US President Trump ta Greenland chalei awpa â chhuah!? - A hlaotloh lei hmi kaw
US President Donald Trump ta, khizaw liata liahpahlôh laichaipa, 'Greenland' chalei awpa â chhuahpa cha Greenland heta, 'Ama râh cha chalei awpa chi/zuapa châ vei' tahpa ta amâ chhypalie.
President Trump heta Denmark ry liata sawhkhâna eihhrâhpa hneipa ta a mohôhpa râh, (Autonomous Danish territory) Greenland chalei awpa chôchâh he ano chhosietuhpa (Advisers) zy nahta amâ tyupahmaih nota a reipa châ ta. Châhrasala Greenland sawhkhâ chata tlokhuh dythapa ta : "Sôhpaliena awpa su nama tlua khiah eimâ pahy kaw la y, châhrasala zuapa chi châ vei eima râh he."tahpa ta Trump he amã chhypalie.
Greenland liana heta maluh 56,000 pahrâ hai ei ta. He hryta 90% he cha a râh leilô liata vaw pahrâ tuapa, Greenlandic Inuit chyhsa ama chã.
Greenland he dáhhawhta 80% ta a khupa râh châ ta; khizaw noh palo lymâpa vâta dâhhawhzy he ti via lymâ hai ei ta. He heta a leilô liata leilô hneirôna a ypazy thaohpapuana kyh liata naosia vian a tlôkhei lymâ hai hra.
President Trump biereipa he Denmark Politician-zy ta chhao thlai chyh-eihpa ta, "Adôveina Noh liata sai ama sopa (April Fool's Day joke) a châ cheingei aw..châhrasala a daihti lei kaw!", tahpa ta Danish Prime Minister parohpa Lars Lokke Rasmussen chata a twitter liata a tawhpapua hra. Châhrasala, he thâtih papuatuhpa, 'Wall Street Journal (WSJ)' chata President Trump heta a biereipa he a tah hmeiseih kaw, saisopa châ vei, a ta.
Khizaw thâtih eima saipalie khiahta cha, pheisaih thatlôna hmâpa ta râh hropa ama kei lapa cha y tyh tlai ta; phusâ hmâpa ta râh hropa chaleipa he a y tyh tlai ma moh tua ei suh u :
Kô 1803 liana khata 'Louisiana Purchase' tahpa dãh ry liata, US sawhkhã khata 827,000 sq miles (2.1m sq km) ta a kawhpa Louisiana kha France ku yawhta $15m (£12.3m) ta a vaw chalei. Kô 1867 khata, US ta Russia tawhta Alaska kha $7.2m ta a vaw chalei ha heih hra. He khai tawhna heta US heta Danish West Indies cha kô 1917 khata chaleipa ta, US Virgin Islands tahpa ta a moh a thla.
No comments