Reliance JIO ama pachhâsa hmeiseih ha aw mâ?

Atliata liata Reliance Communication ta Mizoram chho lâta Tower Security zy hlao ama pie thei leipa vâta Security zy ta tower ama off-pa vâta Reliance Jio cha hmâ thei khao lei awpa ta a thi awpa hawhta biethâh athata hiezawhpa châ ta, khizaw liata company laipady chaipa a châ haipa Reliance Jio he thi leipa aw ta, zawpizy eima no â pariahs lei awpa ta Reliance Jio hyutuhpazy ta amâ haw.

Khahlâ ta Reliance eima vaw pahno tyhpa kha, Dhirubhai Ambani sawchapaw pano hryta pakha viapa, Anil Ambani-eih Reliance Communications Ltd (R.Com) châ ta. R.Com heta Mobile Phone service daihti khachâ rakhama ama pie papua tawhta nata tower khazie rakhama Mizoram liata ama padua hmâ ha bâ tahpa liata R.Com he sôhthih liata athata tlapahnai (bankrupt) ei ta, service pie pazao khao vei ei.

He khai tawhna heta Anil Ambani unawhpa, Forbes List liata khizaw liata hneirô chaipa 13-na Mukesh Ambani chata telecom lâchhâh liata sôhpaliena avaw ngiahnao heih hrapa ta, Reliance Jio Infocomm Ltd (RJIL) vaw padua ta, telecom sôhdaohna liata athata râh avaw la lymâ hapa a châ. He liata eima pahno awpa cha R.Com (Khahlâ via nota Reliance) nata Reliance Jio hi company he Company alyu leipa, company eihhrâhpa ama châ tahpa he a châ.

Company tlapahnai hapa, R.Com cha yzie hnei muarua khao leipa ta sie hnolo ei ta, Reliance Jio ta Mizoram chhao kô 2015 liata avaw ngiahnaopa ta, tower vâro tlai tao taraw hra ei sala, Company avaw ngia tua viapa R.Com zy ta tower ama vaw bô chiehpazy cha a mâ cheipa ta a hlâhpa ta signal pie papuana khaw sona awpa ta tower hropa tao hlei leipa ta R.Com Tower thokha ama hmâh hra.

Atahmâ duasu liata Reliance Jio ta Mizoram chho lâ (Lunglei Jio Center ry) liata R.Com tower 15 daihmâ hmâpa hai ei ta, palâsa hapa hawhta R.Com zy heta tower Jio ta ama hmâ chypazy mohôhtuhpazy hlao a bâh hluh kaw ei ta, tower security zy hlao a tâh ngâthlâh hapa dycharao n’awpa ta Jio ta ama hmâpa he Tower thokha -

1.Tipâ

2.Lawngtlai

3.Tawipui N

5.Thingfal

6.Theiriat

7.Tuichawng

7.Haulawng

8.Pangzawl

9.Serchhip

Zy he Off ei ta. He zy vâna heta he tower zy tawhta signal piepapuapa hmâhtuhpa JIO CUSTOMER zy ta Network ama hnei thei khao leipa a châ.

Reliance Jio Center, Lunglei chata R.Com ta tower security zy hlao a pie thei leipa vâta R.Com tower off ei ta, Jio hmâhtuhpazy ta rairuna amâ tyhpa he pei ta kaw ei ta, he buana/rairuna he thlaita pathlâpazi a chhuah haipa a châ, ama ta.

Eima pahno awpa cha, atahmâ ta JIO Company nata hmialâ ta Reliance Company kha alyu vei tahpa he a châ. Biethâh do leipa hiezawhtuhpa châ kha ei suh u.