Satliana châta : NA KHONÔ KIAH LIATA BIE NA REI RAI RAI LEI AWPA ZY!
Na khonô kiahpâh liata na rei leipa awpa – anodeikua atahmã nota na khonô nahta namâ vaw pazi parei kaw bâ deikua khiahta rei awpa nata rei lei awpa la na pahno kaw bâ thei ngyu aw.
Anodeikua cha chata na khonô na pahnopasia kaw tahna deikua dy hlei vei.
Vâ-ia/khonô zy kiah liata khâpa ma rei awpa tahpa hlâta, khãpa ma rei lei awpa tahpa he a hluh via thlyu aw. Kheihawhpa hmo rai, a daihti nata su do leipa liata na reih tlamaw deikua khiahta la, "Chhâzaw châta mâpha sy!" tahpa tlyma, ruchhôna nata atyna dei a tlôkhei thei…
Chhôhso aly kawpa ta nata adyh kawpa ta na khonô nahta kyhpachã lyuhbie â hlã lymâ awpa na khoh khiahta la, ary liatapa he reih cheingei ma y!
NA KHONÔ KIAH LIATA NA REI RAI RAI LEI AWPAZY –
1.Ei 'ex' ta nãma hlâta saiso a khoh via :
Na khonô kiah liata la, na vâ-ianô parohpa ta saiso a khoh kawpa chhaota reih palâ rai kha y! Chanô ahy hmahta mohropazy nahta pakhopâpa he khoh leipa ei ta, na vâ-ianô parohpa nahta pakhopâpa chhochhi la, reih tua khâ! A hmia liata chabaipa tluta pasapa la a châ aw! Phuh a la cheingei aw. "Ei khonô parohpa la naw.." tahpa na reihpapua rai khiahta la, leikhaoh na chapao ha tahpa a pahno la. Phone call nata text a hnabeiseih khao leipa la, ahryuh awpa ta a mâ thlâh ha tyh.
2.Na thawh dâh châ!
He bie he reih papua rai kha y. Masiah hawhta avaw hripa ta avaw thawh hapa chhaota, reihpapuapa ta, na pahneih awpa chã vei. Reikah hropa, â ngia viapa ta reina dãh a y aw! Anodeikua ‘Na thawh bâ dâh châ!’ tah rai kha y. A cha zotlapa dei châ leipa ta, nohchareihta na thai leina a tlua ngâthlâh ha bâ aw.
3. Na viasanô khaw a hmipha dáh!
He chhochhi…rei tlamaw awpa chhao chi â chhih. Chyhsa palysa khohna vâta nata a viasanô cha sietanô hawhta na hmôpa vâta a reihpa chhao rai châ la…a paropa ta la rie reih kha y. Ano ta cha "Cha ta mâ! Tlai chuh!" tahpa ta pahneina chôta a cha chyh-eih thei ngyu aw! Châhrasala, a pahno ngâthlâh hana byh liata khâchâ khô ta, na aina taihta a cha reithlu ngâthlâh ha tyh aw. Na khonô khata a cha khoh kawpa vâta a hiatlia kaw tahpa pahno thlâh ha ma y. "A chhie lei dâh chy!" na tah chhochhi khiahta la, na châta nohphapa chhi khao aw vei! Leikhaoh na chapao ha!
4. "Dao, buakha ta, ei cha vaw call sy" :
He chhao he reih beih kha y. "Dao" tahpa pahlaona chôta chhochhi. Na rai lâlao kawpa tlyma, daihti peimawh chaimâhpa tlyma nâ hmâ haipa zy a châ lei khiahta la naw! "Ei cha vaw call aw" tahpa bie raita achhy khâ. Hriena su lâ la na tla aw!
Khi zy khi na khonô kiahpâh liata rei lei awpa a châ nota, nama likah liata a tah thaileina avaw tlô tlamaw ha khiahta deikuala, reikah naizualuahpa, palôh zydua ta ei kha apyhpahlypa nata hmosaipiepa hmâpa ta nâmâ lâ nâ kei pakhua heih thei, tahpa deikua my kha y!!
