MARA NOVEL : DÔTHÂ NATA NGÔKI (Bo-7-na)

Bo-VII-na

Zôrihtlâh lâta râh amâ khie n’awpa noh cha a vaw pahieh papua ta. Khihhrâ hawka liana chata pasaiphazy nata chapaw, dyu a tlai viapa nata râhpâh lâta hmâhtlâh a châ viapa sahlaozy cha avaw hmaohpakhy ei ta.

Hawka liana chata Khihhrâ laihsazy chata ama satlia sahlaozy râh a khiepa ta hâta eikha dua a châhpâ ha awpazy cha pathliepa ta, thokha ta karao vaw padopâ ngâkaw ei ta; thokha ta aomâh ama chatypa hleikhôta aomâhbei meilô ta vaw pa-ia ngâkaw hra ei ta.

Dôthâ cha a zo lâta a mâ sapazy pachâpa ta hawka liana chata a Meithei pazupathâpâna chôta avaw hlaihlâ ngâkaw ta. A zo lâta a mâ sapa cha pachâ pha leina muarua awpa a châ taraw leipa ta, a palôh deikua pha tu vei.

A mâ liana chata, Ngôki nahta su aryh kawpa liata avaw tyuhkhohpa ta, ama likah bie zy ama vaw reihkhoh ngâkaw nona heta, eikhapi ta meih avaw chhohpa ta, amah mi chhao taihta a hmô thei khao lei ngâna taihta avaw chhoh ta. Ngôki kei mo awpa ta â kei heihpa cha a kiah liata vaw y khao leipa ta. Meih achhohpa hry tawhta Ngôki ao ta, “Na vaw pachha tyh..a uh Dôthâ, na vaw pachha…ei nâ! Khohna!..” a tah ngâpa hryta kei paza awpa achhuahpa ta a bâh a kei pazawpa cha vaw y khao vei. A mâ cha pachâpasia ngâkaw ta; anodeikua ‘Mâ chakhyhpazy na a châ bao aw’ tahpa ta a pachâpazi khao leipa kha a châ. A y deikua pahâh tu vei.

Cha hawhta a mâ pachâpa ta â hlaihlâ ngâ nona chata Ngôki heta vaw ngaipa ta, “A uh Dôthâ, vâ nâ chhih kaw heih hih..a tlâhbohpa ta avaw lie cheingei la, sa luh vaw phaoh cheingei ma y. Nâma liata eima khih nôpawzy hnabeiseih â sâh kaw la y” tahpa ta ano theikhi ta, “Ei chavâ va dâh la aw” tahpa ta yzie hnei kawpa ta kaw pakie ta.

Dôthâ chata, “Ngôngô, keichhao ei cha vâ kaw hra aw..nâ chhao avaw mohôh pha la..Sakhia ta vânoh a to tlâhpa ta eina rao khiahta la sa luh eina pie bao na.…” tahpa Ngôki ta aomâh a piepa cha a sahria liata za pasâpa ta, zâhnia lâta a mâ kha a chho vâ ma I, tahpa ta â pachâ tawhta, a palôh zy hmahta pabua ha la, a tahpa vâta “Eima tlô nota khih hawka liata Meithei papa pyu nata hladyu pathluahpa pyu na thei tua chaipa cha keima ei châ, tahpa vaw pahnopâ ha ma y..” tahpa ta Ngôki cha za pakiethlu ta.

Ngôki mopadei liana chata a noh hro zydua hlâta Dôthâ chata a vâ pachaipa ta za hmô ta. A noh hro zydua hlâta a tlaichhai pachaihpa ta a hmô hra. A pachâpadypa cha ma a châ ha ma, cha hawhna tlai chata ano chhao a y hrapa ta â pahno.

Ngôki chhao chata Dôthâ pachâna hawhpa pyly cha a pachâ hrapa ta â lâ ta. Ama yziana dâh nata amâ pathliena dâh cha pakhâta ta vaw saituhpa châta, a hmô khao lei awpa a pathliepa zy ama za lyuna kao a y hra.

