Article : Awnanopa nata Reih chôchâh pyly
 |
| By HC Malsawmthanga |
Eima awnanopa liata reih hropa ama ypa chhyhthai leipa hawhta miah 'charge' khao kh'u. Ahrupa châ ma pi, ama 'right' eima pahnokhei thai.
Eima rei khoh ha tyhpa deikua a y. Vaih/khih thokha liata Mara Service â dua leipa he a châ. Dadieh pi ta, chyh viapa châ pi ta, taikhy rainao viapa eima châ. Pho hropa nahta apahlao pi ta, keimo ta eima reih pathaisa cha a hnia vei; âmo reih cha eima saw nata samohzy ta thlai ahly ei ta, nô nata paw thokhazy ta pachhapapua thei khao ma pi!
He vâ heta, vaih/khih to liata Mara Service he aduah khai thei sala...tahpa khona bie eima reih tyh. Pho hropa reih ahmâhpazy he Mara Service liata y ei sala, tah ma pi. Mara Service padua eima khohpa heta, pho hropa reih ahmâhpa/ahlypazy he eima awnanopa tawhta pua ha ei sala, tahpa khona nata palôh hnei hra ma pi.
He hawhpa khopasana eima rei pataw nahta, Chakeibarôhneipa nodi dâhphipa, pakah â thlâh hapa hawhta bie a sahna zie ta maniah abyh thlâh hapa ama y ha tyh. Reih hropa service â dua awpa ahy hmahta pakhâ achhuah beih ma pi; eima râh liata eima reih service padua â ngiahna nata peimawhna eima rei nahta tlao rairuna nata â lie lâta kholeina reikah tlao eima dao hluh haw. Ei no a âh kaw.
Awnanopa pachhaih awpa khona bie eima reih tlâ ma? Khazia Awnanopa pachhaih ta, patlaw awpa khoh kawpa hawhta miah reih ei chi ta, reih hropa service liata y molo thlâh hapazy palôh pathyu n'awpazie nata pasa nawpa zie ta tlao â lie lâta bie nama reih tyh? Hmeiseih ta la awnanopa keichheihtheina ziza khochhih leipazy vaw pua pathlei sala, a maoh nama phaoh thlyu hra aw!! Khazia bie sahna zie nata âmo chhyhthai leipa hawhta miah nama rei tyh...
Âmo buakhei leipa pi ta, keimo na tlâ eimâ saihei bao...
"Awnanopa liata cha chi to reih to eimâ tlôh khai," eima tah tyh; â do rai châ. Ahy ta e, "Eimâ tlôh awpa châ vei," tah pi? Eima pahno thlâh hra cha ma. Awnanopa Spirit nata achhuahpa patu lei kawpa hawhta miah nama rei tyhpazy he eima palôh a pasa kaw tyh hra mâmyh.
"Âpa-feeling-sa kawpa, reih kyh apachâsa kawpa, hriapasa âtah kawpa, influence hnei tlôh leipa, dedaw dedaw tah laih tyhpa...," ama tah tyhpa liata eina pahlao tyh tlai ei chi; ei pahno thlâh ha. Âpa-feeling-sa leipa pi ta, tlâ eima Feeling! Influence eima hnei nahta hnei lei lia bua ngâkaw byuh hra vei, eima hnei leipa chhaota pei hra vei. Eima palôh liata eima paveihpazy na tlâ eima reih laih hra bao..
Aizawl liata ei lahpi nata sawzy chhaota y pi ta, Mara Church lâ apakhykhei thei va na. He hawhpa lâchhâh ama rei nahta eina tahchakia tyhpa ei hawhta pachâ na ta, a ru lâta ei sah kaw tyh. Châhrasala, pachâ pazi na ta, "Ama rei awpa tlâ châ hra ta e," tah na ta, hâh chariehna chôta tlâ ei thlih tyh. Keima hawhpa duasu liata aduahpa nama y aw, mao v'ei chi ny. Nama rei ngâkaw khiahta la, "Ano nata ano ta â phuhryuh hi," tlao ama cha tah aw. Ama cha thua khoh via ngâkaw lah y!!
Moh bina chôchâh ama rei nahta chhochhi la naw...noza hmiachhiesaihpa ta ei y tyh! Châhrasala, reih pathlie khoh va na. Ama khopasana tlâ reih ei ta, ama rei awpa rai na a châ bao...tlâ ei tah tyh.
Ahy chipho rai ta ama reih nata chipho châna pabohsa khoh ei ta, ama rei awpa nata tao awpa ta ama pachâpa chyu reih ei ta, hmah ama la chyu. Ahao khah ei suh u, eima DUTY na a vaw châ rai ha!!
Chi hluh viapa nata pho lai viapazy nahta la rie apakhopâ khao khah ei suh u. Eima duahmo he 'MAW NATA CHHO' l'y tlâ châ! Phoso viapa nata hluh viapazy "Eima sydie aw, Diplomacy, Strategy, chata khata.." tahpa la naw, 'BIE LEIPA,' na tlâ a châ. Sydie achhuah pi ta, tlao miah ama palâ khai haw hih!
