Premier League : Old Trafford liata Liverpool ta Point 1 ama hlao papua

Liverpool ta Premier League chô chai liata a tyuh heih awpa ta amâ ngiah kawpa Point kha hlaopapuapa ta, Old Trafford liata player hmahphaohpa ama hluhpa vâta rairuna a tyh haipa, Manchester United nahta si â pie leipa ta amâ pahniethai.

Jurgen Klopp nata a nawhtazy châta cha amâ iekhy zôzawpa, Man United nahta a pahniethaipa ta point ama hlaopa he kyh kha lâta cha huhiehna za châ thei ta; Premier League nyungiapa paza awpa ta Man City nahta amâ râpasuana kyh liata he point kha he a sôh kaw thei aw.

Hmahphaohna vâta ama midfielder pathôh a hmâh thei leipa, United he ama Substitute zydua he akhaihna lia heta phie hmâh khai ei ta, amâ daih lei kaw.

Liverpool chhao he he akhaihna liana heta rairuna a tyh pyly ei ta, Roberto Firmino cha tlyliah liata minute 30 chhôh ngãlâh hmâh hmã ei ta, ano a hlao leipa ta cha Liverpool hmiatlâh ta hmotao thei muarua vei ei.

Klopp nawhtazy ta United kaovaihtuhpa David de Gea châta rairuna laipa patlôsa leipa ei ta, minute 90-na liata Firmino a thlatuhpa Daniel Sturridge ta â hlapãpa tawhta a za cha piepa deita cha yzie hneipa David de Gea ama tlahnaona hmô theipa a y chhôhpa tah thei awpa a chã.

United heta goal khô theina ryhpaohpa hnei ei ta, châhrasala Alisson vâhneina zâ chãpa ta, Lingard ta Romelu Lukaku tawhta ball a hmôpa a za chapiepa cha, Liverpool kaovaihtuhpa heta a pha kawpa ta avaw pakhâ.

Tlyliah hneituhpa United heta Liverpool defender Joel Matip ta Freekick tawhta ball avypa ama kao lã a pangia tlamawpa cha, Chris Smalling offside-pa vâta a pyhpa châ vei.

He hawhta a châ nona heta Liverpool pazituhpa Manchester City ta Carabao Cup final liata Chelsea pahniepa ta nyungiapa chalo ei ta; Premier League liata khaih 11 akhaih awpa kaw y bâpa liata Liverpool heta hmia amâ sah ha heih.

United cha 5-na lâ za y heih ei ta, Arsenal ta Southampton ama pahniepa vâta 4-na lia ama kaw y ha heih.

EPL TOP 15 :