Bethlehe pangaina lâpi mianopazy - By REV NC VABEILUA
"Chatawhcha mietakuvaihtuhpazy chata ama hnohta chhopa hawh tlaita, hmôpa ta ama pahnopa vâta, Khazohpa reithaina chôta kua ha ei ta", Luka:2:20.
Khizaw pachhatuhpa vaw pihpa cha, valyuchâpa reipa hawhta moto, dyhchhie hneirohpa, a thai a sopa nata thaina sona a hnei leipazy châ chhao a châ hra tahpa â lâpasia nawpa ta, dyhchhiepa, thaina sona a hnei leipa mietakuvaihtuhpazy nata a hneirôhpa, thaina sona a hneipa nochhi chyhsa sopazy pahnosapa ama châ.
Nochhi chyhsa sopazy ta Bethlehe ama pangaina lâpi he pachâ tua sihla. Su hlapapi tawhta âvypa châ ei ta, Khazohpa chhihthana awhsi zi ei ta, Zerusale taihta pavia veih ei. Zerusale tawhta Bethlehe (Ephratha) he cha me 6 deita a châ. Krista pihna su Bethlehe tlô chy taih pavia veih ei. Anodeikua Khazohpa pahnosana zi khao leipa ta ama thaina nata sona hmâh ei ta, Zuzy Beipa cha Herawda châ ta, a pahno thlâh ha aw tahpa pachâ ei ta, Herawda ochhôh amâ ngia haw!!!
Mathai2::8 na kha reih la, Zerusale tawhta ama vaw siepa kha cha Herawda pasaina nata tuapa ta kha siepa ama châ ha bâ! Zisu thatih achu ta Herawda hnoh report pangia awpa ta Herawda agent ama vaw châ haw.
Bethlehe cha tlô eita hmosaipiepazy pie ei ta, ama rah/khih la kua ama chhuah. He liata pachâ awpa peimawh ngaitapa a y. "Ama mâ ta Herawda lâ kua lei awpata chhopa ama châ". He yzie cha nochhi chyhsa sopazy ta Bethlehe ama pangaina he a chhih chanei tlâh châ vei tahna a châ. Lâpi hropa a chhih awpa ta chhopa ama châ!
Keimo chhao Christmas or Bethlehe pangaipata lâpi eimâ chhihpa he duah moh pasia tua suh u. January tawhta eima vaw pangai pathao no cha eima pavia leipa chhao a châ thei. Atahma cha Christmas liahsa a vaw hnia ha pita, eima palôhzy he a pavia pathao ma duah a saipalie tua suh u. Nôpawzy ta eima sawzy chysia rahvo nata sôh nata thih pachâna liata eima pavia pathlei ma? Keimo palohrupa, Krista pi nawhpa he parua leipa ta hmo hropa ta eima pabie pathlei ma?
Awnanopa chhihthatuhpazy chhao Christmas kyhchhina sahroh awhvapa pachâna nata programme buakheina liata eima palôhzy parua leipa ta eima y pathlei mâ? Thlahpa lâ niedo awpa pachâ leipa ta sapa lâ niedo pachâna liata eima bua tu pathlei mâ?
Satlia laihsa saih u, Bethlehe he Herawda pasaina ta eima pangai pathlei thei. Kô khazie ma kyhchhina nata chysia thiehpa ta Christmas he vaw hmâh ha pita, eima thlahpa ta â thôhkhei ma duah pachâ tua suh u. Nochhi chyhsa sopazy Bethlehe ama pangaina he a chhih chanei tlâh châ vei. Christmas na pangai tyhna lâpi kha a chhih chanei tlâh a châ ma, pachâ pasia mah y. Christmas hmiatuachaipa liata nochhi chyhsa sopa pathôh (3) ta pavia ei ta, a theilâpa cha Zudia District liata chapaw hawti kô 2 tawta rylâ thina a tlôkhei. A rarôh-y ngasa. Eima râh thyutliazy ta Christmas daihti nota lâpi pavia sihla khatlu raona a tlôkhei aw. Daihti khô chiehpa liata cha a pihmâh leipa taih thina tlôkhei ta, chapaw dei châ leipa ta chano hawsaih thina taih a tlô. Zudia râh liata hmo a tlôpa hlâta eima râh liata hmo a tlôpa he a rarôh-y via syulyu.
Niedona, sahhma nata laihsa chhaota na hmâh heih ma? Abeipa bie he nahthlie ma y: "Pheisaihzy Abeipa chata heta na he a tah, nama lâpizy cha pakhâtata moh teh u", Hakai 1:5,7. Eima lâpizy cha pasiapa ta pakhatata moh ei sihla, ABEIPA lâ a heih ei suh u", Chaphôhtuna:3:40.
