UFC : Connor McGregor ta MMA â pahâsai ha aw tahpa a phuah!

Irish machhyu-mahrâhpa, Weight Category sâno liata UFC champion a châ theipa, UFC Ziza paphasatuh chaipa pakha nata UFC cheihchalotuh chaipa, Conor McGregor chata "MMA ('Mixed Martial Art') tawhta ei pahâ ha bâ aw"tahpa ta bie nata hla hneipa ta, he heta UFC khizaw a pahlaw kaw.

Kô 30-ta uhtheipa McGregor heta he MMA â pahâsai n’awpa chôchâh he Social media liata tawhpapuapa ta, "MMA liata ei hrialâhpazy hmialâ tôh lymâ awpa ta khokheina ei hlâ ei” a tah hra.

McGregor heta UFC dôhpachhôh â ngiana hnôh chaipa liata pahniepa ta y ta, Russian chyhsa Khabib Nurmagomedov zâkô October 2018 – khata rei a hlao kawpa, buana ta athata a pazipa atuna liata Round-4-na liata ‘Submission’ ta pahnie ta; kha rakha tawhna khata Octagon chhôh a ngia khao mâh heih vei. Boxing khizaw a ngiahnaopa ta Floyd Mayweather a pahnie lei tawhta UFC â vaw ngia heihna liata pahniepa ta a ypâ hapa khata ano liata athata yzie a hneipa alyu kaw.

Kô 2007 liata UFC â ngiahnaotuhpa, McGregor heta MMA hleikhôta UFC athata palâluahsa ta, a cheihchalo kaw hrapa a châ. Â pahâsai hmeiseih khiahta cha MMA khizaw châta cha pahleina lai kawpa a châ cheingei aw.