Article : MARA REIH NA ROH THAI KAW

Rev Dr Laiu Fachhai

Eikha cha paw pakha ta, “Mara reih na roh thai kaw” na tah ta, a ly awpa ma, noza awpa hri ma, vaw pahno khao va na. Mara reih cha ei reih châ ta, ei ro thai awpa cha noâh chhih awpa chi ta vaw rao beih leipa na ta.

A reina ao ki tawhta ei patupa cha, Chapi-Ngiaphia Mara reih a hmâhpa châ na ta, Tlôsai-Siaha Mara reih ei ro thai kaw thlâh hapa a rei khohpa  a châ chaipa ta â lâ.

He hawhpa palôh phao he a do leipa ta pha vei. Tlôsai-Siaha Mara reih, eima Mara official reih châta eima hmâpa he, ei reih dopa châ ta, ei reih a châ leipa hawhta a pachâ tlamawpa ama y khiah cha, ama pachâ chhei kaw aw. Tlôsai-Siaha Mara reih he, Mara reih châ ta, kei he Marapa châ na ta, chavâta he ei Mara reih he ei reih châ ta, he ei Mara reih he cheih aw na ta, ei roh lymâ aw.

Cha nota, he deikua he pahno awpa a pha. Marapasawzy pi he a kao nata a kâh ta eima reih hmâzie a chyhta ta ananopazy y hra sala, a sôpipa, a siezie nata a lozie â lyu khai. Chavâta Chapi-Ngiaphia Mara reih ei thai khiah cha, Tlôsai-Siaha Mara reih ei thai lei n’awpa y vei.

Chi hropa viasa thokha ta, “Mara reih he a chu khoh kaw taraw pi ta, nama reih he hluh tu ha ta, khâpa reih chaipa he ma eimâ chu aw, tahpa eima lalao haw” eina tah tyh ei. Kei ta, “Mara reih he hluh vei, reih kha deita na a y. Cha cha official ta eima hmâpa reih he a châ. He he namâ chu awpa Mara reih cha a châ” ei tah tyh ei.