MCHP Aduana Noh Paper Present : TOPIC - TI NATA RÂH HMAHSIENA CHÂTA CHANÔZY MAOPHAOHNA* (saw sana kyh liata) - By N.Vabeiratlua

MADC ta Siaha District  Statistical Data,  30th Thlarâh, 2015 liata a papua pa lia cha Siaha District chhôh lia heta maluh 64,829 y pita, cha liata Marapa maluh zie cha  53,929 eima châ.

Eima population Density ( Sq.Km  1 chhôh a kawpa liata chyhsa pahrâpa zie) cha 40 a châ.

Mizoram State population density - 52  châ ta, India râh chhochhi cha 382 a châ. Khizaw liata population density a sâ chaipa cha Monoco châta,25,709.4 a châ. Singapore zy chhao 7907.5 a châ hra.

​​Mizoram state decadal growth rate (Kô 10 padai lymâ ta eimâ pôhna) hnôh chaipa 2001-2011 liatapa cha 22.78% a châ.  Tahma ta eima state decadal growth rate 22.78% hawta  he hmata Marasaw malu he pôh lyma pa châ sala,  maluh Thy hraw( 1 lakh) tloh awpata la, 2040 lia ta eima kaw tlô thei ngyu aw.

Kô 2011-2021  chhôh liata= 66214, Kô 2021-2031 liata= 81298, Kô 2031-2041 liata=111465.

 Chârasala Mizoram state decadal growth rate he â naina/chyhna lâ zieta a sie pâ lao bao.

1981-1991 liata 29.18%,1991-2001 liata 23.81%,2001-2011 liata 22.78%, Siaha district liata hasai nata thytliapa thihna hluzie pachâ pata a negative na lâtâ contributor pha ngâsâpa eima châ nata pangiasa â chhi.

​​Eima Siaha District  kawhna( Area)  he Mizoram State kawhna 6.35% a châ nota, Mawra chhôh liata Marapa maluh zie cha 4.9% ngâlâ eima za châ. Eima Decadal Growth rate hra cha 1981-2011 likawh lia heta a tla panaina lâta a sie ly mâ. He tlu pota malu chyhpa nata â pôh dusawpa District pi tlai he, India râh liata Hâsaipa thihna( Infant Mortality rate ) âsâh chaina District eima châ bao. Drugs nata sahma vâta eima thyutlia penaw thlâkhao pangai hapa nata apangai ngâhaipazy he eima population pa châ patala  a hnasatu ngâsâ ha.

Maharasthra State liata  Thane District lia zy cha maluh 1,10,60,148 y ei ta, eima district hlâta Hâsaipa thipa nata paritheipa vata a thipa percentage ama chyh via salyu cha maw!!!

​​Eima decadal growth rate he a naina lâta sie lei pasala , a pôhna lâ ta a kaw sie hnolo ngâkaw khia tala, tahma tawhta kô 20-25 rachhô liata Thy hraw( one lakh) tlâ kaw tlô chyu chyu awpa eima lyu. He kô 20-25 chhôta he khatluta ma Tlaikaona zyta mia pôh thlu eita, hma mania ama sie sai heih và i, pachâ theipa chhao châ vei.

 Kô 4/5 chhô liata Mawra state apôhna dâ cha: 2012-13 lia Thy noh rachhô,2013-14 lia chhao Thynoh rachhô,2014-15 liata thythô, 2015-16 liata thycharu...ta a pô lai.

 He liata he mara saw khazie tlai eimâ hlao hra va i???

​India râh liata State lai penaw cha rei lei, North East liata eima chheipa liata state nah Population density zy cha:- Manipur- 115, Nagaland- 119, Meghalaya -132, Tripura -350, Assam- 398 etc..zy a ama châ bao. Chavâta eima Siaha District he eimâ zâ hua ngâsâ chy. Châvâta a pietupa Khazohpa ta mia pie pasai hlâ chhô tala Mara Chanôzy palôrupa lia he ta, Family Planning nata Birth Control tahpa zy he Lucifer  chhaichhina a châ tahpa he eima  vaw pahno pasia via thei nawpata Khazohpata novâhna rie mia pie maw sy.

