Article : Âmo he y vei mawh ei sala.. - By Vâhnei Mathipi

(‘ȂMO’,  tahpa cha USA, Australia, Europe, Singapore, Malaysia zy liata apahrȃpa Marasaw zy tahna a chȃ).

Zȃhia zȃcho eima nawhta nah Meipaw nata San Aye Yangon International Airport lȃ eima nôvah ta va pathlie pi ta, Rev. C. Thaulei chhôhkha, Rev. Maiki chhôhkha hawti sawnawhzy nata viasa thokhazy chhao zȃcho ta airport lȃ a vy hra ei ta;

O eimȃ vaw dina lȃpi tlykha palôh lia hmo hluhpi a vaw luah ta;

Eima lôhpasapa Marasawzy USA, Australia, Europe, Singapore, Malaysia rȃh zy liata kô vȃropi achhô azȃ ama ku tlai ta thata hriapasa ei ta, ama lôhriepa chhôhkha nata ama liaritlona Mara rȃh vaw tly ei ta; ȂMO ku tlaita ama hriapasana sôh hluhpi pahryuh ei ta;

ȂMO yna lȃ ama kua pathi tawhta achhô azȃ ta thi nata thawh pahlaopa ta thata hria pasa heih aw ei ta, tahpazy pachȃ sualuah na ta;

ȂMO ku raihria pasana thei tawh tlai ta:-

AWNANOPA NATA KHITLȂH KYHZY LIATA: -

• MEC, Mara Community Church, Mara Christian Church, Mara Christian Fellowship USA, Australia, Malaysia, Singapore zy tawhta Mara rȃh Awnanopa chakaona nata Myanmar rȃh Mission chȃta sôh hluhpi ȂMO tawh
• Mara Community Committee zy ta Mara rȃh nata Mara chyhsazy chȃta ȂMO tawh
• Chakȃna, adyuna, vȃsua nohsa thlipi kyhzy vȃta chhiena noh zy liata ȂMO tawh
• Khih likawhzy liata lȃpi chhiana chȃta ȂMO tawh
• Khih zy liata o paduanazy liata hryuna zy chhao ȂMO tawh

MARA PYZY RAIHRIA LIATA:-

• M.Ch.P, MTP, MSA, AMLC, YMAP, hpz..  khikha nata vaihkha amohôhna py zy raihria liata ȂMO tawh

CHHIE NOH PHA NOH KYH ZY LIATA:-

• Chieh leina vȃta Mara rȃh tawh Matupi, Paletwa, Mindat, Haka, Pakkoku, Mandalay, Yangon Thohna o zy pangaina nata mohôh na liata hryuna zy  cha ȂMO tawh
(KNP Yangon hmah ta 2018 chhôh achieh leipa 60 rachhôh Yangon liata ama tly)
• Thina nata ri pasona, ripabuna, ri phaona kyh zy liata hryuna zy cha ȂMO tawh

ACHUNA KYH LIATA

• Haka, Sittwe, Pakkoku, Kalay, Mandalay, Yangon hawhpa khipi zy liata University achu  haipa siku hawtizy hryuna 100 liata 90 rachhôh cha ȂMO tawh
• Achuna patlô tawh raihria hnei thei n’awpa liata hryunazy chhao ȂMO tawh

ALYNA NOH

• Pi noh tawh pathaopa ta Dychȃ kupatuna, Krisama nata Kô Thiehpa Alyna kyhchhizy liata hryuna zy cha ȂMO tawh

He zy leipa chhao ta kyh hluhpi lia ȂMO tawh…..ȂMO tawh….. ȂMO tawh……AMO tawh....

ȂMO he eima rȃh lia ama y no ta achuna tovyuh phapa chhao vaw hnei thei leipa ei ta, ama thatih chhao a reih  leipa ta, hmao mopata y ei ta;

ȂMO he Nochhi Mara mopakha, thyutlia, chhôhkha, khih nata rȃh, chipho paduana liata ȂMO ku tlai ta hriapasa ta sôh hluhpi vaw pie tyh ei ta;

ȂMO he ȂMO tao phana kyh bie ta reih leipa ta achalih thlȃh ha ei ta;

ȂMO he aly ei sih la, ȂMEN…..ȂMEN….ȂMEN...... tahpa ta byhnȃ awpa hra ei suh vy!

ȂMO HE Y VEI MAWH EI SA LA……