NBA : Tony Parker ta Basketball khizaw a puasai

NBA champion ei palih a châ hapa, Tony Parker, kô 37-ta uhtheipa a châ ha hra bâpa chata Basketball â pahâsai, tahpa zâhnia Abeipanoh khata a phuah.

Image source : USA Today

‘French point guard’ he kô 2001-pa khata NBA khizaw liata a khitlyna pathao awpa ta San Antonio Spurs ta lapangia ei ta, kô 2003, 2005, 2007 nata 2014 lianazy khata NBA Nyungiapa chalokheipa ta, kô 2018 Season khata Charlotte Hornets â pazaopa ta San Antonio Spurs he a puasai hapa a châ.

Parker heta a râh, France châta kô 2013 khata European championship nyungiapa avaw chalo ha hra.

Parlker chata, "Eima hnôhlâ ta Tony Parker tyhpa kha ei châ thei khao tlô vei khiahta cha, keima châta Basketball akhaih ngâthlâh hapa heta yzie hnei khao vei," tahpa ta â pahâna chhâpa a rei.

Parker heta a team thiehpa Hornets châta game 56 akhaih hmâ ta; anodeikua he zydua he Bench tawhta a pathao.

NBA All-star liata ei 6 a hlao theipa Parker chata -  "Lôhiah kawna chôta Basketball cha ei pahâsai awpa â ngiah ha bâ, khitlyna rônah kawpa tlaina a châ! NBA nata France team châta daihti ei hmâpa zydua kha, ramâ lâ chhaota ei khaih beih leipazy ama châ" a ta.