Khazohpa ta chyhsa hnota byhna a pie tua chaipa cha sawbyhna he a châ. *(Athaona 1:28 - Chatawcha Khazohpa ta amo byhna pieta, ama hnota "chi hlupi pathlahpa pôpata aleilô he bie u la..")* Tipa- ua ta chyhsa vao khai ha tawhta Naw nata  sawzy hnota Byhna a pie pa chhao *(Athaona 9;1,7: Chi pathla pata pô ula; a lei lia na heta saw hlupi sa u la a lei chô he bie te u")*. Babel o sâpa sa eita, Khazohpa ta naw saw nazy a ma rei apananoh khai tawhta Israel zy pathlahtuhpa Abaraha, phopizy paw ta a qualified na chhao saw hlupi a sa vâ a châ.

Abaraha zy zakaw zy kha saw sa hlu theihna byhna a pie pa sai a ma châ khaw.

Khazohpa ta hrona mia pie ta, eima hrona deikua keimo sasyh ta mohôh awpa a byu. Eima khokhia Khazohpa kho leina zieta keimo nata keimo  hrona eimâ la thei, amaoh deikua eima phao hr'awpa a byu.

 Chahawpyly ta cha saw zy he Khazohpa tawh ngâlâ ta hnei theipa eima châ, a pietuhpa kholeina zieta eima tao thei hra, a maoh deikua eima phao hra aw.

Saw zy he keimo ta eima kho khona hawta sa thei awpa hawta  âpachâ kha ei su u. Nôpi-nôva ta eima tao theipala *âchaku* ngâlâ,saw taotuhpa cha Khazohpa ngâlâ a cha. (Athaoana4:1-Chatawcha Ada ta alapinô Ivy cha pahno/achaku hata, Saw phaota Kaina sata " Abeipa bao nata Chapaw ei vaw hnei haw"* a ta khaw. *(Ruthi 4:13 Boaza ta Ruthi cha a chhita, a lapinô vaw châ hata, Hnei/pawl ta, Khazohpa ta saw paphaosa ta)* tahpa zy chhao eima hmô khaw.

Hlazy 127:3-5 Sawnawzy he Abeipa tawtapa eima ryuto châ eita, Sathei he alymâ mania piepa a châ.

Locho nota sawzy he chyhsa thatlôpa ku liata chatai a y pa haw he châ ei ta, A LAVAH saw ta biepa a hneipa chyhsa cha aly ngaitapata a y ty. Kuh chhikao liata ama dyupazy ama chhy hai no chhaota maophyu awh vei ei.

Sarai zy, Rakheli zy Elizabeth zy ta saw ama sa na ky lia chhaota kha...Khazohpa tawhta ngâlâna saw he a sa thei tahpa a sia kawpata eima hmô aw.

Marasaw abohna nata hmahsiena Chhâhchabi tua chaipa cha KHAZOHPA chihna  hmeiseipa  nata Biehrai bie zyh hmeiseihnapa he  a châ.A chhâhchabi  sânona(2) liata KHAZOHPA ngâna chôta Mara chanôzyta saw hrizaw ama sa/hnei awpa he a châ.

​​Nopi-Nôvah likaw liata saw sa nawpa zie he chapaw hlâta chanô rei he â za châ via tyh. Chanô ta khâchâ saw sa hluh awpa a khoh ha khiahtala chapaw nah heta eima ei hraoh nata pangiasa va na. A nodeikua chapaw ta saw  hluh khoh hra sala,  a phaohtuh chai awpa chanô ta a paryhsa vei khiah, a hriselnazy a bai ha khiatala chapaw châta  tao thaipa châkhao vei.

Khazia Mara chanô zyta saw sa chy he a ma kho tly i?? A chhâpa châ theipa ta âla pa cha:-

1) Thathi vâ dei ta: Saw a sihphih ta, chhâchhie ta, chichi-mâmâ ta y awpa ho lei vâta a châ.Chhôkha maophaona lai chaipa cha, saw sa ta  mohôh he a châ. *(I Tim5:14 & Titu2:3-5)* Chanô he ta saw ama sa vata pachhana taihta to thei awpa a ma châ *( ITim2:14-15: Adâ cha dôpata y lei pata, chanô deikua dôpata y ta, moleina liata pao hawta. Charasala ngiapana nata kypachana nata pathaina hneipata,palôru sia ngaitapata khâ ama y khiatala, Saw sa na vâta pachhapata a ma y aw)*

