Manchester Derby : Liverpool midfielder James Milner ta Manchester United ei châh aw a ta

Liverpool midfielder James Milner chata a hrochhôhta a eikhana awpa ta, Manchester Derby, Pakhy zâ (24.4.2019) liata Manchester United nata Manchester City amâ khaih tita United â châh aw, tahpa ta, anodeikua amâ khaihpa he moh vana, a ta.

City he atahmâ duasu liata khaih kha ta a khaih chyh via chypa ta, Liverpool hlâta Point 2 ta â hnai via ei ta. Pakhy zâ liata United ama pahnie khiahta cha Premier League liata sâkhana ama kaw châ ha aw.

Milner chata United â châh awpa chôchâh ama hiahrihna cha, "Ei hro chhôhta a eikhana awpa ta ei châh aw” tahpa ta, "Châhrasala amâ khaihpa moh vana. Khâpa ma ei tao aw tahpa deikua reih thei mâh vana, khôtho lâ chhao pati ei nie thlâh ha thei" a ta.

Kô 1989-1990 rakha tawhta English Champions châ achhuahpa, Liverpool, heta khaih 35 tawhta Point 88 hmô ha ei ta, Man City heta khaih 34 tawhta Point 86 ama hmô hai hra.

Man City heta Premier League liata khaih 4 amâ kaw khaih heih awpa hryta Old Trafford liata amâ iekhyh zôzawpa, Man United he ama pahnie tlai khiahta, amâ kaw khaih heih awpa hropazy he a rairu muarua khao na ta pangiasa a chhih leipa ta, Nyungiapa chalo theina daihti ryhpaohpa ama hnei pha kaw. Cha nota, City heta United he pahnie leipa ei sala, Liverpool heta amâ khaih heih awpa zydua liata pahniena ama to khai khiahta cha ama Champion thei pyly hra. Chavâta, mylâ Pakhy zâ liata Old Trafford liata City nata United akhaihna he Liverpool châta cha akhaihna peimawh kawpa a châ.

James Milner chata, "Season chhôh zydua liata ei kha ngâlâh pahniepa ta y pi ta, nyungiapa eima chalo lei tlai khiahta cha vâsâh â chhih kaw aw" tahpa ta, "Eimâ kaw khaih heih awpa zydua liana heta pahniena eima to khai awpa â ngiah. Pahniena kaw to khai h’aw sihla, Man City ta nyungiapa ama chalo pyly khiahta la, ‘Man City nama tao pha kaw’ tahpa deita na rei awpa eima hnei aw” a tah hra.