Article : MARA PYUNGIA HMIATUAPAZY (S.NGÔDEI, K.SAIDI & J.VIALUA)

Rohtuhpa - K.HRÂ U

Rohtuhpa : K.Hrâ U

Keimo zy eima chyh via no he cassette (Tape recorder) vaw pua mâh leipa ta, Radio liata hla eima nahthlie tyh. Burma râh Rangoon tawhta a pua tyhpa Burma Broadcasting System tawhta Chin (Laizo) Programme y ta, zâlâ dawh 6 rachhôhta Radio a hneipa o lâ thlai a ngai pi ta, cha liata Lai hla zy nahthlie tyh pi ta eima paphasa ngâsâ. Kheihawhpa daihti ta tlyma Mara hla kaw papua ei ta, he daihti nota Burma Institute of Theology liata B.Th achu haipa Satlia Samau (Lialai khihpa, atahmâ Siaha liata a ypa Puhpa Samau, Ngôhai paw) sapa "Ei vaw pina Mararâh Ngiachhie chhi" tahpa hla vaw papua tyh ei ta, eima nahthlie khoh ngâsâ. He hleikhôta he daihti nota Rangoon liata a pahrâpa Puhpa Teihra (L) nata a sahlao zy ta Awhkhypa hla ama sapa zy ama vaw papua tyh hra.

Daihti vaw sie via ta "Dawh hlasa" ama tahpa vaw phaoh ei ta, cha Dawh hlasa ama tahpa cha a phiapa châ ta, a chô liata 'disk' hawhpa kei soh ei ta, hla a vaw sa lymâ. He Dawh hlasa liata hlazy he Mongyuh hla via sai châ ta, a nahthlie pahâh nawpa chhao pahno ma pi. Daihti vaw sie via heih ta, Cassette ama tahpa Tape Recorder vaw pua heih ta, ao zy a khô thai ta, a nahthlie chhao a pha via syulyu. Viah (Burmese) hla Sai Hti Saing, Bo Bo Han hla zy, Lai hla Salai Sun Ceu, Fam Men nata Tin Tlung hla zy vaw nahthlie tyh pi ta eima paphasa via rili. Anodeikua cha cassette tawhta reih hropa hlazy dei y ta keimo Mara hla nahthlie awpa y vei.

Cassette tawhta keimo Mara hla cheingei nahthlie nawpa ta Tape a vaw papua tua chaipa he S.Ngôdei (Tipa) châ ta, 1989 kô liata a châ. Ano he a ao pha kaw ta, naizualuah kaw ta, a hlasapa nahthlie ai a chhihvei. 

"Ei Ngia Rili" tahpa album châ ta, Mararâh khih zydua he cassette a y leina y ngyu vei tahpa ei pangiasa. Tape album chôkyh liata "Vulmawi Recording" tahpa dei a roh ta, kheihawhpa Music Band ma a tô ei tahpa pahnopa châ vei. Cover liata "Design Lu Chaw" (Lu Chhaw tahpa ta ao a paro) tahpa a roh ta, he he Burmese moh tlâ a châ. Vulmawi Recording chhao he Kalay Myo Tahan liata recording mohpathâh kawpa châ ta, Tahan liata ama khôpa châ sala ei pangiasa.

"Ei Ngia Rili" tahpa hla album he Mara hla album ta a vaw pua tuachaipa a châpa vâta chyhsazy ta eima pasô kaw chyu sai. A chhôh liata hla 16 rachhôh y ta, a zydua ta nahthlie kho a chhih kaw sai ta, a ngiana, palôhliena hla via sai a châ. Ei vaona rakha ta he hla album chhô liata a ypazy cha: "Ei Ngia Rili, Kô 1000 Lei Hrasa, Phulei Nô, Mâpha, Raithlij chhaota Valâ Ei Zohna, Râhpa hmiazy vaw zie bâ la, D Hro Rai Vâ Vana" tahpa hlazy he nahthlie via pi, nahthlie khoh via pi tah ta, nahthlie ai a chhih thai vei ei. Vâ-ia a hneipa zy châta lôhlie lôhiah pachhihsa ngasata, mothlih tla ngâna taihta chyhsa palôh a panyusa thei kaw. Vâ-ia a hneileipazy chhao vâ-ia hnei khohna palôh chhao ama hnei theina taihta chyhsa palôh a pathyusa thei.