Cha hawhta Ngôki nata Dôthâ zy amâ duapâ thlâh hapa cha Biekhâ ta vaw moh thlâh ha ta. A mothi loh ngâsâ thlâh ha ta. Ama yna lâ kei pangai ta, kei pachhaih awpa cha a palôh liata y taraw hrasala, so a tah thlâh ha hrapa a châ tawh cha, zâhniatliata liata thohawna liata Ngôki chô liata â pielyuna dâh kha a thei thlâh ha ta; a kâ a chhiepâ hapa vâta a khona cha papitlohsa leipa ta, râhhmâhpa liata daihti ryhpaohpa tlua awpa achhuahna palôh phaoh ha heih ta.

Khih hawka tawhna chata Dôthâ chata za saipaliepa ta, Zithai ta khihro râh hro a heih leipa ta avaw sai pazina dâh cha za hmô ta; a bâ a kaw hiesawpa cha za chyh-eihpa ta, satliapa hawhta kyhpachâna nôchâ a palâsana cha hnôhchhypa ta, râhhmâhpa liata pasaipha a châna palâsa awpa ta a aolainô cha a ngiatlâh liata a kaw piapa ta, a heihzy hawhta Khihhrâ khih hawka cha hnôhchhy ha hra ta.

Nohkha nata zâkha ama sie tawhna chata, sato-sazaw laina tlâh ama tahpa, Zôrih tlâh cha kei tlô ei ta. A riena su awpa pha kawpa, khahlâ tawhta amâ vaw chhaina tyhpa lôkhaoh kawh kawpa liana chata a chhaipa ta, satlia hawti viapazy nata chaolie a hua viapazy hleikhôta, veiseih viapazy chata tho ti awpa nata âhmie zy thlai tlua awpa ta puapâ lymâ ha ei ta. He zâ he cha ama vaw siena zy â hlapâ hapa vâta ama tha padâhpa ta, a mô tua aw ei ta, a mylâ tawhta sa amâ by pathao aw, tahpa cha ama ryraona a châ.

Dôthâ chhao cha âhmie ravopa tlua awpa ta a Meithei a pupa ta a viasapaw, Vâchai nahta Zôrihtlâh thaby lâta a sih yna lâ cha zu ei ta.

Zôrihtlâh he Khihhrâ tawhta nochhi lâta a ypa, a thaby lâ tawhta kia byuh leipa ta, ama khih lâ tawhta lâthlôh avaw chhih lymâpa ta a tlâh khophie tawhta puapahlie theipa châ ta. He vâna heta amâ riena su chhao he a tlâh lialôhpa, lôkhaoh pha kawpa, a chhôh liata ti a lohpâpa liata a taopa ama châ.

Dôthâ nata Vâchai zy chhao cha tlâh thaby lâta a sih yna lâ cha ngaipa ta,  a sih liata vachari nata râh-awh ti vaw dohpazy hawhpa ama hmô pasu chho khiah tahpa ta ama zupa kha châ ta. Châhrasala, a sih cha vaw dâh kaw ta.

A sih yna su he zôrihtlâh thabypa, lôkâpa ry liata su a bypâ thlâh hapa liata a ypa châ ta. A chô lâta thokô lai kawpazy â duahpa vâta zohpâ thlâh ha ta, thochiah likah tawhta nohzôh ta a za khaipazy cha khaihna a hmô chhôhpazy ama châ. A chheihpâ lâhnia viapa nata a hla viapa liata tykaru sâh ngâpa pyu zy nata pavaw chyh viapa sâh ngâpa pyuzy chhao â thei pha kaw hra.

Dôthâ nata Vâchai zy chata a sih yna su liana chata pakhâta ta mohmia pasaih laihpa ta, a sih vaw tlytuhpa  sa lai viapa pheihniezy moh laih ei ta. Cha hawhta buakha chhôh tlai pakhâta ta sa pheihnie thiehhlâ viapa tluapa ta amâ khuhnao tawhna chata, myrâh lâtapa châ sala a ngia kawpa, Chaolia pheihnie a hno pha kawpa he ama hmô haw. Cha chaolia pheihnie ama hmôna tawhta lâhlâ leipa liana chata a ie thieh kaw chypa chhao kei hmôpâ ha hra ei ta. Cha a sih cha ama rei tyhpa, Chaolia, a ki hmahta â tyh liahsa hapa, a ki liata vâhiah laihsa a tyuh thlâh hapa cha a châ ma?tahpa cha ama pachâna liata a lai chaipa, ama reihpapua hlei leipa cha a châ.

