India ta ‘Chief of Defence Staff’ a hnei aw – PM Modi

Pohbienoh ta India Khotalaina Noh Alyna daihti hmâna pi chaipa, Red Fort, New Delhi liata bie a reina liata, India Prime Minister Narendra Modi chata India pheisaih kyh nahta ahniahnipa hmo liata abyuhna nata ângiahna maih liata Sawhkhâ pasopakâtuh awpa, ‘Chief of Defence Staff’, taopa a châ aw, a ta.

PM Modi chata, "Eima pheisaihzy he India apalaina châ ei ta. India pheisaih nano nanopa likah liata hriaparaohna tiah viapa/pha viapa a y thei n’awpa ta, Chief of Defence Staff (CDS) taopa a châ aw," a ta. PM chata, "He heta India pheisaihzy cha athata ama tha a patlô via heih aw” a tah hra.

He CDS tao awpa he kô 72 chhôhta India sawhkhâ ta ‘Defence Reform’ a taopa hryta lai chaipa tah thei awpa châ ta. India Pheisaih liata aluhpa pakha, Lt General DB Shekatkar chata he hmo India thâtih liata bietluna laipa nata ngiatlâhpa a châ, tahpa ta, he hmo he kô 2016 liata ano chhihthana ry liata Committee ama paduapazy ta sawhkhâ hnohta pahruana ama pangiapa a châ, a ta.

He CDS tao awpa heta kô 2000 liata Kargil Review Committee (KRC) ama paduapazy ta hmo ama hmôpa achupasia awpa ta paduapa, Group of Ministers (GoM) ta pahruana avaw tao hapa kha a châ.

Kô 2001 Patô thlâpâ liana khata, he GoM, Minister of State for Defence Arun Singh chhihthana ry liata paduapa khata CDS tao awpa heta pahruana vaw tao ha ta. Ama pahruana hawhta cha he CDS heta 'India Strategic Forces Command mohôhna biehneina hnei aw ta, he chôchâh liana heta sawhkhâ a pasopakâ tyh aw' tahpa a châ.

He pahruana he a pyhpa tlyma hlaopatlohpa tlyma châ beih leipa ta, kô 2016 liata Lt General Shekatkar Committee khata ama pahrua chanei heih hra. Kô 2012 liana chhao khata CDS biehneina awpa bâhta panano viapa, Naresh Chandra Task Force on Defence Reform khata ama pahrua ha heih hra.

Pohbienoh ta bie a reina liana heta, PM Modi heta he CDS he khati tawhta ma taopa châ aw ta, khati tawhta ma a rai a hria pathao aw, tahpa palâsa leipa ta. A chatliena lâta ama tao awpa ta deikua pangiasapa a châ hai.

He CDS raihriatuh awpa heta chyhsa pano moh avaw luahpâ ha ta - Air Chief Marshal BS Dhanoa, atakô târi 30 Thlarâh liata pension ha bâ awpa cha ‘Seniority’ lâ tawhta mopa ta â phuh chai ta. Ano Chairman Chiefs of Staff Committee, a châ hai.

A panona ta Army chief General Bipin Rawat, atakô Di noh 30 ta pension ha bâ awpa he châ heih hra ta. General Bipin Rawat he Army chief a châna hawhta India pheisaih phu 3-pa zy luhpa châ ta, he vâna heta ano he CDS a châ thlâh ha thei hra.