2) Âtivy lei awpa chi vâta: Saw hnei hlu khia ativy lei pata y ta, heizy khisa akho leipata y ta,sawnazy heimoh moh pata soh awpa chi vâta.He he Khazohpa ngâ leina nata Biehrai bie ângiapâ leina tawhta puapa a châ.Khazohpa ngâtuhpa nata Saw zy he khazohpa tawhpa ryusôhpa a châ tahpa pahno pasiatuhpa ta cha Eima Biehraita : *Khapa e eima nie aw?khapa e eima do awh? khapa eima bu awh? tahpa pachâchhie kha u* (Mt6:26-34) He Biehrai châ he eima rei khia thlalôh a chhi ngâsâ. (Bieso 3:5&6: *Napathipalô tlokhuta Abeipa cha ngâla, nama pahnona liata apahnie kha.Lapi zydua liata ano pahno thla ha la, na lapizy cha acha pahnosa lyma aw.) ( Hlazy:37:5&25- Na yzie awpa Abeipa liata pahnie la, ano ngâla, a nota  atao khai aw& Hawti vaw châ nata, atahma la eimachâ hawh; Chyhsa siapa pathlupata a ypa hmô bei leipa nata, apathlazy kudaopa hmô hra vana)*

3) Nohkhih leipa châ awpa china vâ: Mara Nô hlupi châ tala saw 4 hlata hneihlu viapa he hmo nozah chhi kawpa nata a rei chhao pakah kâthli paza kawpa a vaw châ bâ he zaw!!.( tahma he eima nô nata pawzy khata 4/5 ta lia kha âvaw pachhâsa ha ei sala atanoh nama hmia eima cha hmô lei awpa hlupi nama y aw).  *"A khinara nata a siana tlua tua te u,chatanachata he zydua he a cha baichha awh ei"* (Mathai 6:33)

Rebeka ta Aisika hnota a kia nota, a chhôkha nata a ma pathlie na he, eima rah Nô-nôvah a hneina ky liata myuh ama pasyuhna reikah âlahluah kawpa nata ma rei hlu chaipa a châ, cha cha: *Rebeka cha byhna awpa ei ta," Eima sietanô nâ cha Thy sa hlupi nô va châ la, na pathlazy ta cha âmo âhaotuhpazy kuh cha ochhi cha hnei ei se"*  *(Hlazy24:60) Abeipa chitupazy no hlaona pa Hlazy128 lia ta cha"*  *Na lapinô cha na o chhô liana chata Krezo a pathei kho ngaitahpa hawta y aw ta, na sawzy cha na tlakhai chheipa liana cha ôli dawzy hawta a ma y aw"*

4) Hnatlana pha lei vâ ta :Chyhsa châta eikha thi raopa châta, nawhchô liata thi awpata raopa eima châ khia khazohpa rei sai. Hrona chô liata bie hneitupa cha khazohpa ngâlâ a châ. Khizaw cha rei lei Mawra chhô lia he hmata, Dawty nazy nawh hnei thei khao lei awpa ama tahpa nawh hneipa a ma hlu ngâsâ bâ.Dr.C.Everett Koop, Surgeon General ta cha dawty rai kô 36 chhô ei hria chhôta, A nô hrona pachha nawpata nawh parao byupa he a ty mâ vana a ta cha maw.

Khazohpa ngâ leipa pita eima ria khia maw chhie tu haw?.

​​Health& Family Welfare department ta cha thaikawpata " *Family Planning he Saw hneichy awpa ta âpachuna châ leipata, apha kawpa nata yzie hnei kawpata chhôhkha duasy paryhnaw pata âpachuna na a châ e.* za tah ngâkaw tyh hra ei sala. Dept tlâ-awdâh(Slogan) zy, Advertisement zy, Signboard zy etc.. deikua cha "Saw2/3 ngâlâh hneila, Pahnie kawpa ta na sawnah mohôh ma y." tahpa he a châ via chai.

 Siaha Civil hospital complex liata a ma signboard tawh pa liata bie sakha cha *Achhang hi engtikah nge kan nei ang?? âchhyna cha; a u sikul a kal thei hunah"*  He Family planning he India râh liata a hlao patlo chaipa State na zy cha no-âh chhi kawpata krizypenaw hluna state mai he a ma châ. 

