Jammu & Kashmir : Su nano nanopa liata buana a tlôpa vâta a pachyu viapa ta kohkina siekhei

Srinagar, Aug 18 (PTI) : Zâhnia Abeipanoh tawhna khata Jammu & Kashmir khihpi, Srinagar su nano nanopa liata buana a tlôpa vâta kohkina (Restriction) pachyusa via heihpa a châ.

Noh 14 chhôh cha Jammu & Kashmir kohkina siekhei hapa châ ta. Pachyhzâ liana khata Srinagar su thokha liata buana tlôpa liata zawpi, palôhtlâhleina palâsapazy ta pheisaihzy cha alô ta tlahnao ei ta; he vâna heta kohkina he a pachyu viapa ta siekhei ha heihpa a châ.

Reuters ta a palâsana dâhta cha, Pachyhzâ liana khata Srinagar su nano nanopa liata palôhtlâhleina palâsana tlôpa ta, henahzy heta India pheisaihzy cha alô ta tlahnao ei ta. Pheisaihzy he mothlihtlana hlyu (Tear Gas) nata hârie Meithei ta ama ka palie hra. Hmahphaohpa nata thina-leina a tlô nata tlô lei deikua thâtih siapa palâsapa châ vei.

Sawhkhâ biephuahtuhpa Rohit Kansal ta a reina dâhta, Pachyhnoh khata Police Station 35 ôna chhôh zy liata kohkina siekheipa cha bâhta pazie-ysa viapa châ ta. Anodeikua, su nano nanopa liata palôhtlâhleina palâsana nata pheisaihzy tlahnaona a tlôpa vâta kohkina he a pachyu viapa ta siekhei ha heihpa a châ, a ta.

He hawhta a châ nona heta, su thokha liata Landline bie achhona pahropa châ ha heih ta; Internet nata Mobile Phone zy deikua hmâ theipa châ mâh vei.