tawhta vaw puapa a viasana ta avaw kao khoh hra v’ei sala’; atahmâ cha, ‘Kyhpachâna cha, ama likah liata ‘Vâ-iana’ mohphaohpa ta âvaw zie haw.

Dôthâ he machhie satlia lia chhao hmahta nô nata paw a hnei khao leipa ; Hâra-thorapa deita châ ta, nohkha noh liata a bai-lyu awpa dâhdei chhao hmahta a hnei leipa, a hârana dâh pasa ngaitapa a châ. Cha nota, Ngôki deikua cha Phoso zuah, machhie satlia lia hmahta, khâpa hmahta a hnei leipa châta cha a lâsie paryhpa vaw saipa hmahta kâchhie a chhihpa a châpa hleikhôta, mahnô nata mahpaw noh tawhta chhôhkha zachhihpa nata a pietheipa châ ei ta, Dôthâ châta cha ‘Chyulei vâti dei a hrialâhpa’ hawh deita a za châ thlyu aw.

Châhrasala, kyhpachâna heta ahy hmahta pathlua leipa ta; râhri hnei hra leipa ta, ahy hmahta kyhpachâna a to tlâh lei awpa nata kyhpachâna pahnothailei awpa ta palôh chaopa he a so thlâh ha hrapazy hry liata y leipa ei ta; chavâna tlai chata, ‘Kyhpachâna he alyna awpa sai khiahma a châ’ tahpa ta chyhsa hluhpi ta amâ vaw ngâcho chhei ha tyhpa chhao a châ hra.

(Pazao heih awpa...)