 Mawra lia he Family planning he kô 1970 pa rachhôh( UT eima vaw châ tawhta âtah thei aw) tawhta theipa/reipa thaopa châta, kô 1980 khô lâ tawhta cha Mara chanô hluhpi a vawpahnie pathao laihpa ta â lâ.Mawra liata Family planning lâ chhâ chabu pua tuachaipa cha *"Fa neih dan"*--Dr. Lalthanliana rohpa châ ta, cha chabu lia cha "Râh hmasiena pakhâtupa chaipa cha maluh hlupa he châ ta, Atom Bomb tluta chi chhipana achâ" a ta. Za roh lai ta- *"Na mohôh theipa ngâlâ saw hneila, na chata ryusôhpa ama vaw châ aw.Ahyrai amohhôh khai thei leina taihta saw hneipa cha ano charohtha âchhawpa châ awta,cha chhiesana pa cha asawna chô lia chhaota a  tla hra aw"*  tahpa zy taita a roh.

Hlaphithaipa Puhpa Thangsema ta cha Family Planning chôchâh hla phita:

1.         Hlâno manô-mapaw pahno beileipa

            Family planning reikah a vaw pua haw

            Chho lymâ su nô-paw zy thei liata

             Adaihthaipa ta sawhnei he ryusôhpa a châ

2.       Ama vawrao thai tlaina molâpazyta

         Chhotota saw hnei nawpa zie

        Hmâ thai a chhua chyu su vy he hmo he

       Chhôtoh châta byhna a vaw cha aw

Hla nata bie liata chyhsa âlâhlua kawpa Puhpa K.Saibela ta hla phi hra ta a chaneina lia cha:

Nô-paw mohôh khai theilei thyutliazy

Charei hôlô ei khilia lia

Âpôh via rili a thie-tuna

Paru-pangana

Athohna pha chaipa

na mohôh theinazie saw hnei teh

Family Planning hlao patloh nawpata Birth Control chhaichhi hmâpazy cha:-

1) *Nawh Parao/Pathlah( Abortion)* Mara laisa hlupi ta nawh ama pathla ha.Mara nô-paw hlupi zyta, a ma sawchanôna riasaw ama py awpa hlâta nawh pathlahsa pa he a ma vaw kho via.Biehrai Paropa lâ eima mo khia pei hria leipa chô liata liany cheina pa he Khazohpata ahao chaipa hmo sakha a châ. Phu a la chei ngei ty. Nô pychhô liata nawh achohpa na ta hati na reina reika he alyu  *Brephos( grik) Yeled( Hebrai)*

2) *Âpachhâsa(Sterilization)*: Eima Mara nô na lia he: 1980 rakha tawhta kha cha pastor lapinô thlu lei, Machâ nata Khichho machâ lapinô thlu lei, âpachhasapa he khia ma Khazohpa biepiepa ta ngâ awpata eima pachhâsa khai bâ he zaw. *Kô 4000 hlei sie hapa lia khata Phirao ta Israel pathla hasai pamuahpa âchhuah nota âbohpa Mawsi kha a hymaw eima pahno. Heroda ta Zudia râh hasai pamua awpa a chhuah nota abohpa Zisu krista kha eima pahno hra. Chhôkha châ, Mara râh nata marasaw zy châta chyhsa rôhna pa nata pahnaipa châ awpa eima pachhâsa vata a pi leipa pakhazie ma y va ei tly?*

 Biehraiparohpa liata Rypachaneina,Theihthaina,Ezekiel, Zeremiah,Chaphôtuhna zy eimamoh khia Khazohpa ta ei hlupi warning a pie tawh chhao eita Izarei saw zy ta a bie a mâ ngia lei nata la, *ama saw na sa zy la a ma nie ngâ kaw ba. Eimâ pachhâsa vâta sawkhâ tawhta incentives/lymâ  eima daopa zy he; eima saw na a pi leipa sa niepa tlâ châ ma pi mâ?* Saw sa hlupa nô nata rei eita *saw he hati lâ mai he pivia ei chhithai via ei, Nô-PAW KYPACHANA HNEI VIA EI, a ma lathlizy pha via ama ta cha maw* 