Dôthâ chata thlai Chaolia ie cha za hriapa ta, “Vâchai, he a ie chhao a thiehhlâ kaw chy he. Atamy lâ ta ti avaw do nota a iepa a châ hih. Ahyhmah chho leipa la, mylâ mydi ta thyu pi ta, he liana heta eimâ zâ byh chhielie ha aw…tho ti awpa nata âhmie ravopa, riebu liata chho awpa tlua para tua sih” tahpa ta asih yna su tawhna chata a pasiepa ta, a sih tawhta laikachha via lâ cha khy haw ei ta.

Dôthâ nata Vâchai zy yna tawhta lâ hla tu leipa liana chata eikhapi ta Meithei papa pyu ama thei haw!

Meithei pyu vaw puana lâ cha Dôthâ nata Vâchai cha ahy chho a ngiah hlei leipa ta a râpâ lymâ ei ta. Mohropazy chhao chata ama ngaipâ lymâ hra tahpa ama ao nata pyury tawhta thei thei ei ta. Meithei pana su ama kei tlôpa cha Biekhâ ta a sakhih kapa avaw paliepalâ ngâpa he kei hmôpâ ha ei ta.

Mohropa zy chhao vaw y khai thlâh ha ei ta. Dôthâ chata thlai kei ngaipa ta sakhih cha kei mohpasia ta, sakhih taw a chhi haipa, a châ tahpa a kei pahnopâ haw. Ama vaw sie chyta a pawpaw Mawkhu ta bie a chhopa kha avaw thei papuapa ta, sakhih tawzy ngiachhie amâ chhih awpazie zy nata, ama duasu liata a duah hrapa a châpa hawhta â pahnona cha vaw lai chaimâh ta, eikhapi ta a hie vaw hâhpa ta Biekhâ cha uahnaopa ta, “Biekhâ, he sakhih panô heta a cha vaw tlahnao ma? A taw a chhi ngâpa tahpa na pahno thlâh ha taraw ma? A taw nah ngiachhie amâ chhi kaw he zaw!” thlai tahpâ lymâ ta. Mohropazy chhao chata “Kha he?” tahpa ta vaw mohpasia lymâ ei ta, “Aw! A châ tlai he maw..a taw a chhi ngâpa tlai a châ he..a sâhpi chhao a tlia pha kaw hih..a taw cha hâta ei kha ei nota uhtheipa a châ hih..ngiachhie â chhih dâh cha la..” tah chyu hra ei ta.

Cha hawhta a mohnao kawpa Dôthâ ta Biekhâ a tahpa cha a pachâdâh châ tiarâh leipa ta, “Dôthâ, cha tah zua eina tah hra chi! Ei khoh khiah ei ka tlai! A taw cha taw hrawh chhao rai tlai â chhi aw..râhsa cha eima nie awpa vei mâ? Ei sakhih kapa ma na hiatlia ma? Cha tah cha zua eina tah chi..khâhma vaw reih khâ..he su liana heta nâmo zy hawhpa châta bierei theina hnei vei ei chi..avaw hnei..!” tahpa ta hiehâh kawpa ta Dôthâ cha a Meithei ta vaw nâpâ ta thlai avaw duahkhâh ta.

Dôthâ cha dua khoh tiarâh leipa ta, “Eeeee! Pasaihpha nâ tah hra vei mâ! Sakhih taw a chhi ngâpa chô liata mâ na pasaihphana cha na palâsa aw!? Na riahpha kaw khiahta cha he hlâta râhsa lai viapa nata a hrâ via awpazy ka châh chi!” tahpa ta hiehâhna mopadei chhaota Biekhâ cha a kaw tawpâ thlâh ha bâ hra. Mohropa zydua chhao chata Biekhâ cha thai pachâ vei ei; anodeikua, khâpa hmahta reih ngâhpa y vei ei..

