MADC : Chairman thiehpa chata Puhpa N.Viakhu

Siaha, 18 Patô, 2022, Pakhynoh – Atanoh my dawh 10:30 Am pa ta Mara Autonomous District Council (MADC) Session Hall liata Pro-tem Chairman Puhpa K. Hrahmo, MDC, Chakhei biatuhpa chhihthana ry liata 12th Term MADC Chairman atlyna hneipa châ ta, MNF & INC Joint Legislature tawhta Puhpa N. Viakhu, Siaha South-I cha atlypatlohpa a châ.

Zâhnia târi 17.5.2022 pa ta Chairman châta nomination file daihti pahypa châ ta, MNF & INC Joint Legislature tawhta Puhpa N. Viakhu, Siaha South-I biatuhpa ta file ta, BJP Legislature tawhta Puhpa N. Zakhai, Amôbyuh biatuhpa ta a file hra.

Atanoh election result a phuah khai tawha Puhpa K. Hrahmo, Pro-tem Chairman chata Chairman thiehpa alykheina bie rei awpa ta BJP tawhta group leader Puhpa M. Laikaw, MDC, Tokalo biatuhpa hrua ta, Puhpa M. Laikaw chata Chairman thiehpa Puhpa N. Viakhu he house leader a vaw châ chiehpa, experience avaw hnei chiehpa châ ta, chachata ta atakô Golden Jubilee eimâ ly kô liata House chhihtha awpa ta Chairman châta atlypatlohpa a châpa cha palôru hmeiseihpa ta a lykheina bie hlâ ta, Mararâh Ryureina sâh chaipa eima hneipa liata house zachhihna he ano chhihtha ry liata pabohsa thei aw ta, ano chhihthana ry liata ryureina dopa, ryureina pathaihpa nata ryureina siapa ta miah a chhihtha aw tahpa hnabeiseihna a pahnieh tahpa a reih. 

Sawhkhâna thiehpa vaw pih aw ta, ruling nata opposition zy vaw y aw ta, Chairman châna lâ tawhta Party palôruzy siesaipa ta ryureina dopa nata pathaihpa a sie khei aw tahpa hnabeiseihna a hnei tahpa reih ta, ahawna chhao a tao hra. Khazohpa ta sonazy, novâhnazy, thatlônazy tobi sa la, 12th term he apalâ kawpa ta a siekhei awpa ta khokheina hlâ ta, sawhkhâna thiehpa a vaw pi ti ta, Mararâh châta achhuahna goal phapa taopa ta ama chhihtha awpa a khozie reih ta, opposition, ruling tahpa y leipa ta râh châta hria lymâ awpa ta khokheina hlâ ta, Golden Jubilee eimâ ly kô liata sawhkhâna thiehpa he ta Mararâh zawpi ta a chhih tlâh châpa lâthlô liata kei chakâ lymâ sala tahpa chhao ta khokheina a hlâ.

Puhpa K. Hrahmo, Pro-tem Chairman ta MNF Legislature tawhta Asst. group leader Puhpa HC. Lalmalsawma Zasai, Amôtlâh biatuhpa hrua ta, Puhpa HC. Lalmalsawma Zasai chata Pro-tem Chairman hnoh ta alynabie reih ta, 12th Term MADC General Election apalâ kawpa ta hnei patlôpa a châpa cha â lyzie reih ta, 12th Term MADC Chairman thiehpa apalâkawpa ta apahneisa tuhpa nata MDC ei 7 atlohpa nata MDC liata senior-most a châpa ta a pahnopa Puhpa K. Hrahmo, Pro-tem Chairman hnoh ta alynabie a reih.

Atanoh liata Chairman thiehpa atlyh awpa ta member 25 zy ta apalâ kawpa ta vote ama pathla thei vâta member zy hnoh ta alynabie reih ta, Chairman atlypatloh thiehpa Puhpa N. Viakhu hnoh ta khokheina hlâ ta, alynabie a reih.

Sawhkhâna thiehpa a vaw pih thei nawpa ta thlah avaw chhâ tuhpa zydua hnoh ta alynabie reih ta, Mara zawpi kyhpachâna nata thapasana vâta he sawhkhâna thiehpa he arairu kawpa ta a vaw pih tahpa reih ta, sawhkhâna a tao awpa sianôpa vaw y patoh thei lei ta, zâhnia lâ tawh deikua a a hmihthâ â vaw lâ pathao ha; eima khotlyna la châ ngyu vei; single party ta sawhkhâna tao awpa he eima kho chaipa a châ sai. Anodeikua cha Khazohpa ryraona hawh ta eima khochaina tlô hra v’ei si la, Mararâh zawpi ta noraih kawpa ta ama ypa he Khazohpa ta a paryhsa lei vâta INC nata MNF MDC zy ta Khazohpa liata ahlâna chô ta hriaparaohna eima vaw tao theipa he Mara zawpi kyhpachâna vâta na a châ; azawzâ tlyma, khâpa tlyma châ ma pi tahpa ta a reih. 