Châhvâ nopi vaw chhi, tlâhto suto meithâh a vaw zawh, châhvâ rainôzy vaw khaih,  Avyuh Chiahchi zy vaw pawh a tahna daihti ta S. Ngôdei hla eima vaw nahthlie thlâh hapa he la lôhlie tah dei leipa ta rei awpa hropa y vei. 

Eikha cha Chheihlu (India Mararâh Satly khih kiah liata a y) khih tlô na ta, ei tlôna o tawhta a hnia pâ kawna su liata satlia pakha ta Ngôdei hla tape pasasa ta, cha satliapa cha a palôh a lie ngâsâ ngyu ta, "Ei nâ, kie la a mô thai khao va na" tahpa ta a ngieh pâ ngâpa thei na ta, kei chhao aru lâta ei palôh a lie kaw hra ta, cha satliapa hawhta amô thei khao hra va na. 

S. Ngôdei album liata Music ama tôpa deikua he ei palôh na cha kaw tu vei. Music Band mohpathâhpa châ ngyu vei ei tahpa ei pangiasa. Châhrasala, Mara hla ta cassette a vaw pua tuachaipa châ ta, Mara Pyungia hmia a vaw sa tuachaipa a châ. Â thei khiahta la "Ei Ngia Rili" tahpa album kha vaw pathieh thei heih ei sala tahpa ei khoh kawh. S. Ngôdei hlazy hry liata ei kho chaipa sâkha ei vaw palâsa :

PHULEI NÔ

Châhvâ vaw chhi lôhlie ta, tlâ to za sai châhta,

A thieh pathi rili hnôlâ zaizy a ngiana,

Paw hawh a lo chiehpa ngiana kei cha a pasa

Na taokhei la rairao chhôhso vâsâhna he.

Hy! Vâsâhna chhâ thai vei, rairao keima ei tovyuh

Vahpiati hawh lo zaolao tyh, ei chhôhso lia

Vâsâh lôhiah hrypa dei ma keima ei tovyuh

Chhaileinô, kei châta khataih lia ma na y?

2.  Chhaolei chô lia kei hawh vâsâh taopa y aw ma?

Tlâhpadâ tho chô lia Hlihchhy vâsâhpa ta

Hly-âh thâ â ngiahna raithlih palo laihpa hawh

Hnazô chyulei vâtihria tao kei châ a pasa.

3.  Ei chônohlynô vaw tla hazoh vaw chhi heih ta

Lailâh hrozy lôhdu a kaolâh laihei ta

Kei châ khataih lia ma mokuh ramâ ei khaih aw?

Hazoh ei chôthlapi khaihphana lia dei mâ?

1989 December ta Mara hla album sâkha vaw pua heih ta, Ngephepi khihpa Laihsa Saidi (K. Saidi) sapa "Vaw Kua Ha la" tahpa album a châ. Laihsa Saidi he a aopha ngaita ta, a ao he thua reih cheih ta, châhvâ rainô ao a khaihpa hawh nata Tuhpikalinô ao a ngiapa hawhta a châ.  A ao sia ngaita ta, a pasâh thei hmeiseih. Mara hla parohpa zy nata ano a phipa hla thiehpazy, Ngôchôle phipa zy châ ta, nahthlie khoh â chhih hmeiseih.

"Saduthliena, U U Angieh laih tyh na, Su yru tawh, Va Kua ha la,  A ngâ thai va, D Nô, Daihti khô chiehpa, Akao laih mawh ei sihla, Kheita ma ei taotiah aw, Naw pasia la, Atyhna noh, Sihnôh vaw kua khao kha y, Ramâ liata Pawpi, A pasa nata Tuhpikalinô hawh" tahpazy châ ta, a thua-ua kaw sai ta, nahthlie ai a chhih thai tlâ vei. A ao a pha hleikhôta ama tôpa music he a pha ngâsâ. Rangoon liata Recording mohpathâhpa 'Ye Khaung May Studio' liata ao a khô ta, Burma râh music band mohpathâh ngaitapa "The Wild One's" music band ta ama tô. He band he Burma râh liata hlasathai mohpathâhpa Sai Hti Saing (L) nata a sahlao châ ei ta, Ama tôpa pha ngaita ta, hla nata music he â vaw hmie kaw sai. Intro nata solo zy a hmie kaw sai ta, a music eima theipa tawnah ta ku pazawh ta lâpâ ngâna taih, a chanei a chanâ khoh ngâna taih palôh a pathyusa thei. Hla a thua-uapa nata lôhliena hlazy a hlao veichâh ta, a miano ta chyhsa palôh a hria thei kaw sai.