            Biekhâ he ama hryta uhthei via chaipa a châpa vâta ahy hmahta a bie ei ngâh leipa ei ta. Anodeikua, cha hawhta Dôthâ ta riahpha kawpa ta â duapâ ngâhpa cha khâpa ma vaw tlô aw, tahpa ama mokhâh khai thlâh ha bâ.

            Biekhâ cha a hmi tawhta a hiehâh hmeiseih tahpa â lâ thlâh ha ta. A Meithei chaba leina lâ ku cha chahupa ta, Dôthâ cha mohnao hmi kawpa ta hmiadaisa ta tawpâpa ta, “Avaw hnei molo thlâh ha tyh. Nâ he ahy I nata awh ma na châ? Ei sa kapa liatazy nâ vaw chahraoh? Sakhi tawzy cha nâma hawhta tlâ ama châ bâ hra cha aw!!” tahpa ta pahneipâna chôta thyuhnao â chhuahpa ta a ku a ka hy haw.

            Dôthâ chata a Meithei cha a lei liata za thypa ta, a ku cha chahupa ta, taorâh a tawpâ thlâh ha bâ hra.

            Biekhâ chata, “Nâ hâra thorapa tlai chi ta eina thyuhnao hra chi…” tahpa ta â  awpa âvaw zaw hnaopa cha Dôthâ chata vaw dôveipa ta, a hnôhkyh lâna chata Dôthâ cha â khu lâta a kei pao thlâh haw. Thlai vaw thyupa ta a bâh pakai khaipa avaw zawhnao heihpa cha Dôthâ chata bâhta avaw pasiepa ta a py liata za riepa ta, alei liana chata za taikhy ta.

Dôthâ chata, “Hâra thorapa eina tah hra chi ma châ? He hâra thorapa na tahpa, na mohnao kawpa, laiphô chôna liata haipa bie hmâpa ta noh nah tlâh ta na zawpa kei Dôthâ heta ei cha thie ha tua aw!” tahpa ta Biekhâ chai a riena cha pathlie hlei leipa ta kaw thyukheipa ta, kaw chalopa ta, alei liana chata a tha zydua hmâpa ta tapôh za taikhy heih ta. Biekhâ cha cha hawhta ama taikhyna liata alei nahta â zâ pazeina liana chata thyu thei khao leipa ta Alei liana chata â diepa ta, â rôh ngâthlâh ha bâ.

Mohropazy chata Dôthâ chata a thie tlamaw thlâh ha aw, tahpa ama chi hapa ma a châ ma, Dôthâ ta cha hawhta Biekhâ â thy thlâh hapa za thyuhnao heih awpa âchhuahpa cha vaw pakhâpa ta, “Â daih bâ sâ Dôthâ. Cha pahnie vei khaw” vaw tah para ei ta.

Dôthâ chata Biekhâ cha za mohpa ta, “Na khoh via ma? He hârapa ku he na tao khoh via ma?” za tah ta, Biekhâ chata, “Nâ ngiathai…Dôthâ nâ ngiathai” tahpa ta a cha-ao pua pua khai hapa ta ngiathaina a kaw haw haw ta. Dôthâ cha thlai a duahpa ta, Biekhâ cha pathyu achhuahpa ta a ku za pie ta. Dôthâ cha a hmia a chahupa ta, â die thlâh haw. Ano khota a thyu thei khao leipa vâta mohropazy chata vaw pathyupa ta, chhy laihna chôta riebu ngaipa ta a di haw ei ta.

            Cha zâ liana chata riebu ziza cha phie dia thlâh ha ta. Cha nohta hmotlôpa chata ama ziza pua a parao khai ha. Anodeikua, Biekhâ thaipachâpa rai y vei ei.

            Pati zy liahsa niepa ta, mei patihpa ta amâ tyu nonazy chata Biekhâ cha khâchâ a khu ha ta. Dôthâ deikua Vâchai kiah liata atyuhpa ta, a hmia liata khâpa ma a pachâ tahpa pahno theipa châ vei.

