Mara Boxer : Ama unawhta Mizoram Boxing Championship Gold Medal ama la

Atliata liata All Mizoram Boxing Championship 2019, Aizawl liata hneipa liana khata, Siaha tawhta Boxer hluhpi ta hlaotlohna to ei ta, Gold medal ama kaw phaoh. Cha nota, Meisavaih, Siaha liata Unawh panozy chata Kg 34 nata Kg 36 Category liata ama unawhta Champion raihriepa ta, Gold Medal ama la raihrie. He hawhta Mizoram pahlypa ta unawhta Boxing gold medal a la theipa he ama y zôzaw leipa ta pahnopa a châpa vâta henah unawh thâtih heta zawpi rei a hlao kaw.

From L-R : LH Beihneisa & LH Vasupha

Meisavah, Siaha liata Puhpa LH Vabei sawchapaw pano – LH Beihneisa nata LH Vasupha zy chata, Mizoram pahlypa ta BOXING CHAMPIONSHIP laipa liata amâ chôna Category raihrie liata Gold Medal lapa ta, Mara moh ama paphasa hleikhôta, Mizoram Boxing thâtih liata hmo a tlô zôzaw leipa ama patlôsa.

Henah unawh liata a uhthei viapa – LH Beihneisa he Kg 36 liata â chôpa ta Gold Medal la, a hawti viapa LH Vasupha heta Kg 34 liata â chôpa ta Gold a lapa hleikhôta, ‘Most Promising Boxer (Boys)’ liata â tlyhpa a châ hra.

He hawhta Meisavaih chapaw thyudyupa pano, unawh zy hlaotlohna liata tha a thyu hluh kawpa deikua, ama Coach/Trainer, Mara Boxer phapa, L.Beirapathai châ ta, ano chhihthana nata mohôhna ry liata hlaotlohna ama to chhao eima tah thei aw.

He hawhta Meisavaih dei châ leipa ta, Mararâh mohpaphatuhpa unawhzy he Meisavaih liata machâ sahlaozy ta pasô kaw ei ta, ama O lâ chareipa ta alykheina daihti ama hmâh hleikhôta thlahzy chhâpa ei ta; ama paw, Puhpa LH Vabei ta a sawchapaw panozy hlaotlohna heta vao thiepa ta alyna â chhuahnoh hra.

Eimâ lykhei ngaita kaw. Ama hmialâ daihti châta khokheina eima hlâ.