Samaw Marasaw

Home / India News / Muslim maluh pachyh a chhuahna a châ thei ma? : Assam liata chyhsa thysy 40 (Lakh)-zy cha India chyhsa ta reipa châ khao vei ei!

Muslim maluh pachyh a chhuahna a châ thei ma? : Assam liata chyhsa thysy 40 (Lakh)-zy cha India chyhsa ta reipa châ khao vei ei!

Monday, July 30, 2018


Assam, July 30 : Assam liata Muslim maluh pôh chatlie tu hapa riepakona awpa ta hmahlana hawhta chyhsa hluhpi ta ama reipa, National Register of Citizens (NRC) cha atanoh khata Final Draft papuapa châ ta, Assam ti nata râh chyhsa â tahpa thysâh 3.29 (Crore) hryta thysâh 2.9 (crore) zy cha Assam ti nata râh nata India ti nata râh chyhsa (Citizen) tlai ama châ, tahpa ta apyhpa châ ei ta; he leipa maih cha Bangladesh tawhta avaw paihpa, tahpa ta dythapa ama châ haw.

Assam zawpi, a pachaihpa ta Muslim-zy ta ama ngiaroh kawpa nata Muslim zyhna zituhpazy kohkina châta taopa hawhta pachâpa, NRC liata ngiatlâh viapa zy :
1) Assam he India State hryta a ti nata râh zy Register tua chaipa a châ. Achhâpa : Bangladesh tawhta avaw paihpa, apachaihpa ta Muslim zyhna zituhpazy ama pôh chatlie tu hapa ta pahnona vâta taopa châ ta. Muslim vote a hluh tu hapa vâta atlyhna liata yzie ama hnei pathao hapa ta ama pahnopa vâta he hmahlana he ama siekhei.

2) Assam maluh thysâh 3.29 (crore)-zy ta ti nata râh chyhsa ama châ tlai tahpa pasiana châ peimawhpa sawhkhâ lia pangia ei ta. Thysâh 2.9 (Crore) zy cha ti nata râh chyhsa hawhta apyhpa ama châ.

3) He yzie cha, maluh thysy 40.07 (lakh) hleizy cha Assam chyhsa châ vei ei, tahpa ta dythapa ama châ, tahna a châ.

4) He NRC liata a hlao leipazy heta amâ khopalie theipa vâta he he a chhâna deikua châ mâh vei.

5) He NRC ta Assam chyhsa châna châ a papua tawhta, Assam liata Congress party luhpa, Ripun Bora chata, "Maluh thysy 40 (Lakh) dua dythapa ama châpa he â nano kaw. Hmo sianô leipa vâro y ta. He chôchâh he sawhkhâ liata tlôkhei pi ta, Parliament liata eimâ duakheipâ aw. He he BJP ta atlyhna liata amâ thôhkhei thei n’awpa ta hmah ama lana a châ” a ta.

Trinamool Congress (TMC) chhao aly leipa ei ta, "Central sawhkhâ ta India râh ti nata râh chyhsa maluh thysy 40 (lakh) zyhna nata reih liata maluh chyh viapazy cha thy ha ta, he heta Assam state opa State maluh liata yzie a hnei kaw aw. PM (Narendra Modi) ta he chôchâh he House liata a reihpasia awpa â ngiah aw," tahpa ta SS Roy, TMC luhpa chata a rei.

He hmo vâna heta Assam state chhôh ziza â sâh kawpa hawhta reipa châ ta; pheisaihzy chhao riahvaihna rai ama hria hai.