            Cha hawhta ziza a hri kawpa ta ama y hlâ nona chata ama hryta bielôhawh rei awpa pahno kawpa, paw a phawhlaw kawpa, Tlualai chata, “Mylâ noh vaw chhi bâ sala aw! Sapi salaipa tlahnao ta, ka awpa eina pahla bâ cha ly” kaw tah ta. Cha patawnah ta mohropazy chhao chata bie vaw reih pazao pâ lymâ ha hra ei ta.

            Biekhâ châta deikua cha zâ cha maophyuhna, duachhie ta a duana â pahnopasiana zâ châ ta. A viasanah hmia dâhdei chhao kha khao leipa he alyu kaw. A viasapaw hlâta a tuapahaipahipa alyu viapa, Zaka nahta a kâ chai liana chata a ziapa ta amâ chalih thlâh ha.

Châhrasala, Biekhâ zy hawhpa he cha, khatluta noza hmiachhiena ama taopa chhaota, ama hrozie ro pyly lei awpa chyhsa châ ei ta. Tlao ama paru via ha tyh, tah awpa chi kha ama châ. Dôthâ chô liata khâpa ma a patlôsa aw, tahpa rai pahno awpa châ vei.

            Cha zâ cha lôhpahâh lei kawpa ta hmâh khai awpa ta a mô a chhuah pathao ei ta. Nohchhôh lâta ama vaw sienazy â hlapâ, ama riezy vaw theipâ a tah hapa hnaihta pahnawhpâ lymâ ha ei ta.

            Dôthâ deikua a mô thei vei. Biekhâ chôta â pielyuna dâh cha kyhkha lâta a palôh a tlâh kaw nota, âvaw lie heih awpa cha khâpa ma châ heih aw?tahpa pachâna za hnei leithei leipa ta. Biekhâ zy hawhpa heta cha chyhsa amâ iekhyh hapa, khâchâ ama mohnao hapa he cha pa-ysa molo vei ei, tahpa a pahno thlâh ha. He vâna heta, râhhmâh liata â hrohrua kaw awpa â ngiah aw, tahpa cha a palôh liata a pahno thlâh hapa a châ.

            Cha hawhta nohchhôh lâta ama Biekhâ nahta amâ tahna dâh a pachâpazi ngâpa cha â theihlô lei chhôhta avaw mô ha ta. Â vaw môpa cha ama vaw sie awpa zâ ta a mâ pyly kha a hmô ha heih.     

Atazâ ta a mâ deikua bâhta â nano via ha. Ha meih a chhohpa hryta Ngôki ao thei ta, kei paza awpa ta a bâ a kei pazaw khai tawhna khata, Ngôki ao vaw puana lâ tawhna chata thisaih he vaw loh chaimâh ta, ano cha thisaih ta pua vaw dâ khai ha ta. Cha hawhta thisaih ta a pôh zydua a dâ khai hapa cha eikhpina ta china ta vaw patupa ta, meih a chhohpa cha a râsaipa a chhuahpa ta â pahiehpa â chhuahpa cha alô he a chapia ta, laikathi lâ a hluah ta. Cha hawhta â hluahpa cha eikhapi ta lôkâ liana heta za tla ta. Cha hawhta lôkâ liata a tlapa â chahipa cha a kaw hra haw ta.

A mo a kaw padeihpa cha Vâchai heta vaw chalyu ngâkaw ta. A mâ sapa vâta âvaw tliehpa he vaw châ ta. Cha cha a kiah liata a ziapa Vâchai chata athata vaw chalyupa ta, vaw pahra a chhuahpa ta avaw aw ngâpa he vaw châ ta. A mo a kaw padeihpa cha a pôhpa cha a mathlai saita avaw bie thlâh ha.

Vâchai chata, “Unawh, khâpa mâchhiepa rimâ ma na sa haw? Athata a kaw tlieh chi ta, na reihchamaoh ngâkaw bao…Ngôki mohzy kaw reihpapua chi ta” thlai vaw tah ta. Dôthâ chata, “Unawh, eima vaw sie chyta ei mâ pyly khana ei sa heih. Bâhta â nano via, tah leipa ta la phie phieh â lyu” tahpa ta a kaw tyuhpapua ta. A mâ cha pachâpazi leithei vei.

(Bo-8-na thlai eima vaw post heih aw..)