K. Saidi he Mara zawhly reih (Tlôsai reih) a hmâpa châ leipa ta Ngephepi khihpa a châ tita, Tlôsai ao a pasia kaw leina zy a y hôlô. Châhrasla hiakha lâ ta pachâpa ta nahthlie khoh â chhih kaw thlâh ha. Notla Mara mo ei viasazy ta eina chhopa cha, 

"Burma Mara ao puazie ta sa ta, nahthlie kho â chhih ngâsâ" eina tah ei. 

Phusa khih (Chhaolô khih liata a ypa) liata Siku pachutuhpa rai ei hria no (1989-1991) ta, Phusâ mo nata Chhaolô mo zy ta, 

"Pa U (kei he Pa U tahpa ta eina aw ei), Saidi he nama khih â hnia ma? Na hmia pahnopa a châ ma?"

tahpa na hriahrih tyh ei ta, 

"Ei hmiapahnopa a châ sao tlai, Ngephepi khipa châ ta, a nô he ei nonô lâhchhâ a châ, ei tunô na a châ bao, sanawh chhôhkhapa eima châ mâh tâ" 

tah ei na ta, eina pasâhsa hmeiseih ei. Eina uava ngâsâ ei. 

Eikha cha Chhaolô mo, Phusâ mo zy nata Siaha lâ zu pi ta, Siaha Vaihpi liata K.Saidi nahta a vaw tyh pi ta, chibai a vaw bu pi ta bie zy reih lâh pi, thopi zy doh pi tah pi ta, Chhaolô mo nata Phusâ mo cha ama no-âh kaw ta, khih eima kaw tlô tawhta, 

"Siku hyutuhpa Pa U nata Saidi amâ hmiapahno kaw, sanawh chhôhkha ama vaw châ thlâh bao" tahpa zy ama reih pâ ngâ. Ei rei khohpa cha K. Saidi ama vaw pasôzie nata ama vaw pasâhsazie a châ.

Eikha heih cha, Rangoon University liata siku eima kia hai no, 1993 rachhôhta siku ei kialâhpa Kuhchah zuahnô ei viasanô Borku ama tahpa he Saidi Cassette hnei ta, nahthlie tyh ta, a hlazy khoh kaw sai ta, a bie deikua a no a vâh tlâ vei. 

"Pa Uk, Saidi an ti mi nu hi nanmah Mara mi a si lo maw?" 

na tah ta, 

"A châ" tah na ta, 

"A hla ka ngai tawn, a tha taktak, a sinain a bia ka fiang lo, na ka leh piak lai" 

eina ta. 

Khataih lia e cha cassette cha na la? tah na ta 

"Ka tapa nih Mizoram lei kuki a leknak in a rak phorh(ei rilâhpa ta Mizo râh luata â hlaona tawhta a kaw phaoh) eina tah. 

"A pha, ei cha paliepa aw" thlai tah na ta, thopi daoh liata Saidi hlabie cha Lai (Hakha) reihta palie laihna ta, hlabie thokha deikua he reih hropa ta palie tita Mara reih hawhta pasie pahlo, thlôh-ia thai khao leipa ta; châhrasala a khoh ngâsâ.  K.Saidi hla he Mara reih a thei leipa chihro phohropazy chhao ta ama nahthlie khoh kaw sai. 

K. Saidi hlazy hry liata lôhlie a pachhihsa kawpa sâkha ei vaw palâsa :

TUPIHKALI YRU NÔ HAWH

Ei chô nohlynô vaw tla hazoh vaw chhi ta, 

Chhôhso ta ropady na ei lailâhzy, 

Rairao hnôh lâ vâpa ta ei lailâh tua paw, 

A ngia hualuana bâhlia cha ao ngâpa ei khoh.

Tuhpikali yru nô hawhna khie, 

Seihnai opi dâh rolo tawh ngia na, 

Vâsâh ei chana khiahlô tlâ nawpa rianai, 

Lyuhbie paru eikha chhâ naw hlâ heih bao ma y.

Motlei châna lytlâh cha na kiah dâhdei aw ma? 

