Honduras : Football fans a pabuana liata chyhsa 3 ama thi

Honduras khihpi, Tegucigalpa liata Football Club achâhtuhpazy likah liata buana a tlôpa liata chyhsa 3 thipa ta, chyhsa 10 ta hmah ama phaoh.

He buana he, Pachyhnoh ta Montagua nata Olimpia Club-zy akhaih chyta liata avaw thaopa châ ta. Olimpia club a châhtuhpazy ta Motagua team kiana bus, alô ta ama tlahnao tawhta he buana he avaw thaopa ta, bus ama tlahnaona liana heta Player pathôhta hmah ama phaoh.

Biehneituhpazy ta he hawhta hmo a tlô hapa vâna heta akhaina chhao siekheipa châ khao aw vei, tahpa phuah ei ta; he tawhna heta amâ khaihna awpa su, National Stadium khôtho nata a chhôh lâta zawpi chhao bua pathaopa ta, atuvina athata tlôpâ lymâ ta. Reuters ta a palâsana dâhta cha, "Chyhsa pathôh thi ei ta, mohropa pasaripazy cha chaizôh ta viepa nata Meithei ta kapa ama châ. Ama hryta pakha chhochhi cha chapaw hawtipa châ ta. Hmahphaohpa hryta chyhsa 3 cha ama duasu a pha lei kaw," ama ta.

He akhaihna ama pathao hlâ tawhna heta akhaih moh awpa zawpi 10,000 hlâta hluh viapa zy cha Stadium liata y ha ei ta. Buana â vaw thao tawhta zawpi he arâchhiechhupa ta, Police-zy ta buana taotuhpazy ama pakhâna liata athata amâ chatichatâ hra.

Motagua club chata ama Team Bus raona dâh nohthlahpa nata ama Player zy thohna-O liata ama mohôh nopa nohthlahpa tawhpapua ei ta. He nohthlahpa liata player zy he Emilio Izaguirre, Roberto Moreira nata Jonathan Rougier-zy ama châpa ta reipa ama châ.

Celtic player parohpa Izaguirre, Honduras ti nata râh chyhsa heta atliata liana khata kô kha châta, Motagua he â vaw pazao hrapa a châ.