Article : Laiphô chô

Hlâno Marapazy kha ama chheipâh liata chi hro Pho hropazy hawhta Satlia ariepakhyna (Paw nah chhao amâ hlao hra ngyu aw) su Tlaikaonahzy ta, 'Zawlbuk' ama vaw tah tyhpa nata Garo nawta 'Nawkpante' ama tahpa hawhpa kha hnei leipa ei. Anodeikua, chyhsa O/Laihsa -O liata ariepakhypa ta, 'LAIPHÔ ama vaw CHÔ' tyh. 'Laiphô chô' tahpa he 'maniah O liata a môpa' tahna a châ chhao eima tah thei aw.

Hlâno Marapazy kha, chapaw kô 15 a tloh hapa cha ama O liata a rie leipa ta, Laiphô chô awpa hawhta pachâpa châ ta. Atlâhpipa ta laihsa yna O liata Laiphô he ama chô tyh.

Hlâno Marapazy thâtih vaw rohtuhpa pakha NE Parry ta cha, Marapazy kha Tlaikaona hawhta 'zawlbuk' - hmoto apachuna nata ydâh apachuna ama vaw hnei leipa vâta ama diathlâ kawpa hawhta a châbu, 'The Lakhers' liata vaw roh ta. He he â dona kao chhao a y thei hra aw. 

'Laiphô chô'-pa heta Mara satliazy kha ydâh nata hrozie liata pachupa muarua a hneipa ta â lâ lei tarawpa ta, Mara laihsa, Laiphô ama chôna liata a ypazy châta cha hrozie nôchâ achuna hmeiseihpa a vaw châ.

He vâna heta Laiphô chô hluhna O cha chanô siapa O ama vaw tah tyhpa a châ. A hiehâna tlyma palôhtlâh leina tlyma laihsa chata ahy hnohta hmahta a palâsa awpa châ leipa ta, khokhei viapa nata bie achho pha viapa a hnei awpa châ hra vei. Ama zydua ta â lyupa ta a khâsia awpa ei a châ. 

Laihsa chata ama O liata a vaw riepazy cha Karaoti nata Châhnamei a pachâpa awpa châ ta; Ama O liata Laiphô vaw chôpazy byuhpa nata angiahpa cha a theina rakhata a pachâpa awpa a châ.

Atlâhpipa ta hlâno laihsazy kha ama nô nata paw, chhôhkhazy chhaota a zia tyh ei ta; thokha cha âmo khota amâ zia tyh hra. Laihsa chata â mô hlâta a O liata Laiphô vaw chôpazy ta mei amâ ai awpa chakoh liata patihpa ta, ama lahua awpa thotô chhao a sopa khai awpa a châ. He hawhpa kyh liata chanô 'veiseih' leipa cha Laiphô chôna tlâhta rao tyh veih ei.

Hmo ngiatlâh a châ kawpa cha, satlia ta laihsa khotlyna chhaota â chakuh thei khiahta nata, ama pahnopapua lei khiahta la khâpa pei châ hlei leipa ta, anodeikua, a vaw hmôpa tlyma ama nô nata paw ta tlyma ama hmô khiahta la, satlia nata laihsa cha amâ hnei cheingei awpa a châ. Anodeikua, satliapa ta laihsa nô nata paw y lei chhôhta ama rakhô liata  â vaw ziakhei ta, ama patu deikua khiahta la, Vao nata Awh a chanôpa nô nata paw liata cheih aw ta; Sahma nata Vao, 'Vaopia' abei nata a machâzy lâta a cheih hra awpa a châ.

Anodeikuala, kha hawhta laihsa O liata laiphô ama vaw chô tyh tarawpa ta mohchhie ngâna taihta avaw piechheipa deikua ama vaw sôh kaw tyh. He heta Mara satlia nata Laihsazy hro kha avaw pathaih kaw tyh tahpa khachâ rakha ma cha a palâsa kaw.

Atahmâhlâ khizaw, Krizyhpa eima châ tawhta nata Laiphô chô eima bâsai tawhna deikua heta, 'Dâh Pathaihpa' ta ahneipa thokha he la pachâpasia byuh a chhihpa hmo tlaina a châ ha bâ. 'Palôh liata Khazohpa china chôta, eima pathaih tlai ma?' tahpa chhao he pachâkhi a pha ha. He vâna heta kyh kha lâta cha dâh 2-na ta ahneipazy he tlao ama pado via khiahma i? tahpâ ngâ awpa a châ ha bâ he zaw.

Laiphô Chô he Mara taozie liata cha 'Chanô Hrozie achuna' pha ngaitapa a vaw châ.