Article : Mara reih noh (Mara reih day) by J.Ruben, Siaha

Marâpa ta eima kholei awpa hmo miakha cha, eima reih (Marâ reih) he a lei ha aw tahpa châ sala ahy hmahta khoh tlâ ma pi. Atahmâ he eima reih (Marâ reih) cha lei mâh leipa ta, pakah ta eima reipa hlâta eima châ rozie liata deikua cha hmia (face) hluhpi eima pahneisa ngâ kawpa a lyu. Hmo hiana châpaphaopa roh la, Marâpa saw cheingei chyhsa nano nanopa pareisa la, ama khozie nata ama rozie ânano ha aw. Chavâta Mara reih cha hmia (face) hluhpi eima pahneisa ngâ kaw tahpa châ vei ma? Marâ reih ta châ arohtuhpazy pi he Marâ reih dopa thapasapa ta châ a rohpa ma eima châ tly? Marâ reih châ rona kyh liata a chaluah-chalâh khohpa vâta a ropa ma eima châ tly? Marâ reih thapasana hmeiseihpa vâta arotuhpa eima châ khiahtala Marâ râh châta ‘Chhaolei’ phapa tlai ama châ hmeiseih aw.

Marâ reih cha hmia (face) kha hneipa ta a rohzie eima tao thei awpa a châ no ta, atanoh taihta miakha ta hmâh thei mâh ma pi. Political Party, NGO’s zy cha hmahsie n’awpa ta eima Siaha Khihpi liata Assembly/Conference, etc a awpa ta ama vaw tlô pakhy tyh. Anodeikua cha Marâ reih rozie a lyucho kawpa ta eima hmâh chyu thei n’awpa ta hmah alatuhpa deikua y tlâ vei ei. Marâ reih thapasatuh do kawpazy ama thyu a daih hapa ta ei pahno. Eima reih vâta Committee chyhnawpa nata Board zy cha paduapa châ tyh tlai ta, Châhrasala he Committee/Board chyhnawpa heta Marâ saw hluh viapa ta eima dâhphina he maniah papai thei vei ei chi. A chatlie viapa ta hmah nama la via awpa a byuh hmeiseihpa ta pahnopa a châ.

He hawhta hmah lapa châ sala; Marâ râh khih to liata châpaphaopa taopa châ sala, khih kha tawhta Maluh pasari tlyma a raopa ta, Marâ reih rozie a lyupa ta eima hmâh thei n’awpa ta Siaha khihpi liata tlôpakhyna hnei sih la, Pachâzie alyu leipazy chhao reihpahmaoh ei sih la abyuhpa a châ khiatala kyhchhhina chhao hnei ei sih la, he eima tlôpakina liana heta ‘MARA REIH NOH (DAY)’ eima cha-y tyh awpa noh rao sih la, ‘MARA REIH DAY’ phuahpa châ sala a phapa ta ei pahno.