Article : Mara reih hmana nata padona ~ Dr. S. Hrachu (L)

Dr.S.Hrachu (L)

Eima reih he eima hrâkyu khao leipa vâta âdokyhpa ta hmâh thai khao ma pi, tahpa he reina hnei thei aw ma pi tah t’u. Achhyna O maihsâh tawhta biereina daihti a to theipa zydua chhao pi heta âchapaicharupa ta na bie eima rei chyu tahpa chhao he thai â pachâ thei tlâ hra aw ma pi tah t’u. Kei chhao ei thai leina nata ei saomâ lei ngaitana chôta padona ei vaw roh tyhpa he nama pachâthaina ei châ haw chyu pâ hra ei. Nama sawnah Class I-VIII taih amâ chupa Marâ reih achupa bu mohpadotuhpa ei châna lâta chhaota nama pachâthai hnabei ei cha seih ei. Vaw moh laih heih tua suh vy.

Kâhvileipa ta thlahchhâ:  Chyhsa heta eima kâh he vi beih leipa pi ta, eima mo dei lah eima vi tyh. Pati nie leipa ta vâropi ypa he ‘NIECHAHEIH’ (Chawnghei) he a châ. Pati eima nie nota eima KÂH eima papiepalawpa he “kâhvi” châ leipa “KÂHSIA” tah awpa a châ. Eg. “Moh tua, Miepanô a kâh a vi ngâ kaw hu,” tah beih leipa pi ta. “Moh tua, Miepanô a kâh a sia ngâ kaw hu” khâpa ma a cha-eih ngâ tly,” tah awpa a châ. Chavâta “chaheihpa ta thlahchhâ” tahpa ta reih ha bâpa châ sala tahpa byuh â chhih kaw!.

Thlahchhâna eima hnei aw:  Thlah eima chhâpa hleikhô ta kheihta e eima hnei thai khao aw vâ? Kawmiti eima hnei aw, tahpa zy, thopi dona a y pâ aw tahpa zy he tahmâ daihti lia taihta eima hmâ ngâ thlâh hapa he pathleih a daih ha bâ. Eima maotao tu pâ haw.

Pastor ta tlâhkhai a raih pâ aw: Marâpa heta nô nata paw daihti no tawhna khata tlâhkhai liata pati za nie beih leipa pi ta, tlâhkhai chhao raih beih hra vei ei. R.A. Lorrain ta Marâpa ta Dawhkâh a hnei beih leipa vâta mohmiapasaih ta, tlâhkhai hmô ta, “He he khâpa maw?” tah ta. “Tlâhkhai” tahpa ta chho ei ta. A lyu chai awpa ta a pachâsa vâta Sacrament tahpa cha Tlâhkai tahpa ta a vaw hmâ hapa a châ. ‘Ado vei’ tahpa pahno thlâh hana chô ta Centenary khô hana taihta eima hmâ ngâ thlâh hapazy he khazia vâ ma i?!! tah awpa a châ. “ABEIPA zâpati eima dôh aw, tlyma Pastor ta Sacrament a raih aw,” tah thlâh ha ei sih la a pha via chai thlâh haw vei ma i? Tlâhkhai cha hmotaraitary, Bokai, Dâpi, Barah, Kâhchuphiahchho etc. zy sona châta daopa dei lah a châ. Abeipa Zisu cheingei ta pasô ngaitapa ta, “Ei sapa nata ei thisaih nama hro thei n’awpa ta ei hlâpa he, khâ einâ vaw thei ngâ thlâh ha n’awpa ei chi ta vaw taopazao lymâ muh vy” tahpa ta bieryu maniah a hi ngâpa tlai tah TLÂHKHAI moh bipâ thlâh hapa he pachâ raihchaih khi a tlohpa a châ.He liata eima vaw nahthlie laihpa zydua he, ahy anua eihpa nata dy eihpa y vei tahpa reihtuhpa zydua chhaota eima pahno khai. Molaipazy lâta châ pangia awpa hmah ta eima pangiepangô kawpa tlai ta, Lei nata Vâ Beichaipa eima Khazohpa Achhy n’awpa lia hmâhchhâh ta pachâpali pasia hlithâ leipa ta reihkah eima hmâthlu thlâh hapa he â ngia lei kawpa ta ei pachâpa vâta kâchhie kawna chô nata ngâh lei kawna chôta ei vaw roh heih tahpa chhao nama pahno thaina ei haw. Chadeikua ahyrai ta he hawhpa lâ a heihpa ta Article avaw rohpazy he, reipachhiepa ta adyuh thlâh leipa ta, reichheipa a y pathlei hapa chhaota a reipa chhiena ta hmâh leipa ta, Marâ râh kyhpachâpa vâta a roh hnolo ngâpazy na ama châ tahpa eima pahno awpa a châ.

“Liahri âpâpa Motherland Tongue he a pheisai khah ei suh vy”

Daihti tao: Daihti he ataotuhpa cha Khazohpa ngâlâh ta a tao thai. “Atazâ, atamy, zâhnia kha ahyzy ma daihti a tao ei?” tahpazy he Centenary eima khô ha tawh heta la hny laih bâ suh vy. A chhoh s haw!

Apakhyna O liata Meeting Chairman zy ta eima hmâ khao lei awpa ta a phapa cha: “Tahmâ he Daihti hneituhpa eima hrua bâ aw” tahpa zy, “Daihti taotuhpa eima hrua bâ aw,” tahpazy hi. Daihti he tao thai leipa pi ta, hnei thai awpa chi chhao châ hra vei. Tahmâ hlâ reizie ta, “Speaker eima hrua bâ aw,” tlyma “Biereituhpa eima hrua bâ aw,” tahpa ta reipa he â hmiehmâ chai.

“Khizaw âdua chhôh liata marâ reih he a sâh via lymâ mawh sy”