UN Security Council liata J&K chôchâh reipahmaoh aw

UNITED NATIONS: Atanoh Chutyh zâ dawh 7:30Pm heta Pakistan ta â hawna hawhta, UN Security Council chata India sawhkhâ ta India Dâhpipa liata Jammy & Kashmir duasu eihhrâhpa a piena, ‘Article 370’ phiena chôchâh cha ama reipahmaoh aw.

UNSC liata Pakistan viasa pha chaipa China, chata he chôchâh he ‘Reipahmaohna anyuthupa’ (closed consultations) hawhta hnei awpa ta UN Security Council liata a tlôkheipa hawhta he hawhna heta reipahmaohpa a châ aw.

UN liata vyuhtuapa chyhsa pakha ta India News Agency Press Trust of India a chhona dâhta, China chata UN Security Council hnohta bie pachia awpa 'India Pakistan Question' tahpa cha ‘Reipahmaohna anyuthupa’ tahpa pachia awpa ta ahawna pangia ta. "He ahawna heta Pakistan ta UN Security Council President hnohta châ ama pangiapa chyh-eihna a châ," tahpa ta he UN liata vyuhtuapa chyhsa pakha heta PTI he a chho hra.

UNSC Atyuhpahmaohna anyuthupa (Closed meetings)-rai rai he ama bie pachiapazy tlyma zawpi lâta phuahluahpa châ beih leipa ta, pakahta bie ama reipazy chhao ropa ta sopa châ beih hra vei. He hawhpa atyuhpahmaohna he cha UN Security Council atyuhpahmaohna tyhpa hawhta hneipa châ leipa ta, palâhâhpa châ hra vei.