Champions League : Cristiano Ronaldo ta Juve châta hmo rônahpa a patlôsa

Zâkô Champions League Final liata Juve fans zy pachasatuhpa, Cristiano Ronaldo chata Juventus châta hmo rônahpa a patlôsa ha heih!

Cristiano Ronaldo ta a rônahna palâsa heihpa ta, Juventus ta a Hattrick hmâpa ta 1^st Leg liata 2-0 ta ama pahnie leipa, Atletico Madrid cha 2^nd Leg liata 3-0 ta pahniepa ta, Aggregate ta 3-2 ta pahniena topa ta Champions League Quarterfinals amâ ngia haw.

Turin zawpi zy ta nopi a pasiena daihti liata £99m ta Juve ta ama lapangiapa, Cristiano Ronaldo thaina nata theina no-âhchhih kawpa, khâ ama vaw hâdy kawpa cha zâhnia khata pahmôsapa ta y ei ta, Juventus tlyliah nata a chheihpâh cha ano palyupalihna reikah ta a bie!

Video moh khohpa chata : 

Cristiano Ronaldo heta zâhnia zâ ta a goal khôpa 3-pazy hryta goal 2 he a luhta a supangiapa châ ta, a goal 3-na he Penalty tawhta a khôpa a châ.

Zâhnia zâ ta Ronaldo ta a goal a khôpa he Champions League liata a goal 124-na châ ta, he ataopasuana level a sâh kawpa liana heta Hattrick ei 8 dua a tao ha hra tahna a châ. Daihti chhâ ta, Referee ta akhaihna a pachhâ sikhua tahpa ta tlyliah pyury cha akheih sahlao amâ vih ngâpa hawhta pyury pha ta, Juve Player-zy ta Ronaldo ama bylyupâ lymâ ha.

Kô 34-ta uhtheipa a châ ha hra bâpa Ronaldo chata, "Zâ ngiatlâh kawpa a châ aw eima tahpa hawh tlaita châ ta, ei goal khôpazy vâta dei châ leipa ta, Juventus player zydua palôh phaozie vâta a châ” a ta.

"He hawhpa palôh phaozie tlai he na Champions League liata la eimâ ngiah” tahpa ta Ronaldo chata, “He vâna hetana Juventus heta eina sydie kaw bao. Juve ta a tlô beih leipa hmo patlôsa awpa hih."a tah hra.