Champions League : Tottenham ama vâhnei – Liverpool châta rairuna y vei

Champions League Quarterfinal 2^nd Leg, Etihad Tlyliah liata akhaihpa liata Goal suah ta, khichhaipa, Tottenham Hotspurs nata tlyliah hneituhpa, Manchester City zy ta Goal amâ khô pari lymâ. Tottenham ta vâhneina to pazaopa ta, VAR nata Away Goal zawhzi ta Semi Final amâ ngia haw.

Akhaihna ama pathao tawhta minute 4-na liata, Raheem Sterling ta tlyliah hneituhpa lâ tawhta za khôpa ta, 1-0 châ ta. He he Tottenham lâ tawhta Song Heun-Min ta minute 7-na nata minute 10-na liata â zaopa ta goal 2 za khôpa ta, 2-1 ta Tottenham hmia amâ kaw sah ha heih. He he Man City lâ tawhta Bernardo Silva ta minute 11-na liata a zâ chhypalie heih hrapa ta, 2-2 kaw châ heih ei ta. Man City lâ tawhna heta Minute 21-na nata Minute 59-na liata Raheem Sterling nata Sergio Aguero zy ta za khôpa ta, 4-2 ta tlyliah hneituhpa ta hmia amâ sah ha heih. 1^st Leg liata Tottenham ta 1-0 ta pahniena ama topa cha 2^nd Leg liata Man City heta palie-patheipa ta, 4-3 ta tlô awpa ama za lyu ha bâ.

Minute 73-na châ ta, Tottenham lâ tawhta corner ama hmôpa tawhta, Fernando Llorente ta a sianô lei kawpa ta goal a za khôpa cha, VAR ta mo chaneipa a châ tawhta, goal ta a pyhpa châ ta, 1^st Leg nahta pahlyhpa ta 4-4 châ ta, ‘Away Goal’ hmâpa ta Tottenham he ama tlô hapa a châ.

Akhaihna mo phapa, a mohtuhpa châta mo pha kawpa akhaihna liana heta, Attacking liata chônô viapa City he Defence liata ama dahdie via hapa vâta pahniepa ta ama y tah leitheipa châ leipa ta. Premier League, Champions League, FA Cup nata League Cup zydua chalo thei awpa duasu liata a duahpa City saduthliena cha meithâh hawhta a pai hapa a châ.

Tottenham heta Semi Finals liata Juventus pahnietuhpa, Dutch Club, AJAX ama hmiachhy heih aw.

LIVERPOOL CHÂTA RAIRUNA Y VEI

Liverpool ta 1^st Leg liata 2-0 ta ama pahnie chiehpa, FC Porto cha rairuna a tyh muarua leipa ta pahniepa ta, 1^st Leg nahta pahlyhpakhypa ta 6-1 ta pahniena topa ta, Champions League semi-final liata Spanish champions Barcelona ama hmiachhy aw.

1^st Leg liata 2-0 ta ama tlyliah Anfield liata ama pahnie chiehpa Porto tlyliah ama kei chhona liana heta, Sadio Mane, Mohamed Salah, Roberto Firmino nata Virgil van Dijk zy cha Player alâluah chaipa ama châ.

Estadio do Dragao, Porto tlyliah liana heta khichhaipa Liverpool he akhaihna amâ thao tua nota cha chadie viapa châ ei ta. Châhrasala rairuna a tyh parei vei ei. Minute 26-na liata Mane ta Goal za khôpâ ha ta. Mohammed Salah ta a za chapiepa cha Mane heta a zâ chakhao thlu ta, sianô tu vei. Anodeikua VAR ta moh chaneipa a châ tawhta goal ta a pyhpa a châ.

1^st Half liata Goal hropa a ngia khao leipa ta. 2^nd Half liata Mohammed Salah pyly avaw luah heihpa ta, minute 65-na liata Counter Attack pha kawpa tawhta Salah heta Liverpool goal 2-na za khô heih ta; minute 68-na liata Porto defender, Real Madrid lâ a pasie ha awpa, Eder Militao ta tlyliah hneituhpa châta goal 1 a za khô.

Liverpool heta ama chônô viana palâsapa pazao lymâ heihpa ta, tlyliah liata ryurei pazao lymâ ei ta. Minute 77-na liata Roberto Firmino ta Liverpool goal 3-na za khôpa ta, Van Dijk ta minute 84-na liata goal 4-na za khô heih hrapa ta, rairuna muarua  a tyh leipa ta 4-1 pahniena topa ta, 1^st Leg nahta pahlyhpa ta 6-1 ta ‘The Reds’ he ama tlô hapa a châ.

Liverpool heta Semi final liata Manchester United pahnietuhpa, Barcelona cha târi 30 April khita ama hmiachhy heih aw.