Himachal Pradesh liata athata vâsuahpa ta chhiena a tlôkheipa liata chyhsa 24 ama thi

Saopi daihti vâsuahpa chata India Maw lâta State nano nanopa liata rairuna tlôkhei pazao lymâpa ta, zâhnia Abeipanoh khata tilaipa nata leichopa vâta chyhsa 30 ama thi ha heih.

Vâ athata a suahpa vâta chhiena a tlôpa hryta rarô-y chaipa tah thei awpa liata, Himachal Pradesh state liata chyhsa 24-zy cha tilaipa nata leichopa liata thi ei ta, khitlypa vâro tlai amâ tâh hai hra. He hawhta a châ nona heta Yamuna chavah laipa ta chichhihpa ngiana a kaw khô daihmâpa vâta Delhi, Haryana, nata Uttar Pradesh State zy cha amâ hrohrua hai hra. Sutlej chavah laipa ta rairuna a tlôkhei haipa vâta Punjab District sâcharie-zy liata abyuhna nata ângiahnazie lymâ hawhta a pielyu thei awpa ta pheisaihzy chhao amâ mâ liahsa ha bâ.

Punjab State liata District sâcharie liata khih 250 tlaita rairuna a tyh hai ei ta – he hryta Ropar, Nawanshahr, Jalandhar, Kapurthala, Ludhiana, Tarn Taran, Moga nata Ferozepur – khihzy cha tilaipa a tlô thei awpa duasu liata amâ duah haipa vâta amâ hrohrua kaw. Nohkhih saichhielietuhpa nano nanopazy chata Punjab state liana heta atanoh (Hriatuanoh) lâ chhao athata vâ a suah heih aw, ama ta.

Himachal Pradesh chata zâhnia Abeipanoh khata a vâ suah hluh chaina daihti a tyh ei ta. India Meteorological Department ta ama reina dâhta cha, Himachal Pradesh liana heta Abeipanoh khata avâ, 102.5 mm suah ta, he he nohkha chhôhta vâ suah hluh chaipa a  châpa hawhta ama rei hra.

Himachal Pradesh liana pyly heta khitlypa, râh hropa chyhsa â hlaopa ta chyhsa 150 tlai Lahaul-Spiti district, tawhta pachhapapuapa châ ei ta. Henah sahlao he lâthlôh, avâ thata a suahpa ta a paraopa vâta â tâhpazy ama châ.

Uttarakhand liata cha Uttarkashi district ry liata Mori block ôna chhôh liata a ypa khih nano nanopazy ta athata vâ a suahpa vâta rairuna a tyhpa ta, tilaipa ta O nata lyu a parao hôlô. Mori block ôna chhôh liana heta eikhapi ta tilaipa ta chyhsa 17 hrona la ta; achuna-O zy chhao khawpa a châ hra.