Lok Sabha MP pano ta J & K chôchâh liata sawhkhâ bietluna Supreme Court liata amâ khopalie

Jammu & Kashmir liata Political Party miakha, National Conference chata atanoh khata India Court a sâh chaipa, Supreme Court liata India sawhkhâ ta Jammu and Kashmir duasu a pananopa cha, Jammu & Kashmir zawpizy adona tovyuh chhuna a châ, tahpa ta amâ kho.

National Conference chata Parliament bietluna he a do vei, tahpa ta, India President ta Jammu & Kashmir chôchâh liata biepiepa (Order) a taopa cha Dâhpipa chakhiapa/dâhpipa siezie a châ leipa (unconstitutional) a châ tahpa ta, President Order cha ‘bieruapa nata yzie hnei leipa’ a châ, ama tah hra. (News na rei nota Advertisement nohthlahpazy he miah vaw hmiepa tyh hra ma y)

He Supreme Court liata India sawhkhâ bietluna â khopalietuhpa he Mohammad Akbar Lone nata Justice (rtd) Hasnain Masoodi, National Conference Lok Sabha MP zy ama châ.

Lone he Jammu and Kashmir Assembly liata Speaker avaw châ hapa châ ta, Masoodi he Jammu and Kashmir High Court liata Judge a vaw châ hapa, kô 2015 liata ‘Article 370 he India Constitution liata dâh a ipa (Permanent’ a châ tahpa ta bietluna a vaw tao ha tuhpa a châ.

Henah pano heta Jammu and Kashmir Reorganisation Act, 2019 nata he dâh hmâ pasaina Presidential Orders cha amâ khopaliepa a châ.

Henah pano heta Presidential Orders cha Jammu & Kashmir zawpizy lâta adona tovyuh, Article 14 nata 21 ta  a piepa "Dâh chakhiapa nata paraona (illegal and violative)" a châ, ama ta.