IAS 2019 Topper Kanishka Kataria ta a hlaotlohna liata a khonô/vâ-ianô alynabie a hlâ

Zâhnia târi 5, Patô 2019 liata UPSC Civil Service Examination Final Result phuahpa liata sâkhana (Topper) cha Kanishka Kataria, BTech, IIT Bombay a châ.

Kanishka Kataria heta he hawhta hlaotlohna rônahpa a topa he zo a ru a tah kaw nota, alynabie a reina liata a khonô (Girlfriend) cha mohropazy alynabie a hlâpa hleikhôta a palâsa hra.

IAS Topper Kanishka Kataria chata, "Eina pahlaw hmeiseih. 1-na châ awpa he â pangiasa beih vana. Ei nô nata paw, sietanô nata ei khonô (girlfriend) zy hnohta ama baokhâna zydua vâta alynabie ei rei. Chyhsa ta Administrator pha kawpa châ awpa tan â hnabeiseih aw ei ta, cha tlai cha châ awpa ei chhuahpa cha a châ hra" a ta.

Khahlâ zydua ta UPSC topper zy ta Civil Services Examination liata hlaotlohna ama topa vâta alynabie ama reina liata ama khonô moh pahlao beih leipa ei ta, Kanishka he a pakhana a châ.

Chanô lâta sâkhana UPSC ta a palâsapa cha Srushti Jayant Deshmukh châ ta, a pôhpalôhpa liata 5-na a châ hra.

UPSC chata, Civil Services Examination liata hlaotlohna a topa chyhsa 759 (577 chapaw nata 182 chanô) zy he IAS, IPS, IFS etc a hropa zy liata ama soh heih aw.

Topper Kataria he SC category liata a ypa châ ta, Mathematics cha a ‘Optional Subject’ a châ. A thaina deikua BTech (Computer Science and Engineering) a châ.

Chanô lâta sâkhana Deshmukh he BE (Chemical Engineering), Rajiv Gandhi Proudyogiki Vishwavidyalaya, Bhopal, tawhta achupapuapa a châ hra.