3) *Chhâ apa hla pa*:  Kha hlâ ta cha mara chanô zy dychâ kô he 16-25 a châ via chai. Khizaw hma vaw sie laita châchu chhâ vaw châ ta, chanô dychâ kô he 25-35 likaw a vaw châ haw. He ta heta chanô ta saw sa theihna daihti kô 10 rachhô tlaita a pa chy. khizaw hmasie via eima fertility rate ânai via lyma a ta ngâ kaw.India râh Fertility rate( Nô pakha ta saw a sa na zie) a tla panai na da cha:- kô 1981 liata 4.5,1991 liata3.8, 1999 liata 3.2,2009 liata 2.6,2016 liata2.2. Mawra he 1999 tawhta ngâla data hmô thei pita, 1999 liata 2.0, 2016 liata 2.3 a châ.  He 0.3 ta a kaw pôh pa heta a tlia liata sawsa peimawh zie pahnona  Nô na lia a pi vâta a châ nata pangiasa âchhi, a ly a chhi kaw.

Kô 1995 pata USA lia cha survey hnei eita, Nôva bao 5 liata bao kha sawleipa a ma châ. chavâta saw he eima kho daihti mai ta hnei thei awpata eima pa châ khia eima tao chhei kaw aw, a pietuhpa Khazohpa ta mia pie na daihti lia maita hnei awpa he a pha chai, keimo eima rypaona/ eima programme liata khazohpa programme pa adjust sa pa a chhua kha ei su u.Eima ngia pachhi pathlei aw. *(Isai 55:8&9)--Ei pachâpazy cha napachâpa châ lei pata,na yziezy he ei yzie châ hra vei,  avâzy khie a lei hlâta âsâ viapa hawta,ei yzie zy he nâma hlâta âsâ via tlô ta. Eipâchapazy chhao napa châpa hlâ ta â sâ via hra)*

​Kô 20/25 rachhô sie hapa tawhta Marasaw thyutliapa eima thi nasa dâ hi,(Thyutliapa dei châ khao ma pi, Kô 1/2 ta sie hapa liata KPP member 70 hlei nata ECM Awhnanoh  Machâ& K/Machâ 60 rachhô ama thi ) Hasai ama thi nasa dâ hi, Paritheihpa taopa a ma hlu dâ hi, HIV positive a ma hlu dâ hi( Feb 27 ta DDCMC meeting liata Medical dept report cha, chyhsa 370 a ma test pa liata 23 a ma positive), Nawh hneipa mai rô ta â awhpa sai a ma byu hlâ ha hi , na pa châ bei ma?. Atlia tawhta Eima satlia laisa phai liata châ ama chuna tawhta âphei lâta vaw tlôpa ama hlu dâ hi!  napa châ bei ma??...A thi penaw zy kha vaw thyu ei sala Biehrai chakhia pata Eima nô-paw na Family Planning lâ saita namâ râ vâ ta amâ eima chatypa a châ hi cha tah eisala khei ta na ma palie aw va i? ...Mara saw krizypa zyta KHAZOHPA hie eima pahâna hlupi a y aw...cha liata sakha ch Birth Control eima hmâpa he â hlao chei ngei nata eipa ngiasa.

Rev.  Robokoff ta cha "Sâta heta direct aw....kawpata Khazohpa adyuh he ngâ ngâsâ leipata, a Kypachâ pa, a noh lyupata a taopa chyhsa zy he pamuapa âchhua" a tah.

​​Eima Biehrai bie

*Sawnawzy he ABEIPA tawhta eima ryuto châ ei ta, Sathei he a lyma mania a piepa a cha*

(Hlazy 127:3) tahpa he ta Nôpi-Nôvah likaw liata sawzy he KHAZOHPA kumâ a châzie a palâsa pasia kaw.

​Saw sa âpachhâsa penaw hluhpi he la  , Saw pakha ama sa pa lia maih Taka Thy zathô/zapali (Rs. 30/40 lakhs) hlao lymâ awpa châ ei sa la, âpachhâsa leipa chhao hlupi ama y nata pangiasa â chhih. KHAZOHPA  Ryu nata Lymâ , Vârâh taihta eimâ thyukhei thei awpa, mâ ta chalei thai leipa Ryusôh chaipa pasô leipata Khizaw sôh pasô viapa M.CH.P member he pakhazie tlai ma y vâ pi tly??