Sawhkhâna thiehpa he mylâ zy tawhta a hnie a vaw hno lymâ aw ta, Marapa chi chyhta y pi ta, Marapa INC nata MNF ta sawhkhâna tao hr’aw sila, Mara zawpi châta na eima châ tahpa pahno thlâhna chô ta Mararâh liata apahrâpa zydua ta nama support na cha hiah khoh pi ta, Awnanopa zydua chhao nama thlahchhâ kheina eimâ châ hia hra, khohlei khona vâ tlyma, party apathluana tlyma, a Marapa nata Marapasaw apathluana y leipa sa la, he 12th Term MADC he Marasawzy châta nata Mararâh liata apahrâpazy châta byhnâ a châ thei nawpa ta he sawhkhâna he eima siekhei awpa ta apangiasa na ta, thlah miah chhâ khei awpa nata moral support miah pie chyu awpa ta ei khoh hmeiseih tahpa a reih.

Atahmâ term lia cha opposition thatlô kawpa, member hluhpi y ei ta, âmo vâ chhao he 12th term he tlatlô kawpa ta a sie nahta ei hnabeiseih tahapa reih ta, Executive liata avaw tyuh awpazy maih ta asohsi kawpa nata apha kawpa ta vaw sie chhuah aw ei ta, cha ti ta opposition zy ta opposition role apha kawpa ta ama vaw play awpa ta a khohzie reih ta. Ei 7 tlai MDC atlohpa Puhpa K. Hrahmô, Pro-tem chairman cha Opposition Leader a châ thei leipa chhao a saiheizie a reih.

Executive eimâ vaw tyu ti ta Mararâh eima siekhei nawpa ta a sia kawpa ta eima vaw tao aw tahpa reih ta, opposition advise, suggestion nata house liata ama phana nata Mararâh pha nawpa ta nama siekheipa hawhta ama siekhei hra aw tahpa reih ta, Sixth Scheduled Amendment chhao Puhpa Zoramthanga (CM, Mizoram) ta miah recommend â chhuahpa ta pahno na ta, alaichadai pazi eimâ chhuah tahpa reih ta – atahmâ sawhkhâna he ta Mararâh châta hmo hmeiseihpa Transparency eima palâ lymâ aw tahpa a reih. 

Puhpa N. Viakhu he chyhsa palô nai kawpa nata palô patlâ kawpa châ ta, he hawhta chyhsa phapa MDC term 3 dua a tloh hapa ta Chairman châta eimâ tlypa he Mara zawpi nohâh yna a châ tahpa reih ta, atakô he vâhnei chhih kawpa ta kô 50 vaw tloh ha ta, eima Awnanopa CCI(M) nata ECM chhao aryh ha pi ta, he hawhpa daihti liata MADC apha kawpa ta a kaw sie awpa liata Chairman avaw châ awpa he â phuh tah ta, â palaikheizie reih ta, khokheina hlâ ta, a tlohpakipa eima y leipa hawhta, ano chhao tlohpaki aw vei, member zy ta house zachhina vai khei si la, deichhy si la, thlahchhâkhei si la, he 12th MADC he apha kawpa ta miah â chhi thei nawpa ta baokhâ chyu si la tahpa member lâ ahawna a tao hra.

Puhpa K. Hrahmô, Pro-tem Chairman chata Politician zy pi cha zawpi ku liata a ypa châ pi ta, zawpi vâta CM zy, Minister zy, CEM zy, EM zy châ pi ta, zawpi vâ pyly ta a châhta cha sleeper akypa ta lyu sie abyuhna daihti chhao a y thei tahpa palôh lia y sa la. A râh zawpi ta Sixth Schedule Amendment buakhei pi ta, cha daihti liata MNF party ta ruling liata ama vaw y awpa daihti liata Sixth Schedule Amendment ama vaw pasâhsapa he aly’pa a châ kaw tahpa reih ta, Sixth Schedule Amendment leipa ta Mara chi nata pho abohna y vei tahpa pahnopa ta eima palôh lia y sa la, he sawhkhâ chhao he ta Sixth Schedule Amendment he a buakhei chai awpa ta Chairman Pro-tem a châna lâ tawhta ahawna a tao. 

