FIFA Women’s World Cup 2019 : Khizaw lia USA chanôzy Football ama thai chai

Chanô Football Ataopasuana lai chaipa, FIFA Women’s World Cup Final, Abeihpanoh ta akhaihpa liata United States chata Netherlands pahniepa ta, a ei palihna châta World Cup nyungiapa ama chalo ha heih.

1^st Half liata goal amâ pie thei lei tawhta, 2^nd Half liata Megan Rapinoe ta Penalty tawhta goal a khôpa nata Rose Lavelle ta goal a khôpa hmâpa ta USA heta 2-0 ta pahniena ama to.

USA chanô footballer, ‘Veteran winger’ tah thei bâ awpa Rapinoe heta ‘video assistant referee (VAR)’ hmâpa mochaneipa a châ tawhta USA ta penalty ama hmôpa cha nai zualuahpa ta Netherlands kao chhôh lâ pangia ta USA he hmia a sahkhei ta. He penalty he Barcelona chanô team liata defender Stefanie van der Gragt ta a phei â sâhpâpa ta a chaluahpa cha USA striker Alex Morgan chakho tlamawpa ta, French referee Stephanie Frappart ta VAR âsaohiah tawhta penalty he a pie hapa a châ.

European champions, Netherlands he World Cup amâ khaih tawhta Final ei no amâ ngiana châ ta, 1^st Half liata chhochhi cha USA heta goal khô thei hra vei ei. Dutch team kaovaihtuhpa, Arsenal kaovaihtuhpa parohpa Sari van Veenendaal ta goal cheingei awpa ta pachâpa ei palih a vaw pakhâ.

Châhrasala, 2^nd Half liata deikua âzaopa ta World Cup Final ei thôh â ngia theipa USA, heta ama theina nata thaina palâsapa ta, kô 1991, 1999 nata 2015 liata ama vaw chalo hapa, nyungiapa cha ama chalo ha heihpa a châ.

Rapinoe heta World Cup chhôhta goal 6 khôpa ta, mohropa khô awpa ei thôh taopapâ ta, ‘Golden Boot’ a la hleikhôta, Player pha chaipa lymâ, ‘Golden Ball award’ a lapâ hra.