Article : KRISMAS BIETAPA - BY Rev Dr Laiu Fachhai

KRISMAS ARYHNA

Khizaw Adyuhpi Eikhana liana kha pheisaih nata civil chyhsa a thipa maluh zydua lakh 400 (million 40) hlei ama tlohpa hawhta reipa châ ta, Adyuhpi Einona liata cha chyhsa lakh 600 (60 million) hlei ama thipa hawhta reipa a châ. A rarôh y hmeiseih. Khizaw Adyuhpi eithôhna vaw tlô tlamaw mawh sala, Adyuhpi Einona liatapa hlâta khizaw chyhsa ama thi hluh via heih na ta pangiasapa a châ. Chavâta Adyuhpi eithôhna a tlô tlamaw lei n’awpa ta teina to rai ta tei ta, hria awpa cha khizaw râh zydua a pazaopakhyna py United Nations raihria tôhpi chaipa a châ.

Adyuhpi Eikhana kha kô 1914 Khihpa thlâpâ liata a thao ta, 1918 Phiapi liata a chhâ. Hiakha lâta United Kingdom, France, Russia, Belgium, Italy, Serbia, Japan, Greece, Romania, Montenegro nata Portugal zy y ei ta, hiakha lâta German Empire, the Austro-Hungarian Empire, the Ottoman Empire nata Bulgaria zy y ei ta, thata amâ dyuh. Amâ dyuhna chhâpa lai chaipa cha râh pakawh awpa a châ thlyu aw. Kô 1914 Khihpa tawhta amâ dyuh pathaopa cha ru via lymâ ta, Krismas ta a vaw pachhai pâ ha ei. Pheisaih hluhpi cha ama chhôhkha hnohta Mâsih hmâ awpa ta ama khih lâ tlô thei khao veih ei.

Mongyuh râh lâ cha mylâ Mâsih a châ aw tah zâ (Christmas Eve), Di thlâpâ noh 24 zâ he pasô chai ei ta, ama palôh â lie chai zâ châ ta, palôlie ngaitapa nata aly ngaitapa ta Mâsih hla (Christmas Carol) sa ei ta, amâ hmâ zâ a châ tyh. Adyuhpi Eikhana liata a dyuh ngâpa pheisaihzy chhao kha, 1914 Di thlâpâ noh 24 zâ ama tlôpa cha ama palôh a lie ngâsâ thlâh ha ta, chatanachata notla lâ (western front) liata a dyuh ngâpa British nata Belgium nata France pheisaihzy ta amâ byuna leihlai tawhta “Zâ sidiah, zâ pathaih” tahpa Mâsih hla kaw sa pathao ei ta, cha cha German pheisaihzy ta a vaw ei ei ta, “Ngâchhih penawh saih u, Thapha ngaitapa ta …” tahpa nata Mâsih hla hropazy sa via lymâ ei ta, amâ byuna leihlai tawhta kaw pua chyu ei ta, a dyuh ngâpa pheisaih sâh hluhpizy cha Di noh 24 zâ nata Mâsih noh Di noh 25 noh cha aryna taopa ta, a ka khao mâh leipa ta Mâsih ama hmâ khoh ha hri. Rônah ta noâh â chhih ngaita. Ama râh ryureituhpazy khata pheisaihzy hawhta palôh vaw phaoh ha hra ei sala cha, kha 1914 Mâsih noh kha Adyuhpi Eikhana kha a chhâ pâ ha taraw aw. Châhrasala râh ryureituhpazy kho hlei kho tuna vâta Mâsih khai tawhta cha ama leihlai chyu lâta pangai heih ei ta, kô pangawh daihmâ tlai a dyuh pazi ei ta, chyhsa rei tiah lei hrona chhao a lei hapa kha a châ. He hmo he lyupa ta, ECM nata CCIM likah apôhkhana kyh liana chhao he zawpi ta a pôhkha awpa ama kho kaw bâ nota, chhituhpazy vâta hmahta a pôhkha thei leipa ta y thlâh ha heih lah pi tahpa pachâna thata eina pie tyh.

Kô 1914 liata â ka ngâpa chariahzy ta Mâsih daihti chhôh ta amâ dyh theipa kha, buakha adyna rai cha châ sala, kha hmo a ypa khata Dyna Beipa vâta nata liata cha a dyh thei lei awpa chariahpa nata khakhaipa y leipa ei ta, a dyh thei lei n’awpa taihta bie rupa nata hmozy a y leizie pakhona châta hmâ tyhpa a châ.

Adyuhna hry liata ypa cha riethei thlahzo â chhih ngâsâ thlâh ha. Meithei nata chariah chhaichhi hropazy hmâpa ta eimâ dyuh ngâ kaw leipa chhao ta, ngiapâtuhpa dopa eima châ khiata cha, eima chhôhkha sanawh, opa lyuhri, kaolâh hrialâh nata khih kha râh kha zy nahta a chhohia pha tu leipa nata thlah chhâpa thei leipa eima hneipa chhao riethei â chhih ngâsâ hra. Kao kha lâ tawhta cha chariahpa a ngiathaipa hlâ chhaota chhôhkha sanawh, opa lyuhri nata kaolâh hrialâh zy a ngiathaipa a ru viana a y tyh. Adyryhpa cha adyryh leipa hlâta a pha via. Chyhsa to nahta adyryh kawpa ta ypa cha thlalôh â chhih ngaita. Chavâta adyna he rai pahriasa lymâ sih la (chance pie lymâ sih la), atakô 2018 Mâsih liana chhao he, vâmo hla paryhpa, “Khazoh chônôchaipa hnohta rônahna y mawh sy, Alei chô liata ano a palysatuhpa chyhsa zydua hnohta adyna y mawh sy” (Luka 2:14) tahpa hla he paryh khei hra sih la, hmiahaopa nata khakhaipa zydua a ngiahthai khai sih la, thlah eima chhâpa thei leipa y tlâ khao lei awpa ta adyna nata aryna eima taona Mâsih daihti ta hmâ awpa ta, Mara râh nata su to liata a ypa Awnanopa zydua cha pasyu ei na ta, ei cha khohkhei ei.