​​

Pahnie kawpata mohôh thei awpa Saw 2/3 ta hnei pa he , nie-baw nata âbusai lia zyla amâtivy via ngyu aw,  chhôkha âly kawpa nata buabâna hnei leipata âthlazi kawpazy châ  hlei vei tahpa he eima Mara râh buatapa lia chhao eima hmô hôlô hih.  He hawpa saw 2/3 ta a hneipenaw sawnazy he ‘Emotional Dependency Syndrome’ ( Chyhsa liata khâchâ âpahniena Palôrupa pasana hri)  tlao  vei thai kaw ei ta.Nô-Paw  machâ râhsâ lâ tawhta palôru rie patheituhpa ama châ khoh kaw. A hluhpi la ama Nô-Paw ta ama ri ama paso byuhpa zy tlao ama châ tyh.

​

A chhiena ( Pessimistic)  lâta asaituhpenawzy ta cha, Thy 5 liluata population pi ta hmah ,he tlupo ta eima Lyurâhpazy parao pakei pi ta,  eima Tihnawh nata Chavah  nahzy  eima pakua khai daihmâpa châ ta. Râhsah, Tisa nata  Pazu- pavaw  zydua  pamua khai hapi ama tah aw. Population hluna pa mai râ rietheipa  nata hno khaw pa hawta pachana a y ty. Râh âsohsâ viapa nata hmasie viapa cha a ma y tlaina, Population hlu vâta hmasie leina tly ma nie baw rairuna tly ma y pa hawta pachana pa he pachana do leipa a châ. Arâh sawkha a mohô dâh asu lei vata tlao a châ ty. Khizaw liata chakâna a tlôpazydua he chyhsa pa taopa ( man made) sai a châ.Sudan, Ethopia, Tanzania etc liata chakâna tlôpa zydua chhao khaw chyhsa taochhypa sai a châ. India râh lia sai hma ta sapha a ma hria papua pa tawhta 40% daihma cha apasaona pha lei vata a lei lô. Birth Controls nata Family planning vaw pathaopatô tu penaw he Envinronmentalist na ama châ thai kaw. Chyhsapa hrona hlâta hmo hropa pa peimawhsa viapa a ma châ ty. Martin Luther ta cha Birth control he sihryna hlâta hma hmo pualei viapana a châ a ta. Chyhsa pa he a hy maw miah tao tahpa he my khah ei su u. He hawpa pesismistic view he Genesis daihti no tawhta kha hma ama vaw  y ha, *(Gen 13:6-9). Châhrasala khizaw thaina nata sona ta a pahno thei beih leipa hmo sâkha cha, leilô ta  population khazie tlaima a chyh( Support) thei tahpa hi*.

Cambridge University liata  Professor Thomas Robert Malthus(1842-1924 AD) châbu "Essay on the Principle of Population as it affects the future improvement of Society" zy, Stanford University Professor , Paul.R.Ehrlich  châbu  "Population Bomb"  zy, Fairfield Osborn châbu “Our Plundered Planet” zy etc.. tawhta Population Explosion/Over-Population/population atom bomb tahpa  theory zy vaw pathâ laita. Khizaw chyhsa thaipa hlupi  hlânoh chyhsa Polybius, Plato, Tertullian etc.. tawhta kô zabi 20 na liata chyhsa thaipa, Fairfield Osborn, Paul.R.Ehrlich etc..zy ta  Population hluh tupa vâ nata pôh chatlietuna vâta Khizaw he raokei khai thlâ ha awpa ta  ama vaw rei tyh.

​​

Châhrasala Kô vaw sie laih ta, Population vaw pôh via lyma pi ta, athaipenawzy chhochhieliena nata reichhieliena chakhia pata âlie-nata-âhna saita tlao  a tlô tyh.  Kô 1802 pata  Dutch sawhkha hyutuhpa pakha ta cha Java liahpahlô liata maluh 40 lakh ama ypa cha , ama hluhtu ha( over populated) tahpa a vaw reih ha. Tahma he 1076 lakh y eita over populated/crowded a châ ngâthlâh pyly.  Ko 1948 pa khata Fairfield Osborn ta cha “Our Plundered Planet” tahpa châbu roh ta. Leilô ta he chyhsa 2 billion hleikhôh pahnie/chyh( Support) thei aw vei tahpa roh ta. Tahma he billion 6 hlâta eima hluh via ha. Ko 1948 hlâta eima khisa  âsosâh via pita, eima hnatlana pha via ta eimâ tivy via hra, eima hronoh daihti chhao apasi via.

