INDIA Vs PAKISTAN : Ahy e Pheisaih nata Adyuhna chhaichhi hnei pha via?

India nata Pakistan he avaw dyuh hapa châ ei sala, khâpa e pheisaih thatlôna liata ama duasu châ rai tly? Duah pakho tua ei suh vy :

MILITARY BUDGETS

Kô 2018 khata India ta pheisaih tha patlôna châta Budget Rs 4 trillion ($58 billion) soh ta, he he India GDP tawhta 2.1% a châ, tahpa International Institute for Strategic Studies (IISS) chata a palâsa.

Kô 2018 py heta Pakistan  ta Pakistani Rs 1.26 trillion ($11 billion), Pakistan GDP tawhta 3.6% a soh hra. He hleikhôna heta râh hropa tawhta $100 million baona a hmô chhi.

Kô 1993 nata 2006 likah khata, Pakistan sawhkhâ ta sôh a hmãpa 20% cha pheisaih tha patlôna châta hmâpa a chânazie chata Stockholm International Peace Research Institute (SIPRI) a palâsa.

Pakistan heta kô 2017 chhôhta sawhkhâ sôh 16.7% cha pheisaih thapatlôna châta a hmâ, tahpa palâsapa a châ.

Pakistan ta sawhkhâ sôh pheisaih tha patlôna châta a hmâpa he India hlâta hluh via ta; kô 2017 chhôhta India ta sôh 9% pheisaih tha patlôna châta a hmâ nota, Pakistan ta cha 16.7% a hmâ tahpa SIPRI heta a palâsa hra.

MISSILES NATA NUCLEAR CHHAICHHI
India nata Pakistan heta nuclear phaoh theipa 'ballistic missiles' hnei rairie ei ta. India heta 'operational missiles' ama tahpa chi 9 - Agni-3 - 3,000 km (1,864 miles) tawhta 5,000 km (3,106 miles) a ka theipa â hlaopa ta a hnei, tahpa Center for Strategic and International Studies (CSIS), Washington, USA liata supipa a hneipa chata a palâsa.

Pakistan heta China baona ta taopa missile programme, 'mobile short' nata 'medium-range missile', India râh kheihawhpa su rai a ka phapa a hnei, tahpa CSIS ta palâsa ta. 'Shaheen 2' missile heta 2,000 km (1,242 miles) a ka thei.

Pakistan heta nuclear warhead 140 tawhta 150 hnei ta, India ta 130-140 a hnei, tahpa SIPRI ta a palâsa.

PHEISAIH/ARMY
India heta pheisaih 1.2 million hnei hai ta, he pheisaihzy baokhâ awpa heta adyuhna tank 3,565, adyuhna liata hmâpa chi ahluahtheipa 3,100, pheisaih palypalâna chhaichhi 336 nata meithei laipa nano nanopa 9,719 a hnei tahpa IISS ta a palâsa.

Pakistan heta pheisaih 560,000 hnei hai ta. Tank 2,496, pheisaih palypalâna ahluahtheipa 1,605 (armored personnel carriers), nata meithei laipa 4,472 (artillery guns) a hnei hleikhôta ano khota â kapapua theipa 375 (self-propelled howitzers) a hneipâ.

AIR FORCE
India heta Airforce pheisaih 127,200 nata adyuhna zawtheina 814 (combat aircraft), hnei taraw hrasala, zawtheina a hneipazy nata ziza tawhta adyuhna chhaichhi a hneipazy he pha tu muarua vei ei.

India defence ryraona liata cha adyuhna zawtheins squadron 42 (squadrons of jets) a ngiah ta, he he Pakistan nata China tlahnaona avaw dyuhpalie awpa zawtheina hropa 750 â ngiah via heih tahna a châ. Russia taopa MiG-21 uhthei kaw bãpa, kô 1960 rachhôh liata hmã pathaopazy cha thlaita amâ pahâ bâ awpa vâta India heta adyuhna zawtheina squadron 22 cha kô 2032 liata cha â ngiah ha bâ aw.

Pakistan heta zawtheina 425 (combat aircraft) hnei ta, he hry liana heta Chinese-taopa F-7PG nata American F-16 Fighting Falcon jets zy â hlao.

NAVY
India heta zawtheina phaoh theipa (aircraft carrier) balyh sãkha hnei ta, tirybalyh (submarines) 16, Destroyer 14, Frigate 13, Patrol (chahlôcha-eina) 106 nata adyuhna zawtheina 75 (combat capable aircraft) a hnei. Navy pheisaih 67,700 a hnei hra.

Pakistan he Navy liata cha thatlô tu leipa ta - Frigate 9, Tirybalyh 8, Patrol 17 nata adyuhna zawtheina 8 (combat capable aircraft) a hnei hra.

He hawhta a châ nona heta India he Global Fire Power Index 2018 liata khizaw pheisaih thatlôna lâ thliena liata 4-na châ hai ta, US, Russia, nata China pazipa ta pheisaih thatlôna lâta â sâh chaipa a châ hai. Pakistan he 17-na liata a y hai.

Pakistan nata India he avaw dyuh hmeiseih tlai ei sala, Nuclear a hneipa rairie hnaihta chi la amã chhih rairie kaw. Khizaw abohna châta ama likah buana he padia para awpa he khizaw râh nano nanopazy achhuahna a chã hai.