Rev.Thylua Hlychho pathliena ama hnei

Dt. 09. 08. 2019 : Rev. Thlylua Hlychho nata Machâ N. Pasua zy cha ama rai tawhta ama vaw pension hapa vâta atanoh kha ECM Assembly Staff Welfare Committee ta kyhchhina ta ama pathlie.

He daihti he Lorrain Hall, ECM Assembly Office liata hneipa châ ta,  K/machâ K. Luakhai, Vice chairman, ASWC ta a chhihtha.

Rev. Dr. S.T. Zawsi, ES (Edn) ta devotion hnei ta, pension hapazy ta biereina hnei ei ta, ASWC lâ tawhta Rev. C. Beima, Moderator nata Rev. T. Salaw, ES (misn) zy ta biereina ama hnei hra.

ASWC lâ tawhta hmosaipiepa hlâna hneipa a châ hleikhô ta staff akhohpa maihta hmosaipiepa ama hlâ chyu hra.

Program a chhâ tawhta pathliena kyhchhi aly kawpa ta ama dôh pâ hra.

Rev. Thylua Hlychho he kô 1983 Patô, 02 khata a rai apazao ta, kô 36 tlai a hria tawhta dt. 07. 05. 2019 khata a pension.

Machâ N. Pasua he kô 1982 Patô, 15 khata a rai apazao ta, kô 37 tlai a hria tawhta dt. 28. 07. 2019 khata a pension hra.

Rev. Thylua Hlychho nata Machâ N. Pasua zy he chyhsa reikah nai kawpa rairie châ ei ta, Tôkalô khih puapa rairie ama châ heih hleikhô ta ama hawti no tawhta apakyh kaw tyhpa châ ei ta, Tôkalô liata ama y nota opa ahnia kawpa ama châ hra.