Mission miakha ta a paduapa Mara râh Awnanopa ECM nata CCIM tahpa ta a vaw chhaih hapa chhao he eimâ pôhkha ha heih thei n’awpa ta atakô Mâsih liana heta Adyna Beipa lâ thlahchhâ sih la, apôhkhana chhaichhi châta ABEIPA ta maniah a hmâ awpa ta eimâ pasai khai awpa nata a hlâ awpa ta Mara râh liata Awnanopazy cha pasyu ei na ta, ei cha khokhei ei. Eima Beipa Zisu Krista ta, “Aryna taotuhpazy cha ama nohlao na, Khazohpa saw bipata ama châ awpa vâta,” (Mathai 5:9) a tahpa hawhta, aryna a taotuhpa Khazohpa saw châ sih la, Khazohpa saw eima châpa vâta aryna tao awpa cha eima chakaona peimawh chaipa sâkha ta hmâh lymâ ei suh u. ECM nata CCIM likah liata apôhkhana tao awpa heta khôtho lâ tawhta maniah kaw taopa thai aw veih ei. Apôhkhana a tao awpa he ahy hropa châ leipa ei ta, keimo ECM nata CCIM zy tlai he eima châ. Keimo ta apôhkhna eima khoh khiata cha apôhkhana y aw ta, eima khoh vei khiata cha apôhkhana y aw vei tahpa a theina chôta, Mara râh Awnanopa he â pôhkha ha heih thei n’awpa ta hria via sih la, thlahchhâ ei suh u.

Atahmâ lâta ei SES Bie nata Hla liata cha, Mara râh Awnanopa apôhkhana châta thlahchhâna hlaphôh ei phipa heta pachhâsa sa la, â hmie chai thlyu aw.

I

(Khazohpa Achhyna)

Hy Khazohpa, Paw Khazohpa,
Sawchapawpa, Thlahpa Pathaih,
Pathôh pôhkha Khazohpa y;
Na pathaihna, adona zy,
Na kyhpachâ, ngiachhiena zy,
Na zawngiahna, ngiathaina zy,
Na siana nah ngâchhihna vâ,
Châ naoh pi ta, eima châ chhy.
Na pachhana hmosai sôh vâ,
Chhâzaw hrona to thei pi ta,
Na vâ byhnâ rei tiah lei vâ,
Na moh reithai ta y mawh sy!

II

(Molei palâhâhna nata ngiathai ahawna)

Hy ngiahthaituh Khazoh pha y;
Tlôsaih a nô, Tlôsaih a paw,
Vaili a nô, Vaili a paw,
Mongyuh râh tawh na lyuhchâzy,
Hriapasana thlaohchhi chi ta,
Mara râh zoh a vaw khaih haw.
Châsa na moh a phaohtuhpa,
Mara râh lia py pathaih lia,
Achhaih azaohna vaw y ta;
Nô kha paw kha sawzy tlai cha,
A tei pi ta, eimâ thy laih;
Rie ta miah ngiahthai ha mah y!

III

(Alyna biereina)

Hy Bei Zisu, Dyna Beipa,
Lei nata vâ biehneituh y;
Mara râh lia Awnanopa,
Pôhkhana châ thlah na chhâ vâ,
Alyna bie eima cha hlâ.
Achhaihna he khizaw châ ta,
Apôhkhana vârâh a châ,
Pahnopa ta, pôhkhana châ,
A pasaih ta, a ky ngâhpa,
Ngiapatuh pha Mara râh lia,
Thy sâh hluhpi na hnei vâta,
Alyna bie eima cha hlâ.

IV

(Hiana)

Hy Khazohpa, miah baotuhpa,
Mara râh lia Bei chaipa y;
Na photly saw Mara phopi,
Chhâ zydua châ kaw saipa ta;
Na paduapa Awnanopa,
Chhichâna do pachâpa ta;
Phie a pôhkha a byuhzie zy,
Thlahpa hro lia pathieh heih la;
Nôu a tlu tlâ khao lei ta,
Misawnâri miah hro lâh chy,
Vaili thlâkhaoh â ngia hlâta,
Saih-ly miah pati ha mah y!

Mara râh nata su to liata ngiapâtuhpazy thaphapa nata palôtlâhpa ta 2018 Mâsih hmâh chyu u la, 2019 Kô Thiehpa ta nama chhôhkha chô liata nata râh châta byhnâ hluhpi vaw tlôkhei sala, Dyna Beipa vâta khizaw râh to liata adyryhna nata thlalôhhna charei mawh sy!

Laiu Fachhai
Senior Executive Secretary
Evangelical Church of Maraland