Kashmiri zawpizy cha râhsa ama byh liata ama hraikhôpa hawhta kohki haipa ama châ – Iltiva Javed, J&K CM parohpa sawchanô

SRINAGAR : Jammu & Kashmir Chief Minister parohpa Mehbooba Mufti sawchanô chata a ei no n’awpa ta a ao ngâlâh hmâpa bietana (‘Voice Message’) papua heihpa ta, a nô ama patu tawhta ano tlai chhao khôtho pua thei lei awpa ta hraikhôhpa a châ, a ta. Iltija Javed heta India Home Minister Amit Shah chhao châpaphaopa ta, "Media chyhsazy hnohta reikah a pathlie heih khiahta la a chô liata kheihawhpa hmo rai a tlô thei aw” tahpa ta pachhiparypa a chânazie a rei hra. A châpaphaopa liana heta, "Kashmiri chyhsazy cha râhsa hawhta byh liata hraikhôpa ta y hai ei ta, chyhsapa ama châna hawhta amâ dona tovyuh zy chhao dythapa a châ” a tah hra.

India sawhkhâ ta Kashmir akohkina chata noh 12 tloh hapa ta, Kashmir liata Political Party chhihthatuhpa nano nanopazy cha patupa ama châ hra. Chief Ministers parohpa pano -Mufti nata Omar Abdullah – zy chhao patupa hry liana heta amâ hlao hra.

CM parohpa Mufti sawchanô chata, "Atanoh (Pohbienoh) ta India râh su hropazy lâta India Khotalaina Noh amâ ly ngâkaw nota, Kashmiri zawpi deikua râhsa ama byh liata ama hraikhôhpa hawhta kohkipa châ pi ta, adona tovyuhpa eima hneipazy chhao dythapa eima châ" tahpa ta Amit Shah hnohta châ a paphaopa liana heta a ro. Ano avaw tlytuhpazy cha O chhôh amâ ngia hlâta padisa pakhuapa châ ei ta, khâpa hmahta pahno leipa ta, O chhôh tawhta a pua awpa pasaih hra vei ei, a tah hra.

Home Minister hnohta a châpaphaopa liana heta, ano cha khâpa vâta khôtho pua thei lei awpa ta kohkipa ma ama châ tahpa chhopasia awpa ta ahaw ta, pheisaihzy ta ano ama chhona dâhta ‘Media chyhsazy â pakyhpa vâta’ kohkipa ama châ, tahpa ta ama chhopa cha a hmeiseihpa a châ ma, a tah hra. Mufti sawchanô heta, "Media chyhsa hnohta reikah a pathlie heih tlai khiahta cha a chô liata kheihawhpa hmo rai a tlô thei aw," tahpa ta pachhiparypa a chânazie a châpaphaopa liana heta a roh hra.

CM parohpa panoh - Mehbooba Mufti nata Omar Abdullah-zy cha khôtho pua thei lei awpa ta kohkipa ama châ tawhta patupa châ ei ta. Ama pahrâna O tawhta Sawhkhâ O lâ ngaikheipa ama châ ha hra.

IAS officer rai bâsaipa ta Politics akhaihtuhpa Shah Faesal chhao Pakhynoh khata Delhi airport liata patupa châ ta, Srinagar lâ paphao hapa châ ta. Srinagar liana heta Public Safety Act liata hraipa a châ hai hra.