​​

India râh chhao kô 1921 liata chyhsa  25.1 crore ama y nota kha, Population eima hluh tu ha tahpa ta sawkha hyutuhpenawzy ama vaw bua ngâsâ ha. Chârasala daihti vaw sie laita, tahma he chyhsa  102.7 crore  eima y tawhta heta, kô 1921 pa liata pa  hlâta kaotoh liata hmahsie via pita eimâ tivy via.

​​

Jimmy Carter  US President a châ no khata,  USA liata Agency hro hropa 14 nata World Bank liata Chyhsa athai thaipazy ta Dr.Gerald O. Berney  chhithana ry liata  The Global 2000 Report to the President tahpa project a chhuah noh eita, May 23 ,1977 liata President Jimmy Carter ta commisioned ta, July 24,1980 pa liata White House liata tlâhzawhpa   a châ. He Global 2000 report lia heta, 1980 tawhta  Kô 20 kaw sie sala kô 2000 pa liata eima Khizaw duahmo âthla-thlâ nawpa dâh kaw sai chhieliena châ ta. Adaihti no ta cha Khizaw liata Report a ma pasâsah chaipa py châta, Copy 1.5 million zuah eita, Reih hro hropa reih 9 tlai ta a ma palie  ngâkawpa kha a châ. He Report ta cha kô 2000 pa liata la kô 1980 pa hlâta Population eima kaw pôh via salyu  hawpa vâta, ato vaw sôh ta,eima khihsa rairu ta, atoh liata eima tivy lei via aw,  a tah. Anodeikua cha kô 2000 kaw tlô pi ta, kô 1980 no pa hlâ ta atoh liata tlao eimâ vaw tivy via salyu haw. Chavâta chyhsa sona nata thaina ta he BIERU- Leilô ta chyhsa pa a chyh/pasa theina zie ( the Earth's Carrying/supporting capacity) he pahno thei beih vei!!!          

​​

Chavâta population eima pôh tu khiah nie-baw eima rairu aw tahpazy pachâ byu vei.  Chyhsapa he eima luh liata lathli-hmopatuapalua nawpa , ku sânoh(2)- raihria nawpa nata paka sâkha(1) -pati nie nawpa hnei pata  eima pi hlâ chhô tala,   pôh via'pi tlâ hmasie via'pi  eima tah aw. Siaha District liata Mara saw saita 10 lakh zy duah y hla tua si.  Chhôhto ta  survive awpata âkhaohcharao pi ta, tahma ta Viana nata Burma nata ama hriapazydua he eima khoh ma khoh vei ma eima hria pylypa a vaw byuh ha aw. Viahna nata Burma nah zy cha papua ngâkaw byuh leipata a mahria awpa eima hria chhu khai khiatala, ama pohty â chaty eita tlâ a ma pua khai aw. KHAZOHPA pata chyhsa liata a hmopie rôhna ngâsâ pa cha  abyuhna nata a peimawhna su lia maita âparyh-pari theina ( Adaptabilty) he a châ. Eima population â vaw pôh khiala he eimâ Adaptability hmâ pa heta, tahmâ ta eima hrozie (living style) nata âsohsahna dâh (standard) zy, eima palôhru phaozie (mindset) zy, eima hmo pasâhsapa (Social value) nata eima attitude- zy he thata â thla aw ta, a pha viapata â paryh-pari(adapt) pi ta, hma eima sie via cheingei aw.

​​Eima Maraland buata lia ngâlâh ta ypah â chhuah khao leipa'w pi ta , district, state nata India râh khôtho lâta rai tluapa ta eima vaw pua hôlô hra bâ aw. Mara reih châbu roh zy, Audio Album nata film tao zy chhao a thô nah vaw y ha bâ hraw ta, a taotuhpa hluhpi vaw y ei ta, literature nata Arts lia chhaota hmah eima sie via cheingei aw. Population hluh khiahta cha, chyhsa phapa hluh hra'w pi, chyhsa phaleipa y hra'w pi, a hriatuhpa hlu hr'aw pi, a nietuhpa hlu hr'aw pi , eima domestic market vawpha ta,  rai( job/employment)  tha ta avaw sa papua aw. Hlawfa(Labour) vaw hluh eita, hlawfa mâ avaw nao aw, chatacha hmo mâ a pa naosa aw. Domestic market phana su lia maihta âpaipakhypa( immigrants) hluh ei ta. Âpaipakhypa hluhna maita khihpipa lâ â lie ty. Khihpipa hluhna maihta râh a hmasie tyh tahpa he economist zy apyhna dâh a châ.

