Premier League : Frank Lampard ta pahniena to thei mâh vei

Stamford Bridge liata Player hawhta châ leipa ta, Coach hawhta a kua heihna liata Chelsea Player rônahpa a châ tyhpa, Frank Lampard ta pahniena hmi hmô thei mâh pyly leipa ta, ama khichhaipa, Leicester City kao lâta goal ama khô tua tawhta, amâ pahniethai ha heih.

Image Source - Getty Images

Chelsea hmia a sahna he, Midfielder, Mason Mount ta a khôpa châ ta. Chelsea heta akhaihna ama pathao pasu thlâh na ta goal kha ama za khô tawhta a khaih chhie via lymâ ei ta, 2^nd Half liata chhochhi la, Chelsea he amâ chaphie-chadawh tah thei awpa ta amâ khaihna dâh pha muarua leipa ta. Amâ khaih chhiena zawzi ta Leicester City châta Wilfred Ndidi ta goal khôpa ta, 1-1 ta amâ chhaih hapa a châ.

Chelsea tlyliah, Stamford Bridge liata zawpi atyuna - Matthew Harding Stand nata Shed End lâ tawhta akhaihna ama pathao hlâta pyury pha kawpa nahthlie awpa atliata tawhna khata y tu khao leipa ta, anodeikua ama Player rônahpa, Coach hawhta a vaw kua heihna liata deikua pyury pha ta, Lampard tlai chhao Chelsea a châhtuhpazy ta amâ vaw ly-uana dâh chata a palôh a pahnie kaw.

Lampard heta Chelsea Coach hawhta akhaihna a hmiachhy tuapa ei thôh liata pahniena to thei mâh leipa ta; Premier League a hmiachhy tua chaina liata 4-0 ta Manchester United ta vaw pahnie ei ta, UEFA Super Cup liata Liverpool cha Penalty liata pahnie heih vei ei. He heta Lampard pachâna nata a ngiatlâh liata phaohri a pie baichhapa alyu kaw.

Abeipanoh zâ ta Leicester City ama vaw khichhaina akhaihna liata deikua Chelsea heta pathao pasu ei ta, minute 7-na liata Mason Mount ta hmia amâ sahna goal a za khô pâ ha hra. 1^st Half minute 25 chhôh chhochhi cha Leicester City kao chaby ama by pahnie kaw.

Chelsea hmia a sahna goal khôtuhpa, Mount he Lampard ta Derby County liata Season hmiatuapa chhôh zydua liata a vaw mohôhpa, a Player pahnopasiapa châ ta. He kô 20-ta uhtheipa daihti kaw sie lymâ awpa liata Blues châta Player peimawh kawpa a châ thei na ta pangiasa â chhih. Lampard ta Ross Barkley, hlâta a pangiasa tua viapa chhao he taochhei vei.