PASTOR pakha vâta US ta Turkey a hrie
Aug 2, 2018(MSR): US chata Turkey sawhkhâ liata Cabinet, Interior Minister Suleyman Soylu nata Justice Minister Abdullahnit Gul zy cha North Carolina state tawhta Turkey liata missionary raihriapa ta kô 22 a y hapa, Pastor Andrew Brunson (50) patupa ta nata jail tawhta papua hmeiseih khoh leipa ta a pua n'awpa daihti ama pahawhpasâh ngâthlâh hapa vâta, hriena a chaluah haw.
Andrew Brunson he Trump sawhkhâ chata papua awpa ta ei hluhpi ahawna tao ha ta, âhnaw ta amâ vaw hnaw tyh hra. Turkey sawhkhâ President Recep Tayyip Erdogan sawhkhâ chata, “Sawhkhâ adyuhtuhpazy baotuhpa nata sawhkhâ pazaw achhuahtuhpa” tahpa ta kô 2 daihmâ jail liata khôpa ta, atliata liana khata kô 25 â tâh awpa ta a chôchâh ama pachia heih.
US President Trump chata a pasa kawpa ta Turkey sawhkhâ cha tahpa ta, “Peihrialeipa, krizyh pha kawpa Andrew Brunson cha papua para awpa ta” Turkey President Erdogan dycharao ta, he khai tawhna heta Turkey sawhkhâ chata Andrew Brunson cha jail tawhta lapapuapa ta, “house arrest” ta ama patãh heih.
Turkey sawhkhâ heta Fatullah Gulen, Muslim theihthaipa US lâta a râ haipa cha patu awpa ama khohpa vâta, “a rina awpa ta” Pastor Andrew Brunson he hmâ amâ chhuahpa hawhta reih ei ta; he he US Sawhkhâ pachâdâh deikua a chã lei kaw.
President Trump chata, “Krizyh rônah kawpa Andrew Brunson heta a tao hluh tu ha bâ, papuapa a châ lei khiahta la, Turkey chô liana heta hriena laipa eima chaluah aw” tahpa ta biesakâ avaw vaw hapa a châ.