Puhpa K. Hrahmô, Pro-tem Chairman chata bie reina chyupa hnei pazi ta, “Mara zawpizy ta khâpa eima châ taraw leipa ta MDC 25 pa zy pi he miah ngâ ei ta, râh chakaona rai hria awpa ta he su liata miah vaw padua ei ta, Sixth Schedule provisiton – District Council eima hneina chhâ chaipa cha Mara chi nata pho, reih, tradition & custom zy pabohsa ta palaiseihsa awpa he a châ tahpa he eima zydua ta pahno chanei via heih ei si la, NGOs – MTP zy, Awnanozy ta MDC rai he vaw hria thai leipa aw ei ta, keimo 25 pa zy pi he ta Mara chi nata pho, reih, tradition & custom zy pabohsa ta palaiseihsa lymâ awpa he na eima maohphaohna a châ tahpa pahno chanei si la, Mara kawpa ta pati nie, Mara kawpa ta ti doh, Mara kawpa ta khihsa awpa eima châ tahpa he a chhâna châta ei vaw rei khohpa a châ” tahpa reih ta, he khai tawhta Puhpa N. Viakhu, Chairman thiehpa hnoh ta Chairman maohphaohna zydua a hlâ.

Chairman thiehpa Puhpa N. Viakhu chata Chairman dyuchhai a pahrâ tawhta biereina chyupa hnei ta, “tloh leina nata sialeina hluhpi ei hnei aw tahpa pahno na ta, châhrasala nama zydua deichhyna châ haw ei na ta, eima pahno chyuhpa hawhta MADC ta Golden Jubile eima tlô kô nata eimâ ly kô zy vaw châ ta, kô 50 chhôh miah chhihtha tuhpa eima Khazohpa athei chyu si la, 12th Term General Election liata eima party chyu ryureih awpa hnabeiseihpa ta election vaw hnei pi ta, party sâkha ta ryureih thai lei awpa ta Khazohpa ta miah chhihtha ha ta, Election khai tawhta Mara zawpizy ta kheihta ma MADC a sie sualuah aw tahpa miah sai ei ta, Election khai tawhta sawhkhâna sie thai lei awpa ta a ypazy he râh châta maophyuhna, noza chhihpazy a cha tyhpa vâta zawpi nata Awnanopazy ta miah vei ngaita ei ta, thlah zy thata miah chhâpa ei ta, cha khô lâ liata atanoh liata Abei Khazohpa ta Congress Legislature nata MNF Legislature zy ta a chhohiapa ta Joint Legislature padua theipa a châpa he eima râh zawpi nata Awnanopazy chhao ta miah amâ lykhei nahta hnabeiseihpa ta, atanoh liata eima duahmo he eima Khazohpa miah a chhihthana na a châ e tahpa he eima zydua ta eimâ py awpa ta châ haw ei na ta. Eima kaw sie laih nawpa liata he House zachhina he ahy rai ta eima pabohsa awpa he eima tao awpa châta.”

“Mararâ ta ryureina sâh chaipa eima hnei chhôhpa MADC ryureina o he keimo nata keimo a eichhiana ta zy, atuhrina ta zy hmâh leipa ta palôraoh kawpa ta Mararâh châta rai hria awpa nata Mararâh hmahsiena awpa ta, Mararâh tlâhna awpa ta kheihta ma palôraoh kawpa ta pachâna eima hmâ aw tahpazie ta eima siekhei awpa he atanoh liata member zachhih kawpazy châ haw ei na ta, atanoh liata Executive formation he sia mâh vei hra sala, Chairman (atlyna) process deikua cha atanoh liata pachhâpa avaw châ hapa vâta alynabie reih chanei heih na ta, eima CCB Rules 32(1)-na ta biehneina eina piepa hawhta Deputy Chairman atlyna deikua cha daihti rypaoh tua chaipa vaw moh aw pi ta, cha daihti liata eima Secretary tawhta Notification vaw hmô chyu aw ei chi ta, chatawhta Deputy Chairman atlyna eima siekhei awpa a châ aw” tahpa ta reih.

Atanoh 12th Term MADC Chairman atlyna atyupahmaohna he dawh 11:08 Am pa ta daihti taihpa y leipa ta Puhpa N. Viakhu, Chairman ta a pachhâsa.

ISSUED BY:

Information & Publicity Department

Mara Autonomous District Council

Siaha.