North Korea luhpa Kim Jong Un unawhpa Kim Jong Nam kha CIA châta a hria - Report

WASHINGTON: Kim Jong Nam, North Korean luhpa Kim Jong Un unawhpa, kô 2017 liata Malaysia liata châhmaih (Poison) hmâpa ta ama thie hapa kha U.S. Central Intelligence Agency (CIA) châta a hria tyhpa a châ, tahpa US thâtihbu - Wall Street Journal chata zâhnia Hriatuanoh khata ama palâsa.

He thâtihbu ta ama palâsana dâh liata cha he hmo pahnotuhpa, a moh palâsa leipa ta a reipa châ ta, Kim Jong Nam nata CIA azaokhina hluhpi a ypa hawhta reipa deikua a siahlia kawpa ta pahnopa châ vei. He hawhta a châ nona heta, News Agency miakha - Reuters deikua ta he chôchâh he pasia thei mâh leipa ei ta; CIA hra ta khâpa hmahta he chôchâh liata reihkah pathlie mâh hra vei ei.

Wall Street Journal liata he chôchâh a pahnotuhpa chyhsa pakha ta a reina dâhta cha, CIA nata Kim Jong Nam likah liana heta azaokhina a y, tahpa ta, "U.S. sawhkhâ liata a vaw hria tyhpazy ta ama reina liata cha Kim Jong Un unawhpa, kô hluhpi chhôh North Korea khôtho lâta a pahrâ hapa heta North Korea râhchhôh amohôhna nata, bieru nano nanopa deikua pahno thei thlyu vei" ama tahpa hawhta a palâsa hra.

He hleikhôna heta, Kim Jong Nam he CIA dei châ leipa ta, China nahta chhao amâ zaopa hawhta, Journal heta a palâsa hra.

South Korean nata U.S. sawhkhâ chyhsa zy chata North Korean biehneituhpazy ta Kim Jong Nam thie awpa heta bie pie ei ta, achhâpa cha North Korea liata ama chhôhkha ryureina siekheina dâh a seisia tyhpa vâta a châ. He hawhta a châ nona heta, North Korea deikua ta Kim Jong Nam he ama pathiesapa châ vei, ama vaw tah ha heih hra.

Kô 2017 khata Malaysia liata Kuala Lumpur Airport liata Kim Jong Nam he châhmaih miakha ‘VX’ (atipa) chi hmâpa ta tlahnaopa châ ta, ano tlahnaotuhpazy he chanô pano ama châ. He chanô pano, Doan Thi Huong, Vietnamese, nata Indonesian Siti Aisyah zy heta châhmaih he Kim JOng Nam hmia liata thiapa ta, he vâna heta Kim Jong Nam he a thi hapa a châ.

Wall Street Journal-ta a palâsa lymâna liata cha, Kim Jong Nam ta Malaysia lâ khi a tlyna chhâpa he CIA liata a hrialâhpazy a hmô awpa ta a châpa hawhta a palâsa.

- NDTV