Siaha District liata chapaw hlâta chanô Vote a hneipa 1055 ta ama hluh via

Siaha 23^rd  Hmypi : Zâhnia my dawh 11:00Am khata DC Conference Room, Siaha liata District Election Officer nata Siaha DC a châpa, Puhpa Bhupesh Chaudhary, IAS chata ‘Final Publication of Photo Electoral Roll’ a palâhâh.

Zâhnia ta E-Roll palâhâh hapa liana heta 39-Siaha Constituency ry liata Voters 21304 y ei ta, he hryta chanô Vote hneipa 11122 nata chapaw vote hneipa 10282 y hai ei ta. 40-Palâ Constituency ry liata Vote hneipa maluh 18218 ypa ta, chanô Voter 9167 nata chapaw vote hneipa 9051 ama y hai. Siaha District pôhpalôhpa liata Vote hneipa zie maluh cha 39522 châpa ta, he hryta 20289 cha chanô châpa ta, chapaw 19233 ama y hra. Siaha District chhôh liata chanô nata chapaw Vote a hneipazie a pahliena he (Voters’ sex ratio) he 1055 châpa ta, Vote pôhna he 1062 a châ.