I-DAY 2018 TROPHY : Siahatlâh FC nata FC College Vaih ama tlô

Siaha liata 1st Division Club zy ngâlâh a khaih theina, Independence Day Football Trophy 2018 cha atanoh tawhna khata pathaopa a châ.

Match hmiatua chaipa liata Siahatlâh FC ta 4 - 2 ta Meisatlâh FC pahniepa ta, match 2-na liata FC College Vaih ta 2-1 ta New Colony FC ama pahnie hra.

Akhaihna hmiatuapa liata â supa, Siahatlâh FC nata Meisatlãh FC zy he Siaha local football liata hniehnôh hneiphapa châ ei ta, amâ khaihpa chhao a mopha kaw.

Siahatlâh FC châta Lallungmuana ta goal 2 khôpa ta, Ramenga nata S.Calvin zy ta goal 1 rairie khô hrapa ta, Meisatlâh FC châta Rimmawia nata Hmangaiha zy ta ama khô hra.

Siahatlâh FC châta Zorammuana nata Lallungmuana a pakaoh pasu ei ta, Midfield liata Beichhie nata Ramenga mo ama pha kaw hra. Meisatlâh FC striker zy ta Siahatlâh FC defence pa-aw ru ama tah kaw.

Meisatlâh FC châta Dickson nata Samson zy chi a chhih kaw ei ta, anodeikua, Siahatlâh FC vâhneina noh a chã hapa bao hnaihta, 4-2 ta ama tlô haw.

Akhaihna ei 2-na liata Siaha Derby tah thei awpa, vaih a opapa, FC.College Vaih nata New Colony FC a hmiachhypa ta, Fc College Vaih ta 2 - 1 ta pahniena topa ta, FC College Vaih châta Johan Mandel ta goal 2 khôpa ta, New Colony FC goal kha he N.Hmasie khôpa a châ.