Chanô sahlao 75 ta kô 20 chhôh râhhmâhpa pabohsana raihra

Odisha state-liata Mahanadi delta, Puri district-liata khih tataw kawpa, Gundalba khih liata chanô 75 sahlao zy chata kô 20 chhôh tlai ama khih chheipâh chadôtuhpa râhhmâh thothih pabohsa awpa vaihpa ta, nohchareih ta râhhmãhpa tawhta tho la tyhpa zy nata tho â tyhpa zy vaihna rai vaw hria ei ta, he zydua vâna heta atanoh taihta râhhmâh thothih pha kawpa ama hnei thei.

Kô 1999 khata Odisha state maw-nochhi lâ cha supercyclone-ta athata chanaoh chaimâh ta. Noh hluhpi chhôh cha nie nata do awpa nata a bu nata sai awpa a phahla ei ta, chyhsa hluhpi ta O nata lyu ama pahlei hra. He nona heta he khih deikua he cha phie â boh ta, a chhâpa ta ama reipa cha râhhmâhpa chata a pabohsa ei ama ta. He ráhhmâhpa pabohsa awpa â ngiahnazie he pahnopa ta, cyclone-ta khih hropa a chanaohpazy deichhy awpa ta ama khih chapawnah zy cha amâ thao awpa â ngiahpa vâta, chanô 75 zy ta râhhmâhpa pabohsana rai hria awpa ta â piepa ta, henah sahlao heta aru lâta tho â tyhpazy nata tho la tyhpazy vaihna raihriapa ta, nohchareih ei 2 cha khâsiana rai hriapa chahlôcha-ei ('patrolling') tyh ei ta, group 10-lâta a pachhaihpa ta, â thlathlâpa ta myrâh ta duty awpa nata zâlâ daihti liata khâsiatuh awpa â raopa ta, aru lâta tho âpa nata tho parupa ama y tlamaw ha la tahpa ta sômasih a chabapa ta tho zy cha chakhyhpa ta, pyury athata taopa ta ama chahlôcha-ei tyh.

Ama hryta pabohsana raihriatuhpa (a volunteer forest protector) Charulata Biswal (52) chata, "Eima râh nata khizaw ta cyclone hmotao theizie pahno ta, eima O nata lyu zy, sahdô chichei bialopazy parao khai tyh ta, niedo awpa hnei leipa ta eima y tyh. Chavâta eima râhhmâhpa sôhzie pahno pi ta, atanoh taihta a tlâhbohpa ta y thei pi ta. Râhhmâh pabohsa lymâ awpa ta bie ei taih" a ta.

Ama pabohsapa hry heta tilaipi kiah liata tho a y tyhpa 'mangrove' zy chhao â hlaopa ta ama rei.

He chanô py he kô 2001 tawhna khata 'Women's Forest Protection Committee' tahpa ta râhhmâh thothih pabohsana rai he athata ama vaw hria lymâpa a châ