Football : Arsenal ta Nyungiapa Manchester City ku liata ama hlâ!

Pachyhzâ Premier League akhaihpa liata Nyungiapa chalo awpa ta hnabeiseihna ama hnei chhôhpa cha meihthâh hawh paipa ta, Nottingham Forest hmiakô liata 1-0 ta ama tlô leipa vâta, Arsenal ta Manchester City ku liata Nyungiapa ama pie haw. Forest goal a ngia chhôhpa he Taiwo Awoniyi ta a khôpa a châ.

Arsenal heta ei 38 akhaih awpa liata ei 37 akhaih hapa ta, Point 81 hmô hai ei ta; Man City heta ei 38 akhaih awpa liata ei 35 akhaih hapa ta, Point 85 hmôpa ta, khaih 3 akhaih awpa hnei ei ta, Arsenal châta a chadai pha rimâ awpa châ khao vei ei.

Thla 2 a khô hapa liana khata cha, Mikel Arteta nata a nawhtazy heta Premier League liata Point 8 ta hmia a sah taraw ei ta, anodeikua Nyungiapa he ama tovyuh a châ hra lei awpa vâ cha ma a châ ha ma, amâ vâduana a pazao ta, atahmâ duasu he ama tlô hapa a châ.

Arsenal heta atahmâ 2022-23 Season he a pie pha kaw ei ta, Season athao tawhta Premier League table liata Noh 248 chhôh tlai hmia a sah ei ta, he he 'English top-flight' thâtih liata Nyungiapa a chalo tlôh leipa liata hmia a sa parei chaipa 'record' a tloh.

He hawhta a châ nona heta, Manchester City he Huddersfield Town (1924-26), Arsenal (1933-35), Liverpool (1982-84) nata Manchester United (1999-2001 and 2007-09) zy pazipa ta English Topflight liata â zaopa ta ei thôh Nyungiapa chalo theipa 5-na ama kaw châ ha hra.

City ta Season ei charu liata ei pangawh Nyungiapa ama chalo theipa heta Premier League liata ryu ama reihzie palâsa ta; he hawhta ryureina daihti he Manchester United khata 1996 nata 2001 chhôh khata vaw palâsa ha hra ei ta, kha nona khata Season kha liata nyungiapa 3 chalopa ta - Treble - Premier League, FA Cup nata Champions League ama vaw chalopa kha châ ta. Man City chhao he Nyungiapa 3 - Premier League, FA Cup nata Champions League chalo thei awpa duasu liata amâ duah hai.