Na Bethlehe pangaina lâpi kha moh pasia mah y. Sahpa nata thlahpa thina lâpi a châ pathlei thei. Kha lâpi liata na chhih nota Abeipa na palysa thei ma, alyna chôta na reithai thei ma? A chhih chanei tlâh a châ lei khiah vaw kua la, lâpi dopa a chhih ha ma y.
A sanona liata cha dyhchhiepa, thaina, sona ahnei leipa mietakuvaihtuhpazy ta Bethlehe ama pangaina lâpi he duah moh heih tua suh u. Rahmâh liata a riepa châ ei ta, hawsaih present awpa chhao hnei veih ei. Ama ngai chhao a si hmâ veih ei. Sunday dress (Abeipa noh chysia) chhao hnei veih ei. Valyuhchâpa ta moto châ thatihpha a chhopa ei ama theipa nata reina hnei leipa ta Bethlehe lâ sie amâ chhuah. Cha a rôhnah thei dâh cha! Reina hnei khoh ei sala, reina pha kawpa ama hnei hôlô aw.
1. Zâ châta khidei tawh tla sie lava pi ama tah thei.
2. Noh ykha mietaku vaih pita eima khaoba tu.
3. Eima ngai a si hmâ ma pi. Davi khihpi lâ sie awpa a ryh thai vei.
4. Raihriana chysia ta Bethlehe khihpi lâ siepa cha aryh thai vei.
5. Chyhsa mietakupazy vaih pita, chavyh, chakeih-barohhneipazy ta ama vaw sie pathlei aw. Zâ daihti châta, moleipazy ta ama paru pathlei aw.
6. Thokha y sihla, thokha sie ula, nama vaw tlô tita, keimo eima sie hra aw.
7. Hawsaih kei moh sihla present awpa hnei ma pi.
He a chô liatapazy he reina hnei nawpa ta âryh kawpa sai a châ. Chahrasala reina hnei veih ei. Biehrai kha reih la, dusawta sie veih ei, thlai ama sie (Luka:2:15). Valyuhchâpa biereipa cha ado dolei pasia pahlia a chhuah veih ei. Reingiah ngasapa ta ama châta pachhatuhpa apihpa mo awpa ta ama sie.
Bethlehe ama pangai no cha, palohpasah leipa ta, pyury chhao hnei leipa ta ama siepa a châ thlyu aw. Anodeikua ama vaw kuana la he pachâ tua, "KHAZOHPA REITHAINA CHÔTA AMA KUA". HALELUIA, Abeipa cha reithaina chôta y se! Mietakuvaihtuhpazy ta Bethlehe ama pangaina lâpi he a chhih chanei tlâh a châ. Bethlehe lâ ama sie nawpa daihti kha âmo châta a ryhpaoh ngasa vei tahpa cha khizaw chyhsa zydua ta eimâ pykhei aw. Chahrasala reina (excuse) tao veih ei.
Khihsatôhtuna liata dyhchhiepa, thaina sona a hnei leipa châ hra ei sala, ama lâpi â chhihpa â dopa vata Khazohpa reithaina chôta ama vaw kua. Khazohpa bie hawhta ama hrohpa vâta, ama mietaku vaihpazy chhao rairuna amâ tyhpa pahno khao ma pi. Nâma nata keima he Mietakuvaihtuhpazy hlâ ta cha eima duasu he â ryhpaoh via la he.
Kheihhawhpa lâpi ma eimâ chhih hai. December 25 tlô hlâta pasia suh u. Nochhi chyhsa sopazy kha Bethlehe ama vaw pangaina lâpi, Herawda O a chapiapa kha a chhih chanei heih ei sala ama châta chi â chhihpa a châpa vâta lâpi hropa a chhih awpa ta chhopa ama châ. Nama chhao kô khazie tlyma nâ vaw chhih tyhpa lâpi kha â do leipa vâta lâpi hropa a chhih awpa ta chhopa na châ. A chhih chanei tlâh a châ leipa khâchâ a chhih heih awpa nâ chhuah khiala, na sapa, palôhrupa, thlahpa raona nâ tyh thei tahpa ei cha chho. Â daih bâh la y. Mongyu nah ta "Enough is enough", ama tahpa hawhta kho ngaitapa na chho a parusa kha y. Adai ngasa ha bâ. Raona a cha tlô thlu hlâta Vârâh tawhta lâpi hropa achhih awpa ta zikyurâna he a papeisa mah y.
Nôpaw saih u, eima lâpi he Herawda O a chapia khiah mo pakha dei châ vei; chhôhkha dua ta raona a châ thei.
"Avy ula, ABEIPA lâ kua ei suh u,
Maniah a hrie chheih khai ha tarawpa ta
Maniah patlâ heih tlôh aw ta,
Maniah a tu ha tarawpa ta
Maniah chahry heih tlôh aw ta",
Hosia:6:1
Abeipa ta a reihtuhpa zydua châta byhnâ pie mawh sy. Amen.
No comments