Eima District Council He Ahy zy Reipapuapa Maw? – By AB Rômâ, Siaha

Lakher (Mara) zy he eima Missionary-nahz ­y vâta India Independent avaw hmô pataw nata sawhkhâ ta maniah pahno ta, chavâta, târi noh 23, Pachawh, 1952 liata Autonomous Regional Council piepa eima châ. He eima Regional Council he Mara beizy ta Mongyuhna pasopakâna vâta, ‘‘Region ta y awpa ta India sawhkhâ liata hiah muh vy”,ama vaw tahpa vâta , Mara Beizy ta, ‘Superintendent ­ of Lushai Hills, Aizawl’ liata hiana ama vaw pangiapa a châ thei. Mizo, Lushei nawh chhao târi noh 25, Pachawh, 1952 liata Autonomous District Council ama vaw pie. He Autonomous District Council nata Autonomous Regional Council-zy patlysa awpa ta Assam sawhkhâ ta Advisory Council kaw padua ta; Member châta Puhpa Chhôhmô, Saikao Bei ama rao.

He daihtino heta Pawi nawh cha India sawhkhâ ta pahno mâh vei ei. Schedule Tribe lists liata ahlao mâh vei ei. Missionary eihrâpa ama hnei leipa vâta a châ thei aw. Chavâta, sothai kaw ei ta, Puhpa Chhôhmô, Saikao beipa lâ a vy ei ta, “ Ngiachhiepa ta, nama Regional Council liata maniah pahlao hra bei ula” tahpa ta amâ vaw haw. Puhpa Chhôhmô ta he amâ vaw hawna he â vaw pyh syulyu haw. Chavâta eimaRegional Council liata amâ vaw hlao haw. He daihti nona heta âmo cha châthaipa vaw y chilih ha bâ ei ta, chavâta, eima Regional Council liata CEM, EM, Chairman, Secretary, Court President-zy nata Officer chyh-nawh viapa taih âmo ta ama patuh khai haw. Eima Regional Council chhao chhao Pawi-Lakher Regional Council tahpa ta ama vaw bi. Keimo Lakher-na zydua (Mara) cha nôhpo ngâsâpa ta eima y thlâh haw.

Kô 15 avaw sie khai tawhta Puhpa Vâlua Hlychho ta, “ Regional Council liata eima duahmo he chhie tu ngâsâha ta, chavâta, keimo Lakher nawh châta District Council nanopa/eihrâpa tlao hiah suh vy” tahpa ta pahruana vaw tao ta. Zawpizy aly kaw ei ta, kô 1963 liata Zyhnokhih tawhta, Party thiehpa vaw paduah ei ta, a moh cha, ‘Mara Freedom Party/ ­MFP’ tahpa a châ. Puhpa Vâlua Hlychho he Party President châta raopa châ ta, he daihti liana heta Siaha Private High School Headmaster châna chhao a pakaoh.Kô 1974 liata Siaha High School he sawhkhâ ta a vaw la haw ( Provincialised). Chavâta, MFP President a châna bâsaipa ta, Headmaster rai âpazao haw. MFP chaPresident hnei khao vei ei.

Kô 1966 tawhta cha MNF vâta Mawrâh zydua bua ta, MFP Party chhao vaw sie thei khao vei. MFP chaPresident hneileipa ta kô 6 chhôh tlai ama vaw sie. Kô 1970 tawhta Mawrâh buana chhao bâ ta a vaw pha via lai hapa vâta, Siaha liata MFPSpecial Assembly aw ei ta; he Assembly liata kei (Roma) cha Party President châta einâ vaw tly haw ei. He daihti nona heta Party President châna nata Tipa Private High School Headmaster châna chhao ei pakaoh hra. Hmo no-âh chhi kawpa sâkha cha Keimo Party ta Interim V/C eima laih pi ta, keimo Party paduahpa VCP-zy he pheisaih nawhta avaw pyh lymâ ei ta, Regional Council paduahpa liata VCP-zy cha pheisaih nawta apyh vei ei.

Kô 1971 , Saikao liata MPF Assembly hnei heih pi ta, Assembly ta, ‘ Roma nata Chhôhmô-zy he District Council hiah awpa Delhi lâ sie maw ei sy’ tahpa ta biepathlupa a châ. Assembly bie hawhta Phiahpi, kô 1971 liata Delhi lâ eima sie. Târi noh18, Phiahpi, 1971 ta Delhi tlô pi ta, Prime Minister Pihnô Indira Gandhi a hmô pi ta; ano ta, “ Home Minister pahnie muh vy, keima chhaota ei vaw pyh khei hra aw” tahpa ta maniah chho hra ta, eima thapha ngaita kaw. Târi noh 23, Phiahpi, 1971 , zâlâ dawh 8-pa liata KC Pant, Home Minister a hmô pi ta, aly kawpa ta biechhâ pi ta, Zawpi reih-raona vâta Khazohpa ta eima pakah-paleih maniah hmâpa ta, eima hlaohtlohna Autonomous District Council maniah ama kaw piena Order chhao cha târi noh 29, Pachawh, 1972 liata a vaw pua haw.Puhpa Chhôhmô nata Puhpa AB Roma (Keima)-zy cha eima Autonomous District Council a kaw phaohtuhpa eima vaw châ.