India satlia 1 ta Russia adyuh awpa ta Ukraine Pheisaih a pazao

COIMBATORE : Tamil Nadu thyutliapa, kô 21-ta uhtheipa, 'Aerospace engineering achuhaipa pakha cha, a dohta a tloh leipa vâta ei no tlai Indian Army apatlâhna tawhta vaw tla ha ta, châhrasala Pheisaih a châ thei leina chata a hnabei padysa vei. Atahmâ cha he Tamil Nadu satliapa he Ukraine Pheisaih liata a ngiapa ta, Russia a dyuh awpa ta 'Georgian National Legion paramilitary unit' a pazao ta; he Unit liata pheisaihzy he sasyhta veiseihpa ta â vaw piepazy (Volunteers) zy sai ama châ.  

India sawhkhâ Intelligence lâ tawhta ama palâsana liata, he satliapa, Sainikhesh Ravichandran, Subramaniyampalaym khihpa, Thudiyalur, Coimbatore liatahpa heta atlia khata a nô nata pawzy a hmô ta. Noh 2 a khôpa liana khata, a thâtih nata Ukraine Pheisaih a pazao awpa ta bietluna a taona chhâpazy sawhkhâ hnohna heta ama pangia.

A chhôhkhazy heta he satlia he Ukraine tawhta vaw kua awpa ta athata ama thlyu tarawpa ta, vaw kua khoh vei.

He satliapa heta kô 2018 liata Siku a patlô tawhta, Indian Army a pazao awpa ta Pheisaih a patlâh ta, châhrasala tloh vei. He hleikhôna heta US consulate, Chennai, liatahpa chhao American army a pazao theina kyh a hiahrih ha hra. American Army a pazao thei vei tahpa a pahno tawhta kô 2018 liana khata National Aerospace University, Kharkiv, Ukraine liata achuna a pazao hapa a châ.

India Pheisaih tloh hra vei sala, atahmâ cha Ukraine Pheisaih hawhta Russia â dyuh hai ha bâ.