Chhôhso ta lôh lia kei châ tao a ru tu, 

Rairao hnôh na chhy hapa he nâ thei hrala,

Hnazô chyulei vâtihria taozie thai khao va na.

Atlâhpa ta atlâhpa ta atlâhpa ta, 

Bâhlia cha-aopa ta laina su sai sie,

Atlâhpa ta atlâhpa ta atlâhpa ta, 

Bâh thei va na atlâhpa ta chyulei mâ pha sy.

Mara hla album sâthôhna a papuapa ei pahnopa cha Puhpa J Vialua a cha. A papuana kô he a siahlia kawpa ta a vao va na. College ei chu hai no 1992 or 93 rachhôh châ sala ei pangiasa. A hla he a thua-ua kaw sai ta, angiehna hla chhao y ta, Rock n' Roll hla chhao a hlao hra.

Marapasaw tawhta Rock n' Roll a sa tuachaipa a châ thlyu aw. 

"Lyuva Ku, Apalai tu kha la Hy Laijsa, SoPavaw, Lôh na pasatuh y vei ei, Ramâ hawh ama châ khai ha na" tahpa hlazy châ ta, Puhpa J.Vialua he a aophazie, hlasa a thaizie, a hlabie zy a phazie, a bie a thuhzie nata ano cheingeipa chhao he hlaphithai ta, Mara mota eima hneichhôhpa hlasa thaipâ, hla chhao phi thaipâ a tahpa chyhsa nota leipa a vaw châ. Music ama tôpa chhao he vaw pha kaw ta, angiehna hla nata hla a thua-uapa ta ama tôpa â hmie kaw rairie sai.

J. Vialua hlazy hry liata chyhsa palôh a paliesa chai awpa hla ta ei pachâpa cha "Sopavaw" tahpa hla a châ. He hawhta a bie a châ. (Youtube tawhta ei nahthliepa ei theithaina rakha ta ei ropa châ ta, a hla bie ei rochheipa chhao a y thei)

SOPAVAW

Ei lailâh zydua vaw pawh chanei tlâ vei ei,

Dyhchâ khôphei na kiah sai khai ei,

Khôpheih kiah ta saliah nawhly a pyh khai ei, 

Ama hmia hnazô rai y khao vei ei.

Sopavaw rielâ nô hawh khie, 

Tlâh to hry ta a ngieh laih no, 

Laina nohzy thâ a ngia laih no, 

Sopavaw rielâ nô haw khi, 

Tlâh to hry hualua lai tyh no.

Avyuhpaw nah Chiahchi pawngia pakaipa zy ta, 

Ei chhôhso lôh na palie via tyh, 

Hy thosôh na tlâhto bypi pawngiazy 

Ei chhôhso lôh na palie rili.

Ei laila zydua vaw paw pathi tla vei ei, kei rairao nawhnai ta ei y no, laila hrozy thangia ta vala zo ty no, ei chhôso lô a za lie dâh châ!

A chô liatahpa hlabie zy eima rei tita, a bie siezie pha kaw ta, a naizualuah kawpa ta a sapa eima nahthlie thlâh hapa he la chyhsa palôh hria thei kaw ta, palôh panyusa thei kaw ta, lôh a lie leithei vei. Aru lâta mothlih a hru ngâ awpa taih a châ. Vâ-iana lâchhâh châ leipa ta eima chyh via nota eimâ kaolâhpazy, siku eima kialâhpa eima viasazy su nano su nano saita vaw y khai ha pi ta, hnôh lâ daihti zaihzy ropadypa ta he hla nahthlie châhta la lôhlie â chhij ngâsâ.

Puhpa J.Vialua he vaw hroh parei leipa ta a kô panyupa ta maniah a vaw pahâsai haw. I â chhih hmeiseih. A sawchanô J.Ruby chhao a paw hawhta hlasa thai hra ta, a moh pathâh kawpa a châ hra.

Y,  Mara Pyungia hmiatuapa pathôh hryta Puhpa J Vialua he maniah vaw khô sai ha ta, Pihnô Ngôdei nata Pihnô Saidi deikua atlâhpa ta ama y chy tahpa pahnopa a châ. He atlâhpa pano chhao he â thei khiahta la ama hla parohpa album zy kha vaw pathieh thei heih ei sala tahpa khokheina a sâh chaipa ei hlâ ei. Pihnô S. Ngôdei nata Pihnô K. Saidi zy vaw tlâh parei mawh ei sy!