US nahta adaohna hnei awpa cha hmo a thei bohbi leipa a châ – Iran

UN liata Iran vyuhtuapa (Ambassador) chata zâhnia Hriatuanoh khata ‘Persian Gulf’ ziza a sâh haipa cha chi â chhih kaw, tahpa ta, Iran hrie awpa a chhuahna hryta US nahta adaohna (negotiation) hnei awpa cha hmo a thei bohbi leipa a châ, a ta. He hawhta a châ nona heta UN liata US Vyuhtuapa deikua ta cha, US sawhkhâ ta Iran sawhkhâ cha dawhkâh sâkha chadô khohpa ta adaohna hnei khei awpa â chhuah ngâthlâh ha, a ta.

Image courtesy - Reuters

Atliata Tikâtheipa a phaohpa ahluahtheipa tlahnaona nata US Drone ka pathlahpa chôchâh cha, UN Security Council atyuhpahmaohna, United States ta a pahruapa hnei khai tawhta athata reipa châ ta. He hawhta Iran nata US likah liata reikahta â tah chakiana he US President Donald Trump ta Iran hriena awpa ta ‘Executive Order’ a tao tawhta a tlôpa a châ.

Iranian Vyuhtuapa Majid Takht Ravanchi chata US ta Iran hrie awpa ta hriena thiehpa â chhuahnohpa cha US sawhkhâ ta Iran chyhsazy â hao zie palâsana a châ, tahpa ta, US President Trump ryureina chata US nata Iran likah liata ziza sah haipa cha Gulf rachhôh liata a pheisaih nata balyh zy lapakhua sala, Iran zawpizy lâta niebaw hriena hmâpa ta adyuhna a phuahpa zy bâsaipa ta ziza padia ha mawh sy, a ta.

US Vyuhtuapa Jonathan Cohen chata Patô 12 liata tikâtheipa a phaohpa ahluahtheipa tlahnaona nata Chhiepa 20 liata $100 million mâpa US drone kâ pathlahna chôchâh liata Iran baina reih papua ta. He US ta ama baina he Iran heta dythapa ta, Tikâtheipa a phaohpa cha Iran ta a tlahnaopa châ vei, tahpa ta, Drone chhao cha Iran râhchhôh liata â vaw zawpa vâta a ka pathlahpa ama châ, a tah hra.

US Vyuhtuapa Cohen chata, "Iran heta he hawhta US a tlahnaona he a pyh thai rimâ awpa châ vei tahpa pahnothai ei sala eima khoh," tahpa ta, "Khizaw râh hropazy chhaota he kyh liana heta eima chhâh amâ châh bâ hra awpa â ngiah kaw bâ" a ta.

Cohen chata US achhuah chaipa cha, Economic thatlôna nata reikahta adaohna hmâpa ta Iran he dawhkâh miakha chadôkhei awpa he a châ, a tah hra.

He hawhta a châ nona heta Iran Vyuhtuapa Ravanchi deikua ta cha, UN Secretary-General Antonio Guterres ta Gulf rachhôh ziza sah kawpa padia awpa ta ahawna a taopa cha ‘eimâ pyh’ tahpa ta, anodeikua he he Iran tao awpa châ leipa ta, United States tao awpa tlao a châ, a ta.

US sawhkhâ nahta adaohna hnei awpa cha a thei bohbi vei, tahpa ta, “Chyhu miah sathlu ngâthlâh hatuhpa US nahta a daoh aw ma pi; US heta eima Ekawnawmi parao awpa â chhuah” a tah hra.

UN Security Council chata atliata Tikâtheipa a phaohpa tlahnaona cha maochhiepa ta; US nata Iran cha ama likah ziza padia para awpa ta â haw.