Article : RA LORRAIN MOTHLIH TLANA SU : PAKAO - By Dr.SASA

Pakao cha RA Lorrain palôhru keichheipa ta thlah a chhâna su a châ, Pakao liana heta RA Lorrain, alô apahmaohpa zy chhao hmô theipa ta a y.

RA Lorrain mothlih tlana su he atanoh cha Marasaw hluhpi châta thlahchhâna supipa  avaw châ haw.

Pakao cha Tyulai Lôchhei khihpa, beinô chavah ngiahkâ liata a ypa by a châ. He su lia heta RA Lorrain cha Maraland apachhaih lei awpa ta athata reina hnei ta; châhrasala Maraland cha pachhaih bâ awpa ta bietluna avaw y hapa vâta RA Lorrain cha athata cha ta, a mothlih pathla ta, palôhru keichheipa ta thlahchhâna he su liana heta avaw hnei.

Kô 2008 liana khata Norway liata a ypa Puhpa Titu nata kei tlohlei kawpazy pi ta  athyupakhy pi ta, he su liana heta thlahchhâna o vaw sapa chá ta, Dawlei bia ta thazâh hluhpi ama vaw thyu.

2008, May thla liata East Maraland lâ tawhta Rev S.Lathai ( ex-executive Mission-MEC) nata Evan Ebi Zawtha nata Dawlei bia nôpaw zy avy ei ta; West Maraland lâ tawhta Machâ PP Thawla, Aizawl  nata Chapi bia nôpaw zy avypakhy ei ta, Pakao liata thlahchhâna o sapa cha pahyna programne a rônah kawpa ta hmâpa avaw châ. Kô 10 avaw sie ha hra.

Atakô 2018 cha MEC nata ECM Hqrs nôpaw zy paryhsapa ta Pakao liana heta he hlâta alai viapa thlahchhâna o nata thlahchhâpazy tlôna o zy sa awpa ta Rs 40 lakhs hlei budget taopa a châ hapa vâta aly â chhih hmeiseih.

He su he atahmâ cha Marasaw hluhpi palôhru keichheipa ta thlahchhâna supipa ta avaw châ ha bâ.

Marasaw zydua chhao Pakao he tlô ta, asu liana heta thlahchhâna hnei thei chyu awpa achhuah suh vy.

(Nohthlahpa zy he Pakao liata  RA Lorrain Mothlih tlana su nohthlahpa zy a châ)