Siku ama kiah tlaina tahpa pasiana awpa ta amâ ‘Selfie’ lymâ

BARABANKI, UTTAR PRADESH: Uttar Pradesh liata Primary school nano nanopa liata a hriapa Pachutuhpazy ta siku kiah pha vei ei tahpa reipasipasuana a y ngâthlâh ha tyhpa vâta, Uttar Pradesh liata Barabanki district liata biehneituhpazy chata Pachutuhpazy ta siku ama kiah tlaina tahpa pasiana/palâsana châta taozie thiehpa ama hmôpapua. Pachutuhpazy ta siku ama kiah tlaina tahpa pasia n’awpa ta, Pachutuhpazy chata ama phone tawhta nohthlah (Selfie)-pa ta, âmo hleikhôta ama siku nata, siku hawtinah a lâpâpa ta amâ ‘Selfie’ awpa châ ta, he amâ selfie-na nohthlahpa he Education Department Official Website liata ama paphao lymâ ha bâ aw.

He District liata Pachutuhpazy ta cha atahmâ tawhta cha Class chhôh amâ ngia hlâta ama phone ta â ‘Selfie’ cheingei bâ awpa a châ ha bâ. He ama nohthlahpa he he District khihpi liata achuna biehneituhpa, Basic Shiksha Adhikari (BSA) Official Wensite liata my dawh hlâta paphao lymâ awpa ta biepiepa ama châ hra. He hleikhôna heta – Nohthlah amâ la nona heta ama pahneih awpa châ leipa ta, amâ pahmeiseihsa kaw awpa a châ.

He hawhta Pachutuhpazy SIku kiana dâh khâsiana thiehpa he ''selfie attendance metre'' tahpa châ ta, Barabanki District liata Pachutuhpa 7,500 a pahly aw.

He hawhta hmah ama la hlâta ama duasu reihpa ta, Medha Roopam, Chief Development Officer, chata, Siku a kei mohpasia tyhpa he Pachutuhpa â khophie dua vaw y tyh vei ei, a ta.

He hmahlana ama siekhei tawhna heta, Barabanki liata Pachutuhpa, siku ama kiah tlai tahpa pasiana awpa ta ‘Selfie’ nohthlahpa a paphao leipa Pachutuhpa 700-zy hlao cha amâ ‘Selfie’ leipa vâta ama kâ (Cut)-pa ha hra. A ‘Selfie’ leipa maih he ‘Nohkha hlao’ ama kâ lymâ.