Gary Becker, Nobel laureate ta cha, population a pôhna lia heta, economy chhiena lâ hlata phana a hluh via salyu  ta.Population hluhna  vâta nie-baw liata rairuna y awpata pachâna he a do vei a tah cha maw!!!

​​Demand a y khiah supply a y pa byuh tlôh ta , Industry chynawhpa thata â vaw dua aw. Necessity is the mother of invention ama tahpa hawhta , population hlu via'pi, ryraona pahno via'pi eima tah aw. Population eima vaw hlu khia la survive chyuh a chhuah pata eimâ râ pasuana( Competition) he ta, Mara râh châ nata Mara saw châta hmasiena thata a tlôkhei cheingei aw. Maluh Thy pangaw(50000) lilua ta la, a chi nata apho hawta hmo rôhnapa tao he a ru ngâsâ tyh.

​

Kô zabi 21 eimâ vaw luah tawhta la khizaw ta Population hluhna Râh a saina dâh a vaw nano bâ kaw. China nata India thata eimâ kawsuana chhâpa he eima Population vâta a châpa ta ama reih. India he Hindu na hluhna râh, Brahmins, Kshtriyas, Vaishyas nata Shudras  nazy, chi to photo, Chi phapa nata Chi chhiepa tahpa ta âpachhaina râh chhochhi châ leipaw sila, China hlâ chhao ta hmasie via thei awpa eima châ tahpa pachâna hneipa Economy Watcher hluhpi a ma y. Chatana chô chhaota eima population hlunapa he, tahma cha eima hmasiena hawta reipa a châ habâ he zaw!!! Banking nata Financial services liata Khizaw liata alaichaipa pazipa HSBC groups nah chhochhieliena liata cha,  Phillipines Râh he ama population hluhna vâta kô 2050 lia ta la , tahmâ ta a duahmo 43 position siesai pata, Australia, Netherland etc..zy a zaw pakhopa ta khizaw liata râh hmotaothei chaipa 16-na liata a kaw khaih aw ama ta cha maw!!! 

Chavâta marasaw eima population a vaw hluh khia tala, Thyutliapa raihria hoh leipa-Chieniepa, nata pari- panga ta tlâ charei-charâ chakhypa, ku raihria no âpazasa ta nai-â-ô chhao hriapapua tlô leipazy saita eima mara râh he bie thlâ hawpa hawta pachâna hneitupa cha Pessimist( achhiena lâ saita hmo sai tyhpa) chyhsa, KHAZOHPA kumâ ngâlah tawhtana chyhsapa he eima y thei, tahpa a zo leituhpa ama  châ nata eipangiasa. Apietupa KHAZOHPA ngâna chôta Mara chanôzyta thata  SAW he bâ vaw sa lyma te u.  Biehrai lia kheita ma eima hmô khaw *(Mt 6:26. - Pavaw avâ liata a zawpazy he pachâ te u; sâ tu vei ei, hria hra vei ei, Sawvâ liata paso hra leipa eita, chahrasala nama Paw avâ liatapa ta amo a pasa ty ei. Namo cha amozy hlâta sô via syulyu vei ei chi ma?).*  He he Politics nata Look East policy  saina opy tawh chhaota Mara râh eimâ bohna  a châ tahpa pahnona chôta Mara Chanôzy ta KHAZOHPA ta a cha piena dâh ei chyu hawta, âpachhâsa leipa nata âpahlasa tlâ leipata thata SAW sa awpata â vaw chhuanoh bâ te u.

​

He zydua hlaotlona deikua KHAZOHPA CHINA NATA PAHNONA LIATA A Y.

"ABEIPA ta o a sa vei khiatala, a satuhpazy chata ama hriapasa thlâhthli. ABEIPA ta khihpi a vai veikhiatala a vaihtuhpa cha â hra thlâthlih thlâh ha aw" - Hlazy 127