Mizoram châta Central Pool liata MBBS achu theina Quota pachhâsapa a châ

Chutyhnoh khata, Government of India, Ministry of Health & Family Welfare (Deptt. of Health & Family Welfare) chata central sawhkhâ ry liata MBBS achu awpa central pool quota-liata state nano nanopazy seat hnei theina zie awpa papua ta, Mizoram chata Seat sâkha hmahta to leipa ta, BDS-liata deikua seat palih piepa a châ. He hawhta a châ nona heta Mizoram sawhkhâ chata châ papuapa ta, central ta MBBS quota a pachhâsana chhâpa cha Mizoram ta ano State châta Medical College a hneipa vâta a châ, ama ta.

Mizoram heta MBBS achu n’awpa liana heta seat kha hmahta a to lei nota, medical college hnei thlâh ha hrapa Meghalaya chata seat 50 central pool quota tawhna heta to ei ta, BDS seat thôh piepa ama châ hra. Central mohôhna ry liata a ypa medical college yna Nagaland chhao MBBS seat he 40 piepa châ ta, BDS seat he sâthôh ama topâ hra.

Higher & Technical Education Department biepuapa chata, “Central Sorkar chata Ministry of Health & Family Welfare siepahliepa ta Zoram Medical College (ZMC) paduana awpa ta sôh hluhpi vaw pie ta, Mizoram-ta Medical College a hnei ha hra. Zâkô lâ khata ZMC-liata Mizoram cha seat 100 admission piepa châ ta, atakô chhao seat 100 pyly piepa ama châ heih aw.

He vâna heta dâh hawhta Mizoram State chata Central Pool Quota MBBS dao awpa châ khao leipa ta, Central Sawhkhâ hmôna dâh liata sasyh kuphei ta a duah theipa hawhta vaw châ ha ta, he he Mizoram sawhkhâ châta cha hmo lychhih kawpa tlao a châ” ama ta.

India Maw-nochhi State chyh chaipa, Sikkim chata MBBS seat he sâpalih to ei ta, BDS seat he sâthôh piepa ama châ hra. MBBS seat a to leipa hry liana heta Mizoram hleikhôta Arunachal Pradesh nata Tripura chhao a hlao ei ta, BDS seat thôh rairie ama to hra.

- Zalen